ଅର୍ଗସ ବ୍ୟୁରୋ: ସପ୍ତାହ ଆରମ୍ଭରୁ ସେୟାର ବଜାର ତଳମୁହାଁ ହୋଇଛି । ଗତ ସପ୍ତାହରେ ନିବେଶକଙ୍କୁ ଦଲାଲ୍ ଷ୍ଟ୍ରିଟ୍ ନିରାଶ କରିଥିବା ବେଳେ ଚଳିତ ସପ୍ତାହ ଆରମ୍ଭ ବି ନୈରାଶ୍ୟଜନକ ରହିଛି । ସୋମବାର ଷ୍ଟକ ମାର୍କେଟ ଖୋଲିବା ପରେ ସେନସେକ୍ସ ୭୦୦ ପଏଣ୍ଟ ଖସିଥିବା ବେଳେ ୨୦୦ ପଏଣ୍ଟ ହ୍ରାସ ପାଇଛି ନିଫ୍ଟି ।

ଜାନୁଆରୀ ୩ରେ ସେନସେକ୍ସ ୭୯ ହଜାର ୨୨୩ ପଏଣ୍ଟ ରହିଥିବା ବେଳେ ସପ୍ତାହର ଶେଷ କାରବାର ଦିନ ଶୁକ୍ରବାର ୭୭ ହଜାର ୩୭୮ ପଏଣ୍ଟକୁ ଖସି ଆସିଥିଲା । ସୋମବାର ସେନସେକ୍ସ ୭୬ ହଜାର ୭୦୦ ପଏଣ୍ଟରୁ କାରବାର ଆରମ୍ଭ ହୋଇଛି । ସେହିଭଳି ନିଫ୍ଟିଂ ମଧ୍ୟ ୨୦୦ ପଏଣ୍ଟ ହ୍ରାସ ପାଇଁ ୨୩ ହଜାର ୨୫୦ ପଏଣ୍ଟ ରହିଛି ।

ସେନସେକ୍ସର ୩୦ ସେୟାର ମଧ୍ୟରୁ କେବଳ ଗୋଟିଏ ବଢ଼ୁଥିବା ବେଳେ ବାକି ୨୯ ସେୟାର ତଳ ମୁହାଁ ରହିଛନ୍ତି । ନିଫ୍ଟିର ୫୦ ସେୟାରରୁ ୨ଟି ବଢ଼ୁଥିବା ବେଳେ ୪୮ଟି ଖସି ଚାଲିଛି । ଏନ୍‌ଏସ୍‌ଇ ସେକ୍ଟୋରଲ ଇଣ୍ଡେକ୍ସ ରିୟଲଟି ସେକ୍ଟର ସର୍ବାଧିକ ପ୍ରଭାବିତ ହୋଇଛି । ରିୟଲଟି ସେକ୍ଟର ସେୟାର ୨.୧୩ ପ୍ରତିଶତ ହ୍ରାସ ପାଇଥିବା ବେଳେ ଅଟୋ ୧.୧୫ ପ୍ରତିଶତ, ମେଟାଲ ୧.୩୧ ପ୍ରତିଶତ, ଅଏଲ୍ ଆଣ୍ଡ ଗ୍ୟାସ୍ ୧.୧୮ ପ୍ରତିଶତ ହ୍ରାସ ପାଇଛି ।

କେବଳ ଭାରତୀୟ ସେୟାର ବଜାର ନୁହେଁ ବିଶ୍ଵ ବଜାରରେ ମାନ୍ଦାବସ୍ଥା ଦେଖା ଦେଇଛି । ଚୀନର ସଂଘାଇ କମ୍ପୋଜିଟ୍ ଇଣ୍ଡେକ୍ସ ଆଜି ୦.୪୫ ପ୍ରତିଶତ ଖସିଛି । ଏନ୍ଏସ୍‌ଇ ତଥ୍ୟ ଅନୁସାରେ, ୧୦ ଜାନୁଆରୀରେ ୨, ୨୫୪.୬୮ କୋଟି ଟଙ୍କାର ସେୟାର ବିକ୍ରି କରିଛନ୍ତି ବିଦେଶୀ ନିବେଶକ ।

Argus News | argus news | Odisha Latest News, Breaking News, Trending News, Live TV