Business Success / ସୁନା ଋଣ କଲା କୋଟିପତି, ଦୁଇଟି ପରିବାରର ବଦଳାଇଦେଲା ଭାଗ୍ୟ ... ଆଜି ବଡ଼ ବ୍ୟବସାୟ

ସୁନା ବିଶ୍ୱର ସବୁଠାରୁ ମୂଲ୍ୟବାନ ଆସେଟ୍‌ଗୁଡ଼ିକ ମଧ୍ୟରେ ଅନ୍ୟତମ । ଗତ କିଛି ଦିନ ଧରି ସୁନା ଦରରେ ରେକର୍ଡ ବୃଦ୍ଧି ଦେଖିବାକୁ ମିଳିଛି । କେବଳ ସୁନା ଦର ନୁହେଁ, ସୁନା ବଦଳରେ ଋଣ ଅର୍ଥାତ୍ Gold Loan ବ୍ୟବସାୟ ମଧ୍ୟ ଅନେକଙ୍କ ଭାଗ୍ୟ ବଦଳାଇଛି । ଏହାର ବଡ଼ ଉଦାହରଣ ହେଉଛନ୍ତି ଭାରତର ଦୁଇଟି ପରିବାର ମୁଥୁଟ୍ ଫାଇନାନ୍ସ ଓ ମଣପ୍ପୁରମ୍ ଫାଇନାନ୍ସ ପରିବାର । ଗୋଲ୍ଡ ଲୋନ୍ ବ୍ୟବସାୟକୁ ଏହି ଦୁଇ ପରିବାର ବିଶାଳ ଆର୍ଥିକ ସାମ୍ରାଜ୍ୟରେ ପରିଣତ କରିଛନ୍ତି ।

ବଢ଼ୁଥିବା ସୁନା ଚାହିଦା ଓ ଦରରୁ ବଡ଼ ଲାଭ
ଭାରତରେ ସୁନା ବନ୍ଧକ ରଖି ଋଣ ନେବାର ପରମ୍ପରା ବହୁ ପୁରୁଣା । କିନ୍ତୁ ସମୟ ସହିତ ଏହି ପାରମ୍ପରିକ ଉଧାର ବ୍ୟବସ୍ଥା ଏବେ ଏକ ବଡ଼ ସଂଗଠିତ ଋଣ ବ୍ୟବସାୟରେ ପରିଣତ ହୋଇଛି । ସୁନାର ବଢ଼ୁଥିବା ଚାହିଦା ଓ ଉଚ୍ଚ ଦରର ଫାଇଦା ନେଇ ମୁଥୁଟ୍ ଫାଇନାନ୍ସ ଓ ମଣପ୍ପୁରମ୍ ଫାଇନାନ୍ସ ଭଳି କମ୍ପାନୀଗୁଡ଼ିକ ଏହି କ୍ଷେତ୍ରରେ ବଡ଼ ସାମ୍ରାଜ୍ୟ ଗଢ଼ିଛନ୍ତି । ପାରମ୍ପରିକ ସ୍ୱର୍ଣ୍ଣ ଋଣକୁ ଏହି କମ୍ପାନୀଗୁଡ଼ିକ ଆଧୁନିକ ଓ ସଂଗଠିତ ଫାଇନାନ୍ସିଆଲ୍ ବିଜନେସ୍‌ରେ ପରିଣତ କରିଛନ୍ତି ।

Gold Loan ଦେଇ ଗଢ଼ିଲେ ଅରବ ଡଲାରର ସମ୍ପତ୍ତି
ବ୍ଲୁମ୍‌ବର୍ଗର ରିପୋର୍ଟ ଅନୁସାରେ, ମୁଥୁଟ୍ ଫାଇନାନ୍ସର ଜର୍ଜ ଆଲେକ୍ସାଣ୍ଡର ମୁଥୁଟ୍ ଓ ତାଙ୍କ ପରିବାରର ଆନୁମାନିକ ନେଟ୍‌ୱର୍ଥ ୯.୯ ବିଲିୟନ୍ ଡଲାର ରହିଛି । ସେହିପରି ମଣପ୍ପୁରମ୍ ଫାଇନାନ୍ସର ଚେୟାରମ୍ୟାନ୍ ଭି.ପି. ନନ୍ଦକୁମାରଙ୍କ ସମ୍ପତ୍ତି ପ୍ରାୟ ୧.୪ ବିଲିୟନ୍ ଡଲାର ବୋଲି ଆକଳନ କରାଯାଇଛି ।

କେରଳର କୋଚିରେ ମୁଖ୍ୟାଳୟ ଥିବା ମୁଥୁଟ୍ ଫାଇନାନ୍ସର ଗତ ବର୍ଷ ଡିସେମ୍ବର ସୁଦ୍ଧା ଦେଶରେ ୪,୯୭୦ଟି ଶାଖା ଥିଲା । ଅନ୍ୟପକ୍ଷରେ କେରଳର ତ୍ରିଶୁରରେ ମୁଖ୍ୟାଳୟ ଥିବା ମଣପ୍ପୁରମ୍ ଫାଇନାନ୍ସର ୫,୦୦୦ରୁ ଅଧିକ ଶାଖା ସକ୍ରିୟ ରହିଛି ।

ମୁଥୁଟ୍ ପରିବାରର Gold Loan ସାମ୍ରାଜ୍ୟର କାହାଣୀ
ମୁଥୁଟ୍ ପରିବାରର ବ୍ୟବସାୟ ଯାତ୍ରା ୧୮୮୭ ମସିହାରୁ ଆରମ୍ଭ ହୋଇଥିଲା । କିନ୍ତୁ ସେତେବେଳେ ଏହା ଗୋଲ୍ଡ ଲୋନ୍ ବ୍ୟବସାୟ ନଥିଲା । ମୁଥୁଟ୍ ନୀନାନ୍ ମଥାଇ କେରଳରେ ଏକ କିରାଣା ଦୋକାନ ଆରମ୍ଭ କରିଥିଲେ । ବ୍ୟବସାୟ ସଫଳ ହେବା ପରେ ସେ ଏହାକୁ ବିସ୍ତାର କରିଥିଲେ ।

ପରେ ଚିଟ୍‌ଫଣ୍ଡ ମାଧ୍ୟମରେ ବଗିଚା ଶ୍ରମିକ ଓ କୃଷକମାନଙ୍କୁ ଋଣ ଦେବା ଆରମ୍ଭ କରିଥିଲେ । ୧୯୩୯ ମସିହାରେ ମୁଥୁଟ୍ ପରିବାର ଗୋଲ୍ଡ ଲୋନ୍ ବ୍ୟବସାୟରେ ପ୍ରବେଶ କରିଥିଲା ।

ପ୍ରାୟ ଚାରି ଦଶନ୍ଧି ପରେ ବ୍ୟବସାୟକୁ ନୀନାନ୍ ମଥାଇଙ୍କ ତିନି ପୁଅଙ୍କ ମଧ୍ୟରେ ବାଣ୍ଟି ଦିଆଯାଇଥିଲା । ବଡ଼ ପୁଅ ମଥାଇ ଜର୍ଜ ମୁଥୁଟ୍ ଏକ ଋଣ ପ୍ରଦାନକାରୀ କମ୍ପାନୀ ସ୍ଥାପନ କରିଥିଲେ, ଯାହା ପରବର୍ତ୍ତୀ ସମୟରେ ମୁଥୁଟ୍ ଫାଇନାନ୍ସରେ ପରିଣତ ହୋଇଥିଲା ।

ବ୍ଲୁମ୍‌ବର୍ଗ ଅନୁସାରେ, ଆଜି ମୁଥୁଟ୍ ଫାଇନାନ୍ସ ଦେଶର ସବୁଠାରୁ ବଡ଼ ଗୋଲ୍ଡ ଲୋନ୍ କମ୍ପାନୀ ଏବଂ ଦେଶର ପଞ୍ଚମ ସବୁଠାରୁ ମୂଲ୍ୟବାନ ନନ୍-ବ୍ୟାଙ୍କିଂ ଋଣଦାତା ଭାବେ ପରିଚିତ। କମ୍ପାନୀ ପାଖରେ ପ୍ରାୟ ୨୧୦ ଟନ୍ ସୁନା ସୁରକ୍ଷିତ ବନ୍ଧକ ଭାବେ ରହିଛି । ଜୁନ୍ ସୁଦ୍ଧା କମ୍ପାନୀର ଗୋଲ୍ଡ ଲୋନ୍ ବ୍ୟବସାୟ ପ୍ରାୟ ଚାରି ଗୁଣ ବଢ଼ି ୧୮.୫ ବିଲିୟନ୍ ଡଲାରରେ ପହଞ୍ଚିଥିଲା ।

ଏଭଳି ବଢ଼ିଲା ମଣପ୍ପୁରମ୍‌ର ବ୍ୟବସାୟ
ମଣପ୍ପୁରମ୍ ଫାଇନାନ୍ସର ଚେୟାରମ୍ୟାନ୍ ଭି.ପି. ନନ୍ଦକୁମାରଙ୍କ ବ୍ୟବସାୟିକ ଯାତ୍ରା ମଧ୍ୟ ଏକ ପାରମ୍ପରିକ ଋଣ ବ୍ୟବସାୟରୁ ଆରମ୍ଭ ହୋଇଥିଲା । ୩୨ ବର୍ଷ ବୟସରେ ସେ କେରଳର ବଲାପଦରେ ତାଙ୍କ ବାପାଙ୍କ ଚାଲୁଥିବା ବନ୍ଧକ ରଖି ଟଙ୍କା ଦେବା ବ୍ୟବସାୟର ଦାୟିତ୍ୱ ନେଇଥିଲେ ।

୧୯୯୦ ଦଶକର ମଧ୍ୟଭାଗ ସୁଦ୍ଧା କମ୍ପାନୀ ଷ୍ଟକ୍ ଏକ୍ସଚେଞ୍ଜରେ ଲିଷ୍ଟ ହୋଇଯାଇଥିଲା । ଏହା ପରେ ନନ୍ଦକୁମାର ବ୍ୟବସାୟକୁ ବିସ୍ତାର କରି ଗୋଲ୍ଡ ଲୋନ୍‌ ଉପରେ ଅଧିକ ଗୁରୁତ୍ୱ ଦେଇଥିଲେ ।

୨୦୦୭ ମସିହାରେ ICRAର ଏକ ଆକଳନ ଅନୁସାରେ ଭାରତୀୟ ପରିବାରଗୁଡ଼ିକ ପାଖରେ ପ୍ରାୟ ୧୮,୦୦୦ରୁ ୨୫,୦୦୦ ଟନ୍ ସୁନା ଥିବା ଅନୁମାନ କରାଯାଇଥିଲା । ଏହି ବିଶାଳ ସୁନା ବଜାରର ସୁଯୋଗ ନେଇ ମଣପ୍ପୁରମ୍ ସିକୋଇଆ କ୍ୟାପିଟାଲ୍‌ରୁ ୧୪ ମିଲିୟନ୍ ଡଲାର ଅର୍ଥ ସଂଗ୍ରହ କରି ଗୋଲ୍ଡ ଲୋନ୍ ବ୍ୟବସାୟକୁ ଆହୁରି ବଢ଼ାଇଥିଲା ।

ଆଜି ମଣପ୍ପୁରମ୍ ଭାରତର ଦ୍ୱିତୀୟ ବୃହତ୍ତମ ଗୋଲ୍ଡ ଲୋନ୍ ପ୍ରଦାନକାରୀ । କମ୍ପାନୀର ପ୍ରାୟ ୩୦ ଲକ୍ଷ ଗ୍ରାହକ ରହିଥିବା ବେଳେ ଗୋଲ୍ଡ ଲୋନ୍ ଆସେଟ୍ ପ୍ରାୟ ୬ ବିଲିୟନ୍ ଡଲାର ବୋଲି କୁହାଯାଉଛି ।

କାହିଁକି ଏତେ ବଢ଼ିଛି Gold Loan ବ୍ୟବସାୟ ?
ମୁଥୁଟ୍ ଓ ମଣପ୍ପୁରମ୍ ଦୁଇଟି କମ୍ପାନୀର ଯାତ୍ରା ଦର୍ଶାଉଛି ଯେ, ଶତାବ୍ଦୀ ପୁରୁଣା ବନ୍ଧକ ରଖି ଋଣ ନେବା ପ୍ରଥା କିପରି ଆଧୁନିକ ଫାଇନାନ୍ସିଆଲ୍ ସର୍ଭିସ୍‌ରେ ପରିଣତ ହୋଇଛି । ଗୋଲ୍ଡ ଲୋନ୍‌ରୁ ବଡ଼ ସାମ୍ରାଜ୍ୟ ଗଢ଼ିବା ପରେ ଉଭୟ କମ୍ପାନୀ ଅନ୍ୟ ଆର୍ଥିକ କ୍ଷେତ୍ରରେ ମଧ୍ୟ ବ୍ୟବସାୟ ବିସ୍ତାର କରିଛନ୍ତି । ମଣପ୍ପୁରମ୍ ମାଇକ୍ରୋ ଫାଇନାନ୍ସ, ହୋମ୍ ଫାଇନାନ୍ସ, ବିଜନେସ୍ ଲୋନ୍ ଓ ଅଟୋ ଫାଇନାନ୍ସ ଭଳି କ୍ଷେତ୍ରରେ ପ୍ରବେଶ କରିଛି ।

ସେହିପରି ମୁଥୁଟ୍ ଫାଇନାନ୍ସ ମଧ୍ୟ ଗୋଲ୍ଡ ଲୋନ୍ ବାହାରେ ଅନେକ ଆର୍ଥିକ କ୍ଷେତ୍ରରେ ନିଜ ବ୍ୟବସାୟକୁ ବିସ୍ତାର କରିଛି । ଏହି କାରଣରୁ ସୁନାର ବଢ଼ୁଥିବା ମୂଲ୍ୟ ଓ ଗୋଲ୍ଡ ଲୋନ୍‌ର ବଢ଼ୁଥିବା ଚାହିଦା ଦୁଇ ପରିବାର ପାଇଁ ବିଶାଳ ସମ୍ପତ୍ତି ସୃଷ୍ଟିର ଏକ ବଡ଼ ମାଧ୍ୟମ ପାଲଟିଛି ।