୨୭ ତମ ପ୍ରତିଷ୍ଠା ଦିବସ ପାଳୁଛି ବିଜେଡି । ରାଜ୍ୟବ୍ୟାପୀ ଧୁମଧାମରେ ଏହି ଦିନକୁ ପାଳନ କରୁଛନ୍ତି ଦଳର ନେତା ଓ କର୍ମୀ । ଏହା ସ୍ବାଭିବକ୍। ୨୦୨୪ ବିଧାନସଭା ନିର୍ବାଚନରେ ଦଳର ପୂର୍ବ ସଫଳତାକୁ କାଟି ରେକର୍ଡ ଆସନ ଦଖଲ ନେଇ ଦାବି କରୁଛନ୍ତି ବିଜେଡି ନେତା । ଏଥିରେ ବି ଅସ୍ବାଭାବିକତା କିଛି ନାହିଁ। କିନ୍ତୁ ଓଡ଼ିଶାବାସୀ ୨୪ ବର୍ଷ ଧରି ଯେଉଁ ଏକତରଫା ସମର୍ଥନ ବିଜେଡିକୁ ଦେଇଆସିଛନ୍ତି ତା ପ୍ରତିବଦଳରେ ରାଜ୍ୟବାସୀଙ୍କୁ କଣ ଦେଇଛି ବିଜେଡି ?
ଦୀର୍ଘଦିନ ସରକାରରେ ରହିଥିବାରୁ ନବୀନ ବାବୁ ହିଁ ରାଜ୍ୟବାସୀଙ୍କ ପାଖରେ ଉତ୍ତରଦାୟୀ । ହେଲେ ଏ ସରକାର ଲୋକଙ୍କର କେମିତି ତଣ୍ଟିଚିପିଛି ସେକଥା ବି ଆପଣ ଜାଣନ୍ତୁ । ସାମଗ୍ରିକ ଘରୋଇ ଉତ୍ପାଦ ବା ଜିଏସଡିପି ଦୃଷ୍ଟିରୁ ଓଡ଼ିଶା ଦେଶର ୧୪ ତମ ରାଜ୍ୟ । ମୁଣ୍ଡପିଛା ଆୟ ଦୃଷ୍ଟିରୁ ଦେଶରେ ୧୮ ତମ ସ୍ଥାନରେ ରହିଛି ଓଡ଼ିଶା । ନୀତି ଆୟୋଗର ବାର୍ଷିକ ହେଲଥ୍ ଇଣ୍ଡେକ୍ସରେ ଲୋକଙ୍କୁ ଉତ୍ତମ ସ୍ବାସ୍ଥ୍ୟ ସେବା ଯୋଗାଇବା କ୍ଷେତ୍ରରେ ଓଡ଼ିଶା ୨୦ ଟି ବଡ଼ ରାଜ୍ୟ ମଧ୍ୟରୁ ୧୭ ତମ ସ୍ଥାନରେ । ସେହିପରି ଓଡ଼ିଶାରେ କୃଷକଙ୍କ ଆୟ ଦେଶର ଦ୍ବିତୀୟ ସର୍ବନିମ୍ନ । ରାଜ୍ୟର ୨୫ ଜିଲ୍ଲାର ୩ ହଜାର ୪୬୩ ଗାଁରେ ନାହିଁ ଶୁଦ୍ଧ ପାଣିର ବ୍ୟବସ୍ଥା । ଓଡ଼ିଶାର ଉଭୟ ଗ୍ରାମାଞ୍ଚଳ ଓ ସହରାଞ୍ଚଳର ମାତ୍ର ୩୧ ପ୍ରତିଶତ ପରିବାର ପାଖରେ ପହଁଚୁଛି ବିଶୁଦ୍ଧ ପାଣି । ରାଜ୍ୟରେ ସ୍କୁଲ ଡ୍ରପଆଉଟ୍ ଛାତ୍ରଛାତ୍ରୀଙ୍କ ହାର ଦେଶରେ ସର୍ବାଧିକ । ସେହିପରି ସମସ୍ତଙ୍କ ମୁଣ୍ଡରେ ପକ୍କାଘର ଟାର୍ଗେଟରୁ ଓଡ଼ିଶା ଏବେବି ବହୁ ଦୂରରେ।
ଅମାପ ଖଣିଜ ସମ୍ପଦ ସାଙ୍ଗକୁ ସୁଦୀର୍ଘ ବେଳାଭୂମି, ଜଳ ସମ୍ପଦ, ଜଙ୍ଗଲ ସମ୍ପଦ, ପର୍ଯ୍ୟଟନ କ୍ଷେତ୍ର, ଐତିହ୍ୟ, କଳା ଭାସ୍କର୍ଯ୍ୟ କେଉଁଥିରେ ଅଭାବ ନାହିଁ ରାଜ୍ୟରେ । ତାସତ୍ଵେ ଓଡ଼ିଶାର ଅର୍ଥନୀତି ସର୍ବାଧିକ ଖଣି ରାଜସ୍ଵ ଉପରେ ନିର୍ଭରଶୀଳ । ଯାହା ବିଜେଡି ସରକାରଙ୍କ ପୁରୁଷାର୍ଥରୁ ନୁହେଁ ବରଂ ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦରୁ ଓଡ଼ିଶାର ଭୂମିତଳେ ଗଚ୍ଛିତ ହୋଇ ରହିଛି । ହେଲେ ବେରୋଜଗାରୀ ସଂଖ୍ୟା ରାଜ୍ୟରେ କିଛି କମ ନୁହେଁ । ଜୁଲାଇରୁ ସେପ୍ଟେମ୍ବର ୨୦୨୩ ପର୍ଯ୍ୟନ୍ତ ପିଏଲଏଫଏସ ରିପୋର୍ଟରେ ସାମ୍ନାକୁ ଆସିଥିଲା ସଂଘାତିକ ତଥ୍ୟ। ଭାରତୀୟ ସ୍ତରରେ ସହରାଞ୍ଚଳରେ ବେକାରୀ ହାର 17.3 ହୋଇଥିବା ବେଳେ ଓଡ଼ିଶାରେ ଏହା 20.9 । ଓଡ଼ିଶାରେ ପୁରୁଷ ବେକାରୀ ହାର 16.9 ହୋଇଥିବା ବେଳେ ଭାରତରେ ଏହା 15.5 । ଓଡ଼ିଶାରେ ମହିଳା ବେକାରୀ ହାର 31.9 ଥିବା ବେଳେ ସର୍ବଭାରତୀୟ ସ୍ତରରେ ଏହା 22.9 ।
ଖାଲି ଏତିକି ନୁହେଁ ବରଂ ଦାଦନ ଯିବାରେ ବି ଆମ ରାଜ୍ୟରେ ଆଗରେ । କାହାର ଇଚ୍ଛାରେ କିଏ ଦାଦନ ଯାଉଛି ତାହା ନୁହେଁ ବରଂ ବାଧ୍ୟରେ...ପରିବାର ପାଇଁ ଦାଦନ ଯାଉଛନ୍ତି ଲୋକେ । ଏମିତିକି କରୋନା ସମୟରେ ଓଡ଼ିଶାକୁ ପ୍ରାୟ 7 ଲକ୍ଷ ଶ୍ରମିକ ବାହାର ରାଜ୍ୟରୁ ଫେରିଥିଲେ ବୋଲି କୁହାଯାଇଥିଲା। ତେବେ ପ୍ରକୃତ ସଂଖ୍ୟା ଏହାଠାରୁ ଢେର ଅଧିକ।
ଗୁରୁତ୍ଵପୂର୍ଣ୍ଣ କଥା ହେଲା ୨୪ ବର୍ଷର ସ୍ଥିର ସରକାର ଥିବା ସତ୍ଵେ ବିକାଶ ନାଁରେ କେବଳ ବିନାଶ କରୁଛି ବିଜେଡି । ଯେଉଁଥି ଲାଗି ରାଜ୍ୟ ଆଜି ଏତେ ପଛରେ ପଡିଛି ଯେ ତାହା ଜଳଜଳ ହୋଇ ଦିଶୁଛି । ସମୟ କହିବ ଆଗାମୀ ନିର୍ବାଚନରେ ରାଜନୈତିକ ପାଣିପାଗ ଏହି ସବୁ ତଥ୍ୟକୁ ନେଇ କେତେ ଉଷ୍ମ ହେଉଛି ।
