Salary Revision / ୧ ଜାନୁଆରୀ ୨୦୨୬ରୁ ମିଳିବ କି ଏରିଅର୍ ? ୮ମ ବେତନ ଆୟୋଗର ବଡ଼ ଖବର

୮ମ ବେତନ ଆୟୋଗ (8th Pay Commission)କୁ ନେଇ କେନ୍ଦ୍ରୀୟ କର୍ମଚାରୀ ଓ ପେନ୍‌ସନଭୋଗୀଙ୍କ ମଧ୍ୟରେ ଉତ୍ସାହ ବଢ଼ିବାରେ ଲାଗିଛି । କର୍ମଚାରୀ ସଂଘ, ଶ୍ରମିକ ସଂଗଠନ, ପେନ୍‌ସନଭୋଗୀ ସଂଗଠନ ଏବଂ ଅନ୍ୟ ହିତାଧିକାରୀଙ୍କ ସହ ଆଲୋଚନା କରି ଆୟୋଗ ପକ୍ଷରୁ ମତାମତ ଓ ପ୍ରସ୍ତାବ ସଂଗ୍ରହ କରାଯାଉଛି । ଏହି ପ୍ରକ୍ରିୟା ଏବେ ଆହୁରି ଜୋରଦାର ହେଉଛି ।

ପ୍ରାୟ ୧ କୋଟିରୁ ଅଧିକ କେନ୍ଦ୍ରୀୟ କର୍ମଚାରୀ ଓ ପେନ୍‌ସନଭୋଗୀ ଏହି ଆୟୋଗର ସୁପାରିସରୁ ଉପକୃତ ହୋଇପାରନ୍ତି । ଏହା ମଧ୍ୟରେ ଅକ୍ଟୋବର ମାସରେ ହେବାକୁ ଥିବା ବୈଠକକୁ ନେଇ ବିଶେଷ ଚର୍ଚ୍ଚା ହେଉଛି। ଦଶହରା ପରେ ଅକ୍ଟୋବର ୨୨ ଓ ୨୩ ତାରିଖରେ ମୁମ୍ବାଇରେ ହିତାଧିକାରୀଙ୍କ ସହ ଆଲୋଚନା ହେବାର କାର୍ଯ୍ୟକ୍ରମ ରହିଛି ।

କେବେ ରିପୋର୍ଟ ଦାଖଲ କରିବ ୮ମ ବେତନ ଆୟୋଗ ?
୮ମ ବେତନ ଆୟୋଗ କେବେଠାରୁ ଲାଗୁ ହେବ, ସେନେଇ ଏପର୍ଯ୍ୟନ୍ତ ସ୍ପଷ୍ଟ ଚିତ୍ର ସାମ୍ନାକୁ ଆସିନାହିଁ । ତେବେ ଆୟୋଗକୁ ନିଜର ସୁପାରିସ ପ୍ରସ୍ତୁତ କରିବା ପାଇଁ ୧୮ ମାସ ସମୟ ଦିଆଯାଇଥିବା ସୂଚନା ରହିଛି । ଦିଆଯାଇଥିବା ଖବର ଅନୁଯାୟୀ, ୮ମ ବେତନ ଆୟୋଗର ଗଠନ ୩ ନଭେମ୍ବର ୨୦୨୫ରେ ହୋଇଥିଲା । ଏହି ହିସାବରେ ଆୟୋଗ ୩ ମେ ୨୦୨୭ ସୁଦ୍ଧା ନିଜର ଔପଚାରିକ ରିପୋର୍ଟ ଦାଖଲ କରିବାର ସମ୍ଭାବନା ରହିଛି ।

ତେବେ ରିପୋର୍ଟ ଦାଖଲ ହେବା ପରେ ମଧ୍ୟ ନୂଆ ବେତନ ବ୍ୟବସ୍ଥା ଲାଗୁ ହେବାକୁ ଆଉ ଦୁଇରୁ ତିନି ବର୍ଷ ସମୟ ଲାଗିପାରେ ବୋଲି ଆକଳନ କରାଯାଉଛି । ଏହା ଏକ ସମ୍ଭାବନା ମାତ୍ର; ଚୂଡ଼ାନ୍ତ ତାରିଖ ସରକାରୀ ନିଷ୍ପତ୍ତି ପରେ ହିଁ ସ୍ପଷ୍ଟ ହେବ ।

କିଏ ନେଉଛନ୍ତି ୮ମ ବେତନ ଆୟୋଗର ନିଷ୍ପତ୍ତି ?
୮ମ ବେତନ ଆୟୋଗର ଅଧ୍ୟକ୍ଷତା ପୂର୍ବତନ ସୁପ୍ରିମକୋର୍ଟ ବିଚାରପତି ରଞ୍ଜନା ପ୍ରକାଶ ଦେଶାଇ କରୁଛନ୍ତି । ଏହି ଆୟୋଗରେ ପୂର୍ବତନ ଆଇଏଏସ୍ ଅଧିକାରୀ ପଙ୍କଜ ଜୈନ ସଦସ୍ୟ-ସଚିବ ଥିବାବେଳେ ଅର୍ଥନୀତି ପ୍ରଫେସର ତଥା ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦର ସଦସ୍ୟ ପ୍ରଫେସର ପୁଲକ ଘୋଷ ମଧ୍ୟ ସଦସ୍ୟ ଅଛନ୍ତି ।

ଆୟୋଗ ବିଭିନ୍ନ କର୍ମଚାରୀ ସଂଘ, ଶ୍ରମିକ ସଂଗଠନ, ମନ୍ତ୍ରଣାଳୟ ଏବଂ ପେନ୍‌ସନଭୋଗୀ ସଂଗଠନଗୁଡ଼ିକଠାରୁ ପ୍ରସ୍ତାବ ଗ୍ରହଣ କରୁଛି । ଏହି ପ୍ରସ୍ତାବଗୁଡ଼ିକର ବିଶ୍ଳେଷଣ ପରେ ଦରମା ଢାଞ୍ଚା, ଭତ୍ତା ଏବଂ ପେନ୍‌ସନ ନିର୍ଦ୍ଧାରଣ ସମ୍ପର୍କରେ ସୁପାରିସ ପ୍ରସ୍ତୁତ କରାଯିବ ।

ମୁମ୍ବାଇରେ ଅକ୍ଟୋବର ୨୨-୨୩ରେ ବୈଠକ
୮ମ ବେତନ ଆୟୋଗ ପକ୍ଷରୁ ହିତାଧିକାରୀଙ୍କ ସହ ଆଲୋଚନା ପାଇଁ ମାର୍ଚ୍ଚ ମାସରୁ ବୈଠକ ଚାଲିଛି । ଅକ୍ଟୋବର ମାସରେ ମଧ୍ୟ ଏହି ପ୍ରକ୍ରିୟା ଜାରି ରହିଛି । ଏବେ ଆସନ୍ତା ଅକ୍ଟୋବର ୨୨ ଓ ୨୩ ତାରିଖରେ ମୁମ୍ବାଇରେ ବୈଠକ ହେବାର କାର୍ଯ୍ୟକ୍ରମ ରହିଛି । ଏଥିରେ କର୍ମଚାରୀଙ୍କ ଦରମା, ପେନ୍‌ସନ ଏବଂ ବିଭିନ୍ନ ଭତ୍ତା ସମ୍ପର୍କରେ ଆଲୋଚନା ହୋଇପାରେ । ଏହା ପୂର୍ବରୁ ବେଙ୍ଗାଲୁରୁରେ ମଧ୍ୟ ଆଲୋଚନା ବୈଠକ ଅନୁଷ୍ଠିତ ହୋଇସାରିଛି ।

୧ ଜାନୁଆରୀ ୨୦୨୬ରୁ ବଢ଼ିବ କି ଦରମା ?
୮ମ ବେତନ ଆୟୋଗ ଲାଗୁ ହେଲେ ପ୍ରାୟ ୧ କୋଟିରୁ ଅଧିକ କର୍ମଚାରୀ ଓ ପେନ୍‌ସନଭୋଗୀ ଉପକୃତ ହୋଇପାରନ୍ତି । ଏଥିରେ ପ୍ରାୟ ୫୦ ଲକ୍ଷ କେନ୍ଦ୍ରୀୟ କର୍ମଚାରୀଙ୍କ ସହ ପ୍ରତିରକ୍ଷା ଓ ରେଳବାଇ ସମେତ ବିଭିନ୍ନ ବିଭାଗର ପ୍ରାୟ ୬୯ ଲକ୍ଷ ପେନ୍‌ସନଭୋଗୀଙ୍କୁ ମିଶାଇ ହିସାବ କରାଯାଉଛି ।

ପୂର୍ବରୁ ବେତନ ଆୟୋଗଗୁଡ଼ିକ ମଧ୍ୟରେ ସାଧାରଣତଃ ପ୍ରାୟ ୧୦ ବର୍ଷର ବ୍ୟବଧାନ ରହିଥିବାରୁ ୮ମ ବେତନ ଆୟୋଗର ସୁପାରିସ ୧ ଜାନୁଆରୀ ୨୦୨୬ରୁ ପ୍ରଭାବୀ ହେବା ନେଇ ଆଶା କରାଯାଉଛି । କିନ୍ତୁ ନୂଆ ଦରମା କେବେଠାରୁ ପ୍ରକୃତରେ ଲାଗୁ ହେବ ଏବଂ ପୂର୍ବ ତାରିଖରୁ ଲାଗୁ ହେଲେ କେତେ ଟଙ୍କାର ଏରିୟର୍ ମିଳିବ, ସେନେଇ ଏପର୍ଯ୍ୟନ୍ତ ଚୂଡ଼ାନ୍ତ ନିଷ୍ପତ୍ତି ହୋଇନାହିଁ ।

ଫିଟମେଣ୍ଟ ଫ୍ୟାକ୍ଟର ୩.୮୩୩ ହେଲେ ଦରମା ବଢ଼ିବ ୫୦,୯୪୦ ଟଙ୍କା !
୮ମ ବେତନ ଆୟୋଗକୁ ନେଇ କର୍ମଚାରୀ ସଂଘଗୁଡ଼ିକର ଏକ ପ୍ରମୁଖ ଦାବି ହେଉଛି ଫିଟମେଣ୍ଟ ଫ୍ୟାକ୍ଟର ବୃଦ୍ଧି । ସପ୍ତମ ବେତନ ଆୟୋଗରେ ଏହି ଫ୍ୟାକ୍ଟର ୨.୫୭ ଥିବାବେଳେ ଏହାକୁ ୩.୮୩୩ କରିବାକୁ ଦାବି ହେଉଥିବା ସୂଚନା ରହିଛି । ଫିଟମେଣ୍ଟ ଫ୍ୟାକ୍ଟର ହେଉଛି ଏକ ଗୁଣକ, ଯାହାକୁ ବର୍ତ୍ତମାନର ମୂଳ ଦରମା ସହ ଗୁଣନ କରି ନୂଆ ମୂଳ ଦରମାର ହିସାବ କରାଯାଏ ।

ଉଦାହରଣ ସ୍ୱରୂପ:
- ବର୍ତ୍ତମାନର ଲେଭଲ୍-୧ ମୂଳ ଦରମା: ୧୮,୦୦୦
- ପ୍ରସ୍ତାବିତ ଫିଟମେଣ୍ଟ ଫ୍ୟାକ୍ଟର: ୩.୮୩୩
- ହିସାବ ଅନୁଯାୟୀ ନୂଆ ମୂଳ ଦରମା: ୬୮,୯୯୪
ଅର୍ଥାତ୍, ଏହି ଫିଟମେଣ୍ଟ ଫ୍ୟାକ୍ଟରକୁ ଯଦି ଗ୍ରହଣ କରାଯାଏ, ତେବେ ଉଦାହରଣରେ ଲେଭଲ୍-୧ କର୍ମଚାରୀଙ୍କ ମୂଳ ଦରମା ପ୍ରାୟ ୫୦,୯୯୪ ବଢ଼ିପାରେ ।
ତେବେ ଏଠାରେ ଗୋଟିଏ କଥା ମନେ ରଖିବା ଜରୁରୀ ଏହା କେବଳ ପ୍ରସ୍ତାବିତ ଫିଟମେଣ୍ଟ ଫ୍ୟାକ୍ଟର ଆଧାରରେ କରାଯାଇଥିବା ଗାଣିତିକ ହିସାବ । ସରକାର ଏହାକୁ ଗ୍ରହଣ କରିଛନ୍ତି ବୋଲି ଅର୍ଥ ନୁହେଁ । ନୂଆ ଦରମା, ଭତ୍ତା ଏବଂ ପେନ୍‌ସନ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ଆୟୋଗର ସୁପାରିସ ଓ ସରକାରୀ ଅନୁମୋଦନ ପରେ ହିଁ ସ୍ପଷ୍ଟ ହେବ ।

୮ମ ବେତନ ଆୟୋଗକୁ ନେଇ କର୍ମଚାରୀଙ୍କ ଆଶା ବଢ଼ିଥିଲେ ମଧ୍ୟ, ଫିଟମେଣ୍ଟ ଫ୍ୟାକ୍ଟର ୩.୮୩୩ ଏବଂ ୫୧ ହଜାର ଟଙ୍କା ପର୍ଯ୍ୟନ୍ତ ଦରମା ବୃଦ୍ଧି ଏବେ ଦାବି ଓ ଆକଳନ ଉପରେ ଆଧାରିତ । ଚୂଡ଼ାନ୍ତ ଘୋଷଣା ନ ହେବା ପର୍ଯ୍ୟନ୍ତ ଏହାକୁ ନିଶ୍ଚିତ ବୃଦ୍ଧି ଭାବେ ଧରିବା ଉଚିତ୍ ନୁହେଁ ।