LIC Pension Plan / LICର ଏହି ଯୋଜନାରେ ୧୦ ଲକ୍ଷ ଟଙ୍କା ନିବେଶ କଲେ ମାସକୁ ମିଳିବ ୭,୦୮୩ ଟଙ୍କା

ଚାକିରିରୁ ଅବସର ନେବା ପରେ ନିୟମିତ ଆୟର ଆବଶ୍ୟକତା ରହିଥାଏ । ବିଶେଷକରି ବୃଦ୍ଧାବସ୍ଥାରେ ଆର୍ଥିକ ଚିନ୍ତା ଦୂର କରିବା ପାଇଁ ଆଗୁଆ ଯୋଜନା କରିବା ଜରୁରୀ । ଏଥିପାଇଁ ସରକାରଙ୍କ ପକ୍ଷରୁ ବିଭିନ୍ନ ପେନସନ୍ ଯୋଜନା ରହିଛି । ସେହିପରି ଭାରତୀୟ ଜୀବନ ବୀମା ନିଗମ (LIC) ମଧ୍ୟ ଏକ ସ୍ୱତନ୍ତ୍ର ପେନସନ୍ ଯୋଜନା ଆରମ୍ଭ କରିଛି । ଏହାର ନାମ ହେଉଛି LIC Smart Pension Plan । ଏହି ଯୋଜନାରେ ଥରେ ଟଙ୍କା ନିବେଶ କରି ଜୀବନସାରା ପେନସନ୍ ପାଇବାର ସୁଯୋଗ ରହିଛି ।

କ'ଣ ଏହି LIC Smart Pension Plan ?
ଏହା ଏକ ଇମିଡିଏଟ୍ ଆନୁଇଟି (Immediate Annuity) ଯୋଜନା । ଅର୍ଥାତ୍ ଏଥିରେ ପ୍ରତି ମାସରେ ପ୍ରିମିୟମ୍ ଦେବାକୁ ପଡ଼ିନଥାଏ । ବରଂ ଗୋଟିଏ ଥରରେ ନିର୍ଦ୍ଦିଷ୍ଟ ରାଶି ଜମା କରିବାକୁ ହୁଏ । ଏହାପରେ ନିଜ ପସନ୍ଦ ଅନୁଯାୟୀ ମାସିକ, ତ୍ରୈମାସିକ, ଅର୍ଦ୍ଧବାର୍ଷିକ କିମ୍ବା ବାର୍ଷିକ ଭାବେ ପେନସନ୍ ପାଇପାରିବେ ।

୧୦ ଲକ୍ଷ ଟଙ୍କା ନିବେଶରେ କେତେ ମିଳିବ ପେନସନ୍ ?
LICର ଦିଆଯାଇଥିବା ଉଦାହରଣ ଅନୁସାରେ, ୬୦ ବର୍ଷ ବୟସର ଜଣେ ବ୍ୟକ୍ତି ଏହି ଯୋଜନାରେ ୧୦ ଲକ୍ଷ ଟଙ୍କା ନିବେଶ କଲେ ବିଭିନ୍ନ ବିକଳ୍ପ ଅନୁଯାୟୀ ପେନସନ୍ ପାଇପାରିବେ । ବିଭିନ୍ନ ପେନସନ୍ ବିକଳ୍ପ ଅନୁଯାୟୀ ବାର୍ଷିକ ଓ ମାସିକ ପେନସନ୍ ରାଶି ଏହିପରି ରହିଛି ।

ପେନସନ୍ ବିକଳ୍ପ - ବାର୍ଷିକ ପେନସନ୍ - ମାସିକ ପେନସନ୍
ଅପ୍ସନ୍ A (ଜୀବନସାରା)-୮୫,୦୦୦-୭,୦୮୩
B1 (୫ ବର୍ଷ ଗ୍ୟାରେଣ୍ଟି)-୮୪,୫୦୦-୭,୦୪୨
B2 (୧୦ ବର୍ଷ ଗ୍ୟାରେଣ୍ଟି)-୮୩,୨୦୦-୬,୯୩୩
B3 (୧୫ ବର୍ଷ ଗ୍ୟାରେଣ୍ଟି)-୮୧,୪୦୦-୬,୭୮୩
B4 (୨୦ ବର୍ଷ ଗ୍ୟାରେଣ୍ଟି)-୭୯,୨୦୦-୬,୬୦୦
ଅର୍ଥାତ୍ ୧୦ ଲକ୍ଷ ଟଙ୍କା ନିବେଶ କରି ଜୀବନସାରା ପେନସନ୍ ବିକଳ୍ପ ବାଛିଲେ ମାସକୁ ପ୍ରାୟ ୭,୦୮୩ ଟଙ୍କା ପେନସନ୍ ମିଳିପାରିବ ।

କିଏ କରିପାରିବେ ନିବେଶ ?
ଏହି ଯୋଜନାରେ ନିବେଶ କରିବା ପାଇଁ ସର୍ବନିମ୍ନ ରାଶି ୧ ଲକ୍ଷ ଟଙ୍କା ରହିଛି । ୧୮ ବର୍ଷ ବୟସର ଯେକୌଣସି ବ୍ୟକ୍ତି ଏଥିରେ ନିବେଶ କରିପାରିବେ । ପେନସନ୍ ବିକଳ୍ପ ଅନୁସାରେ ସର୍ବାଧିକ ବୟସ ସୀମା ଭିନ୍ନ ଭିନ୍ନ ରହିଛି । ଭାରତୀୟ ନାଗରିକମାନେ ଏହି ଯୋଜନାରେ ନିବେଶ କରିବାର ସୁଯୋଗ ପାଇପାରିବେ ।

ତେବେ ମନେ ରଖନ୍ତୁ ଏଠାରେ ଦିଆଯାଇଥିବା ପେନସନ୍ ରାଶି ଉଦାହରଣ । ପ୍ରକୃତ ପେନସନ୍ ନିବେଶକଙ୍କ ବୟସ, ଚୟନ କରାଯାଇଥିବା ବିକଳ୍ପ ଓ LICର ପ୍ରଯୁଜ୍ୟ ନିୟମ ଅନୁସାରେ ଭିନ୍ନ ହୋଇପାରେ । ନିବେଶ ପୂର୍ବରୁ LICର ଅଫିସିଆଲ୍ ପଲିସି ଡକ୍ୟୁମେଣ୍ଟ ଯାଞ୍ଚ କରନ୍ତୁ ।