PF Balance / ଆଉ ଦୌଡ଼ିବାକୁ ପଡ଼ିବନି EPFO ଅଫିସ୍... WhatsAppରେ ଚେକ୍ କରନ୍ତୁ PF ବାଲାନ୍ସ

ଯଦି ଆପଣଙ୍କର ମଧ୍ୟ କୌଣସି ପୁରୁଣା କମ୍ପାନୀରେ PF ଟଙ୍କା ଅଟକି ରହିଛି, ତେବେ ଏହି ଖବର ଆପଣଙ୍କ ପାଇଁ ବେଶ୍ ଗୁରୁତ୍ୱପୂର୍ଣ୍ଣ । ଆଜି ୧ ନଭେମ୍ବର ୨୦୨୬ରେ EPFO ନିଜର ୭୪ତମ ପ୍ରତିଷ୍ଠା ଦିବସ ପାଳନ କରୁଛି । ଏହି ଅବସରରେ କେନ୍ଦ୍ରମନ୍ତ୍ରୀ ଡାକ୍ତର ମନସୁଖ ମାଣ୍ଡଭିୟ କୋଟି କୋଟି ଚାକିରିଆଙ୍କ ପାଇଁ ଦୁଇଟି ବଡ଼ ଡିଜିଟାଲ୍ ସୁବିଧା ଆରମ୍ଭ କରିଥିବା ଖବର ସାମ୍ନାକୁ ଆସିଛି ।

ପ୍ରଥମ ସୁବିଧା ଅନୁସାରେ, ଏବେ WhatsApp ଜରିଆରେ EPFOର ବିଭିନ୍ନ ସେବା ମିଳିବ। ଦ୍ୱିତୀୟ ସୁବିଧା ହେଉଛି, ୧୦୦୦ ଟଙ୍କା କିମ୍ବା ତା'ଠାରୁ କମ୍ ଟଙ୍କା ଥିବା ନିଷ୍କ୍ରିୟ PF ଖାତାର ଅଟୋମେଟିକ୍ ସେଟେଲମେଣ୍ଟ କରାଯିବ ।

ଏବେ WhatsAppରେ ମିଳିବ EPFOର ସେବା
PF ସମ୍ବନ୍ଧୀୟ କାମ ପାଇଁ ଆଉ EPFO କାର୍ଯ୍ୟାଳୟକୁ ବାରମ୍ବାର ଦୌଡ଼ିବାକୁ ପଡ଼ିବ ନାହିଁ । ଏପରିକି UMANG ଆପ୍ ଖୋଲିବାର ଆବଶ୍ୟକତା ମଧ୍ୟ କମିଯିବ । ଏବେ WhatsApp ମାଧ୍ୟମରେ ଘରେ ବସି PF ସମ୍ବନ୍ଧୀୟ ଅନେକ କାମ କରିହେବ ।

ଏହି ସୁବିଧା ଜରିଆରେ ଗ୍ରାହକମାନେ:
- WhatsAppରେ Hi ଲେଖି PF ବାଲାନ୍ସ ଯାଞ୍ଚ କରିପାରିବେ ।
- ନିଜର EPF ପାସ୍‌ବୁକ୍ ଡାଉନଲୋଡ୍ କରିପାରିବେ ।
- UAN ଆକ୍ଟିଭ୍ ଅଛି କି ନାହିଁ ଜାଣିପାରିବେ ।
- e-KYC ଷ୍ଟାଟସ୍ ଯାଞ୍ଚ କରିପାରିବେ ।
- PF କ୍ଲେମ୍‌ର ଷ୍ଟାଟସ୍ ଜାଣିପାରିବେ ।

ତେବେ ଏହି ସେବାର ଲାଭ ପାଇବା ପାଇଁ ଆପଣଙ୍କ WhatsApp ନମ୍ବର UAN ସହିତ ଲିଙ୍କ୍ ହୋଇଥିବା ଆବଶ୍ୟକ । EPFO ପକ୍ଷରୁ ଖୁବଶୀଘ୍ର ଏହାର ଅଧିକାରିକ WhatsApp ନମ୍ବର ଜାରି କରାଯିବ ।

୧୦୦୦ ପର୍ଯ୍ୟନ୍ତ ଥିବା ପୁରୁଣା PF ଖାତାର ଟଙ୍କା ହେବ ଅଟୋମେଟିକ୍ ସେଟେଲମେଣ୍ଟ
ଦ୍ୱିତୀୟ ବଡ଼ ଘୋଷଣାଟି ହେଉଛି ନିଷ୍କ୍ରିୟ PF ଖାତା ସମ୍ପର୍କରେ । ଅନେକ କର୍ମଚାରୀ ଚାକିରି ବଦଳାଇବା ପରେ ପୁରୁଣା PF ଖାତାରେ ୫୦୦ କିମ୍ବା ୧୦୦୦ ଟଙ୍କା ଛାଡ଼ି ଦେଇଥାନ୍ତି । ଏହି ଟଙ୍କା ଉଠାଇବା ପାଇଁ ଅନେକେ ଆଉ ଦାବି ମଧ୍ୟ କରନ୍ତି ନାହିଁ । ଏବେ EPFO ଏଭଳି ଯୋଗ୍ୟ ନିଷ୍କ୍ରିୟ PF ଖାତାଗୁଡ଼ିକର ଟଙ୍କା ନିଜେ ନିଜେ ସେଟେଲମେଣ୍ଟ କରିବାର ବ୍ୟବସ୍ଥା କରିବ । ଏଥିପାଇଁ କର୍ମଚାରୀଙ୍କୁ ଅଲଗା ଭାବେ କ୍ଲେମ୍ କରିବାକୁ ପଡ଼ିବ ନାହିଁ । ଏହି ଟଙ୍କା ସିଧାସଳଖ ଆପଣଙ୍କ ଲିଙ୍କ୍ ହୋଇଥିବା ବ୍ୟାଙ୍କ ଖାତାକୁ କିମ୍ବା ଚାଲୁଥିବା PF ଖାତାକୁ ପଠାଯିବ ।

କୋଟି କୋଟି କର୍ମଚାରୀଙ୍କୁ ମିଳିବ ଆଶ୍ୱସ୍ତି
EPFOର ଏହି ଦୁଇଟି ନୂଆ ଡିଜିଟାଲ୍ ସୁବିଧା ଆରମ୍ଭ ହେବା ଫଳରେ କର୍ମଚାରୀମାନଙ୍କୁ PF ସମ୍ବନ୍ଧୀୟ କାମ ପାଇଁ ଆଉ ବାରମ୍ବାର କାର୍ଯ୍ୟାଳୟ ଯିବାକୁ ପଡ଼ିବ ନାହିଁ। WhatsApp ମାଧ୍ୟମରେ ଅନେକ ସେବା ସହଜରେ ମିଳିପାରିବ । ଅନ୍ୟପଟେ, ବର୍ଷ ବର୍ଷ ଧରି ପୁରୁଣା ଖାତାରେ ପଡ଼ି ରହିଥିବା ଛୋଟ ଛୋଟ ରାଶି ମଧ୍ୟ ଫେରିପାଇବାର ସୁଯୋଗ ମିଳିବ ।

ତେବେ EPFOର ଅଧିକାରିକ WhatsApp ନମ୍ବର ଜାରି ହେବା ପରେ ହିଁ ଏହି ସେବାର ବ୍ୟବହାର କରିହେବ । ତେଣୁ କୌଣସି ଅଜଣା WhatsApp ନମ୍ବରକୁ PF ସମ୍ବନ୍ଧୀୟ ତଥ୍ୟ, OTP କିମ୍ବା ବ୍ୟାଙ୍କ ବିବରଣୀ ଦିଅନ୍ତୁ ନାହିଁ ।