ଦେଶର ସବୁଠୁ ବଡ଼ କାର୍ ନିର୍ମାତା ମାରୁତି ସୁଜୁକି ତାର ଭେଇକିଲ୍ ପୋର୍ଟଫୋଲିଓରେ ସୁରକ୍ଷାକୁ ନେଇ ବଡ଼ ଅପଡେଟ୍ ଦେଇଛି । କମ୍ପାନୀ ତାର ସବୁଠୁ ଶସ୍ତା କାର ଅଲଟୋ କେ୧୦ (Alto K10)ରେ ଦେଇଛି ୬ଟି ଏୟାରବ୍ୟାଗ । ଅର୍ଥାତ୍ ଏଣିକି ଅଲଟୋ କେ୧୦ର ସମସ୍ତ ଭ୍ୟାରିଆଣ୍ଟ ୬ଟି ଏୟାରବ୍ୟାଗ୍ ସହ ଆସିବ ।

ମାରୁତି ସୁଜୁକିର ଅଲଟୋ କେ୧୦ରେ ଏହି ନୂଆ ପରିବର୍ତ୍ତନ ସହ ସମସ୍ତ ଭ୍ୟାରିଆଣ୍ଟର ମୂଲ୍ୟରେ ପରିବର୍ତ୍ତନ ଦେଖିବାକୁ ମିଳିଛି । ପୂର୍ବାପେକ୍ଷା ବଢ଼ିଛି ଅଲଟୋ କେ୧୦ର ଦାମ୍ । ମୂଲ୍ୟ ବୃଦ୍ଧି ପରେ ବି ଏହି କାର୍‌ର ବେସ୍ ଭ୍ୟାରିଆଣ୍ଟ ମୂଲ୍ୟ ୪ ଲକ୍ଷ ୨୩ ହଜାର (ଏକ୍ସ-ଶୋରୁମ୍) ରହିଛି ।

ଅଲଟୋ କେ୧୦ର ସେଫ୍ଟି ଫିଚର୍ ଛଡ଼ା ଅନ୍ୟ କେଉଁଥିରେ ବଡ଼ ପରିବର୍ତ୍ତନ କରି ନାହିଁ ମାରୁତି । ଏହି କାର୍ ପୂର୍ବ ଭଳି ପେଟ୍ରୋଲ୍ ଇଞ୍ଜିନ୍ ଓ ସିଏନ୍‌ଜି ଭ୍ୟାରିଆଣ୍ଟରେ ଉପଲବ୍ଧ ହେବ । କିନ୍ତୁ ନୂଆ ଅପଡେଟ୍ ପରେ ଏହାର ମୂଲ୍ୟ ପାଖାପାଖି ୧୬ ହଜାର ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଥିବା ଦେଖିବାକୁ ମିଳିଛି । କମ୍ପାନୀ ଭ୍ୟାରିଆଣ୍ଟର ନାଁରୁ (O) ପ୍ରିଫିକ୍ସ ହଟାଇ ଦେଇଛି ।

ମାରୁତିର ଅଲଟୋ କେ୧୦ ପୂର୍ବ ଭଳି ୧.୦ ଲିଟର ପେଟ୍ରୋଲ୍ ଇଞ୍ଜିନ୍ ସହ ଆସିବ । ଏହି ଇଞ୍ଜିନ୍‌ର ପାୱାର ୬୭ ପିଏସ୍ ଓ ୮୯ ଏନ୍ଏମ୍ ଟର୍କ ଜେନରେଟ୍ କରିବ । ସେହିଭଳି ସିଏନ୍‌ଜି ଭ୍ୟାରିଆଣ୍ଟରେ ଇଞ୍ଜିନ୍ ୫୭ ପିଏସ୍ ପାୱାର ଓ ୮୨ ଏନ୍ଏମ୍ ଟର୍କ ଜେନରେଟ୍ କରେ । ଏହି ଇଞ୍ଜିନ୍‌କୁ ୫-ସ୍ପିଡ୍ ମାନୁଆଲ୍ ଓ ଅଟୋମେଟିକ୍ ଗିୟରବକ୍ସ ସହ ସଂଯୋଗ କରାଯାଇଛି ।

କାର୍ ମାଇଲେଜ୍

ମାରୁତିର ଦାବି ହେଉଛି, ୫-ସ୍ପିଡ୍ ପେଟ୍ରୋଲ ମାନୁଆଲ୍ ଟ୍ରାନ୍ସମିଶନ ଭ୍ୟାରିଆଣ୍ଟ ୨୪.୩୮ କିମି ପ୍ରତି ଲିଟର ମାଇଲେଜ୍ ଦେଉଥିବା ବେଳେ ଅଟୋମେଟିକ୍ ଟ୍ରାନ୍ସମିଶନ ୨୪.୯୦ କିମି ପ୍ରତି ଲିଟର ମାଇଲେଜ୍ ଦିଏ । ସେହିଭଳି ଏହି କାର ସିଏନଜି ଭ୍ୟାରିଆଣ୍ଟ ୩୩.୮୬ କିମି ପ୍ରତି କିଲୋଗ୍ରାମରେ ମାଇଲଜେ ଦେବ । ତେବେ ସିଏନଜି ଭ୍ୟାରିଆଣ୍ଟ ଅଟୋମେଟିକ୍ ଟ୍ରାନ୍ସମିଶନରେ ଆସେ ନାହିଁ ।

ପୂର୍ବାପେକ୍ଷା ଅଲଟୋ କେ ୧୦ ଅଧିକ ସୁରକ୍ଷିତ ହୋଇଛି । ଏହି କାରରେ ୬ ଏୟାରବ୍ୟାଗ ସହ ରିୟର ପାର୍କିଂ ସେନସର, ପଛର ସମସ୍ତ ଯାତ୍ରୀଙ୍କ ଲାଗି ୩-ପଏଣ୍ଟ ସିଟ୍ ବେଲ୍ଟ, ଲଗେଜ-ରିଣ୍ଟେନସନ କ୍ରସବାର, ଇଲେକ୍ଟ୍ରୋନିକ ଷ୍ଟାବିଲିଟି ପ୍ରୋଗ୍ରାମ, ଆଣ୍ଟି-ଲକ୍ ବ୍ରେକିଂ ସିଷ୍ଟମ ଓ ଇଲେକ୍ଟ୍ରୋନିକ ବ୍ରେକ୍ ଫୋର୍ସ ଡିଷ୍ଟ୍ରିବ୍ୟୁସନ୍‌କୁ ସାମିଲ୍ କରାଯାଇଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV