Gas Booking / LPG ଗ୍ରାହକଙ୍କୁ ବଡ଼ ଆଶ୍ୱସ୍ତି, ଏଣିକି ୪୫ ନୁହେଁ ୨୫ ଦିନରେ ବୁକ୍ ହେବ ଦ୍ୱିତୀୟ ସିଲିଣ୍ଡର

ଗ୍ରାମାଞ୍ଚଳର ଘରୋଇ LPG ଗ୍ରାହକଙ୍କ ପାଇଁ କେନ୍ଦ୍ର ସରକାର ବଡ଼ ଆଶ୍ୱସ୍ତି ଦେଇଛନ୍ତି । ଏଣିକି ଗାଁରେ ରହୁଥିବା ଲୋକଙ୍କୁ ଦ୍ୱିତୀୟ ଗ୍ୟାସ୍ ସିଲିଣ୍ଡର ବୁକ୍ କରିବା ପାଇଁ ୪୫ ଦିନ ଅପେକ୍ଷା କରିବାକୁ ପଡ଼ିବ ନାହିଁ । ସରକାର ଗ୍ରାମାଞ୍ଚଳରେ LPG ରିଫିଲ୍ ବୁକିଂର ସମୟସୀମାକୁ ୪୫ ଦିନରୁ କମାଇ ୨୫ ଦିନ କରିଛନ୍ତି । ଫଳରେ ଏବେ ସହର ଓ ଗ୍ରାମାଞ୍ଚଳ ପାଇଁ LPG ବୁକିଂ ନିୟମ ସମାନ ହୋଇଛି ।

କେନ୍ଦ୍ରମନ୍ତ୍ରୀ ଦେଲେ ସୂଚନା
କେନ୍ଦ୍ର ପେଟ୍ରୋଲିୟମ, ପ୍ରାକୃତିକ ଗ୍ୟାସ୍ ଓ ପର୍ଯ୍ୟଟନ ରାଷ୍ଟ୍ରମନ୍ତ୍ରୀ ସୁରେଶ ଗୋପୀ ସୋସିଆଲ ମିଡିଆ ମାଧ୍ୟମରେ ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି । ମନ୍ତ୍ରୀଙ୍କ ଅନୁସାରେ, ମଧ୍ୟପ୍ରାଚ୍ୟରେ ଚାଲିଥିବା ଟଣାଟଣି ଓ ସଂଘର୍ଷ କାରଣରୁ LPG ଯୋଗାଣ ଉପରେ ଚାପ ସୃଷ୍ଟି ହୋଇଥିଲା ।

ଯୋଗାଣ ସୀମିତ ଥିବା ସମୟରେ ଗ୍ୟାସ୍‌ର ଅଭାବ ରୋକିବା ପାଇଁ ସହରାଞ୍ଚଳରେ ଦ୍ୱିତୀୟ ସିଲିଣ୍ଡର ବୁକିଂ ପାଇଁ ୨୫ ଦିନ ଏବଂ ଗ୍ରାମାଞ୍ଚଳରେ ୪୫ ଦିନର ବ୍ୟବଧାନ ରଖାଯାଇଥିଲା ।

ସ୍ଥିତି ସୁଧୁରିବା ପରେ ହଟିଲା କଟକଣା
କେନ୍ଦ୍ରମନ୍ତ୍ରୀ କହିଛନ୍ତି ଯେ, ଏବେ ଦେଶରେ LPG ଯୋଗାଣ ସ୍ଥିତି ସ୍ୱାଭାବିକ ହେବା ସହିତ ଉନ୍ନତି ହୋଇଛି । ଏହା ସହିତ ପୂର୍ବରୁ ଥିବା ସିଲିଣ୍ଡର ବ୍ୟାକଲଗ୍ ମଧ୍ୟ ବହୁ ପରିମାଣରେ କମିଛି । ଏହାକୁ ଦୃଷ୍ଟିରେ ରଖି ଗ୍ରାମାଞ୍ଚଳରେ ଲାଗୁ ଥିବା ୪୫ ଦିନର କଟକଣାକୁ ହଟାଇ ଦିଆଯାଇଛି ।

ଏଣିକି ଦେଶର ଯେକୌଣସି ଘରୋଇ LPG ଗ୍ରାହକ ସେ ଗାଁରେ ରୁହନ୍ତୁ କିମ୍ବା ସହରରେ ପ୍ରଥମ ସିଲିଣ୍ଡର ପାଇବାର ୨୫ ଦିନ ପରେ ଦ୍ୱିତୀୟ ରିଫିଲ୍ ବୁକ୍ କରିପାରିବେ ।

ତେଲ କମ୍ପାନୀଙ୍କୁ ତୁରନ୍ତ ଲାଗୁ ପାଇଁ ନିର୍ଦ୍ଦେଶ
ପେଟ୍ରୋଲିୟମ ମନ୍ତ୍ରଣାଳୟ ସରକାରୀ ତେଲ ବିପଣନ କମ୍ପାନୀ (OMC)ଗୁଡ଼ିକୁ ଏହି ନିୟମ ତୁରନ୍ତ ଲାଗୁ କରିବାକୁ ନିର୍ଦ୍ଦେଶ ଦେଇଛି । ମନ୍ତ୍ରୀ ନିଜ ସୋସିଆଲ ମିଡିଆ ପୋଷ୍ଟରେ ମନ୍ତ୍ରଣାଳୟ ପକ୍ଷରୁ ଜାରି ହୋଇଥିବା ଚିଠି ମଧ୍ୟ ସେୟାର କରିଛନ୍ତି ।

ସରକାରଙ୍କ ଏହି ନିଷ୍ପତ୍ତି ଫଳରେ ବିଶେଷକରି ଗ୍ରାମାଞ୍ଚଳର ପରିବାର ଏବଂ ବଡ଼ ପରିବାରଗୁଡ଼ିକୁ ଆଶ୍ୱସ୍ତି ମିଳିବ । ଅଧିକ LPG ବ୍ୟବହାର କରୁଥିବା ପରିବାରରେ ଗୋଟିଏ ସିଲିଣ୍ଡର ମାସେ ପୂରା ନଚାଲିବାରୁ ଦ୍ୱିତୀୟ ସିଲିଣ୍ଡର ପାଇଁ ଦୀର୍ଘ ସମୟ ଅପେକ୍ଷା କରିବା ସମସ୍ୟା ହେଉଥିଲା । ନୂଆ ନିୟମ ଏହି ସମସ୍ୟାକୁ ଅନେକ ମାତ୍ରାରେ କମାଇବ ବୋଲି ଆଶା କରାଯାଉଛି ।