ନୂଆଦିଲ୍ଲୀ: GST କାଉନସିଲ୍ ବୈଠକରେ ବଡ଼ ନିଷ୍ପତ୍ତି । ବନ୍ଦ ହେବ ୧୨ ଓ ୨୮ ପ୍ରତିଶତ ଟିକସ ସ୍ଲାବ । ଜନସାଧାରଣଙ୍କୁ ବଡ଼ ଆଶ୍ଵସ୍ତି । ବଦଳିଲା GST ଟିକସ ସ୍ଲାବ । ଲୋକ କୌଣସି ସାମଗ୍ରୀ କିଣିଲେ ଦେବାକୁ ପଡ଼ିବ କମ୍ ଟଙ୍କା । ଜିଏସ୍‌ଟିର ପରିବର୍ତ୍ତିତ ସ୍ଲାବ ସେପ୍ଟେମ୍ବର ୨୨ ତାରିଖରୁ ଲାଗୁ ହେବ । ସାରା ଦେଶରେ ୫ ଓ ୧୮ ପ୍ରତିଶତ ସ୍ଲାବ ଲାଗୁ ହେବ ବୋଲି ସୂଚନା ଦେଇଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ।

ଅର୍ଥାତ୍ GSTରେ ପୂର୍ବରୁ ଥିବା ୪ଟି ସ୍ଲାବ ବଦଳରେ ଏବେ ରହିବ ମାତ୍ର ୨ଟି ସ୍ଲାବ । ଜିଏସଟିରେ ଆସୁଥିବା ସମସ୍ତ ସାମଗ୍ରୀରେ ୫ ଓ ୧୮ ପ୍ରତିଶତ ଟିକସ ଲାଗୁ ହେବ । ଫଳରେ ଅନେକ ସାମଗ୍ରୀର ଦର କମିବ । ତେବେ ହାନିକାରକ ପଦାର୍ଥ ପାଇଁ ଏକ ଭିନ୍ନ ସ୍ଲାବ ରଖାଯାଇଛି, ଯାହାକି ୪୦ ପ୍ରତିଶତ ଅଟେ । ସ୍ଵାସ୍ଥ୍ୟ ପାଇଁ କ୍ଷତିକାରକ ତମ୍ବାଖୁ, ସିଗାରେଟ୍‍, କୋଲ୍ଡ ଡ୍ରିଙ୍କ୍ସ ଆଦି ପାଇଁ ୪୦ ପ୍ରତିଶତ ଜିଏସ୍‌ଟି ଦେବାକୁ ପଡ଼ିବ ।

କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, ଆମର ଫୋକସ୍ ଦେଶର ଜନସାଧାରଣଙ୍କ ଉପରେ । କୃଷକଙ୍କ ଠାରୁ ନେଇ ଶ୍ରମିକଙ୍କୁ ଧ୍ୟାନରେ ରଖି ଜିଏସଟି ସ୍ଲାବ ଖସାଇବାକୁ ଅନୁମୋଦନ କରାଯାଇଛି । ଏହି ନିଷ୍ପତ୍ତିକୁ ଜିଏସଟି କାଉନସିଲ୍ ବୈଠକରେ ସମସ୍ତ ରାଜ୍ୟର ଅର୍ଥମନ୍ତ୍ରୀ ସମର୍ଥନ ଦେଇଛନ୍ତି ।

GST ସ୍ଲାବ ପରିବର୍ତ୍ତନ ଫଳରେ କ୍ଷୀର, ପନୀର, ବ୍ରେଡ୍ ଆଦି ଶସ୍ତା ହେବ । ଏବେ ୧୨ ପ୍ରତିଶତ GST ସ୍ଲାବରେ ଆସୁଥିବା ୯୯ ପ୍ରତିଶତ ସାମଗ୍ରୀ ୫ ପ୍ରତିଶତ ଟିକସ ସ୍ଲାବକୁ ଖସି ଆସିବ । ସେହିଭଳି ୨୮ ପ୍ରତିଶତ ଟିକସ ସ୍ଲାବରେ ଥିବା ପ୍ରାୟ ୯୦ ପ୍ରତିଶତ ସାମଗ୍ରୀ ୧୮ ପ୍ରତିଶତ ସ୍ଲାବକୁ ଆସିଯିବ ।