DA Hike / କେନ୍ଦ୍ରୀୟ କର୍ମଚାରୀଙ୍କ ପାଇଁ ଖୁସି ଖବର... ଦରମା ସହ ପେନ୍‌ସନ୍‌ରେ ମଧ୍ୟ ବଡ଼ ପରିବର୍ତ୍ତନ

ମହଙ୍ଗା ମାଡ଼ ମଧ୍ୟରେ କେନ୍ଦ୍ରୀୟ ସରକାରୀ କର୍ମଚାରୀ ଓ ପେନ୍‌ସନ୍‌ଭୋଗୀଙ୍କ ପାଇଁ ଆସିଛି ଖୁସି ଖବର । ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ୍‌ (DR)ରେ ୩ ପ୍ରତିଶତ ବୃଦ୍ଧିକୁ କେନ୍ଦ୍ର କ୍ୟାବିନେଟ୍‌ ମଞ୍ଜୁରି ଦେଇଥିବା ଖବର ସାମ୍ନାକୁ ଆସିଛି । ଏହି ନିଷ୍ପତ୍ତି ଦ୍ୱାରା କର୍ମଚାରୀଙ୍କ ଦରମା ଏବଂ ପେନ୍‌ସନ୍‌ଭୋଗୀଙ୍କ ପେନ୍‌ସନ୍‌ରେ ବୃଦ୍ଧି ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ରୀୟ କ୍ୟାବିନେଟ୍‌ ବୈଠକରେ ଏହି ପ୍ରସ୍ତାବକୁ ଅନୁମୋଦନ ମିଳିଥିବା ସୂଚନା ଦିଆଯାଇଛି ।

୧ କୋଟିରୁ ଅଧିକ ଲୋକ ହେବେ ଉପକୃତ
ମହଙ୍ଗା ଭତ୍ତା ହେଉଛି ମୁଦ୍ରାସ୍ଫୀତିର ପ୍ରଭାବକୁ କମାଇବା ପାଇଁ ସରକାରୀ କର୍ମଚାରୀଙ୍କୁ ଦିଆଯାଉଥିବା ଅତିରିକ୍ତ ରାଶି । ସେହିପରି ଅବସରପ୍ରାପ୍ତ କର୍ମଚାରୀଙ୍କୁ ମହଙ୍ଗା ପେନ୍‌ସନ୍‌ ମିଳିଥାଏ । ଏହି ନିଷ୍ପତ୍ତି ଦ୍ୱାରା ପ୍ରାୟ ୪୯ ଲକ୍ଷ କେନ୍ଦ୍ରୀୟ କର୍ମଚାରୀ ଏବଂ ୬୮ ଲକ୍ଷରୁ ଅଧିକ ପେନ୍‌ସନ୍‌ଭୋଗୀ ଉପକୃତ ହେବେ ବୋଲି ଆକଳନ କରାଯାଇଛି । ସପ୍ତମ ବେତନ ଆୟୋଗର ନିୟମ ଅନୁସାରେ ଏହି ବୃଦ୍ଧି କରାଯାଇଥିବା ଖବର ରହିଛି ।

DA ୬୦%ରୁ ବଢ଼ି ୬୩%
ପ୍ରକାଶିତ ସୂଚନା ଅନୁସାରେ, ମହଙ୍ଗା ଭତ୍ତାରେ ୩ ପ୍ରତିଶତ ବୃଦ୍ଧି ପରେ ଏହା ମୂଳ ଦରମାର ୬୦ ପ୍ରତିଶତରୁ ବଢ଼ି ୬୩ ପ୍ରତିଶତ ହୋଇଛି । ଏହି ବୃଦ୍ଧି ଜୁଲାଇ ମାସରୁ ଲାଗୁ ହେବା ସହ କର୍ମଚାରୀଙ୍କୁ ବକେୟା ଟଙ୍କା ମଧ୍ୟ ମିଳିବାର ସୂଚନା ରହିଛି । ଅକ୍ଟୋବର ମାସର ଦରମା ସହିତ ଚାରି ମାସର ବକେୟା ରାଶି ମିଳିପାରେ ବୋଲି ଖବରରେ କୁହାଯାଇଛି ।

କେତେ ବଢ଼ିବ ମାସିକ ଦରମା ?
- ମୂଳ ଦରମା ୧୮,୦୦୦ ଟଙ୍କା ହେଲେ ମାସିକ ୫୪୦ ଟଙ୍କା ବୃଦ୍ଧି ।
- ମୂଳ ଦରମା ୩୦,୦୦୦ ଟଙ୍କା ହେଲେ ମାସିକ ୯୦୦ ଟଙ୍କା ବୃଦ୍ଧି ।
- ମୂଳ ଦରମା ୫୦,୦୦୦ ଟଙ୍କା ହେଲେ ମାସିକ ୧,୫୦୦ ଟଙ୍କା ବୃଦ୍ଧି ।
ଏହି ବୃଦ୍ଧି ଦ୍ୱାରା ସରକାରଙ୍କ ରାଜକୋଷ ଉପରେ ପ୍ରାୟ ୧୦,୦୧୬ କୋଟି ଟଙ୍କାର ଅତିରିକ୍ତ ଆର୍ଥିକ ବୋଝ ପଡ଼ିବାର ଆକଳନ କରାଯାଇଛି ।