ATM Card Printing / ଏଣିକି ATMରୁ ମିଳିବ ଡେବିଟ୍-କ୍ରେଡିଟ୍ କାର୍ଡ ! ଜାଣନ୍ତୁ ନୂଆ ବ୍ୟାଙ୍କିଂ ସୁବିଧା

ନୂଆ ଡେବିଟ୍ କିମ୍ବା କ୍ରେଡିଟ୍ କାର୍ଡ ପାଇଁ ଏଣିକି ବାରମ୍ବାର ବ୍ୟାଙ୍କ ଯିବା କିମ୍ବା ସପ୍ତାହେ ସପ୍ତାହେ କୁରିଅରକୁ ଅପେକ୍ଷା କରିବାର ଆବଶ୍ୟକତା ନଥାଇପାରେ । ଆଗାମୀ ଦିନରେ ଆପଣ ନିକଟସ୍ଥ ATMକୁ ଯାଇ କିଛି ମିନିଟ୍ ମଧ୍ୟରେ ନିଜର ପର୍ସନାଲାଇଜ୍‌ଡ କାର୍ଡ ପାଇପାରିବେ ।
ମୁମ୍ବାଇରେ ଆୟୋଜିତ Global Fintech Fest 2026ରେ ବ୍ୟାଙ୍କିଂ ବ୍ୟବସ୍ଥାକୁ ଅଧିକ ସହଜ ଓ ଡିଜିଟାଲ୍ କରିବା ପାଇଁ ଆର୍ଥିକ ସେବା ବିଭାଗ (DFS) ପକ୍ଷରୁ ତିନିଟି ବଡ଼ ଡିଜିଟାଲ୍ ପଦକ୍ଷେପ ଘୋଷଣା କରାଯାଇଛି । ଏଥିରେ ଓପନ୍-ସୋର୍ସ ଆଣ୍ଡ୍ରଏଡ୍‌-ଭିତ୍ତିକ ATM ସମାଧାନ ମଧ୍ୟ ସାମିଲ ରହିଛି ।
ATMରୁ ମିଳିବ ୩ ପ୍ରକାର କାର୍ଡ
ନୂଆ ଟେକ୍ନୋଲୋଜି ସହିତ ତିଆରି ATM ମାଧ୍ୟମରେ କେବଳ ଟଙ୍କା ଉଠାଇବା କିମ୍ବା ଜମା କରିବା ନୁହେଁ, ବରଂ କାର୍ଡ ସମ୍ପର୍କିତ ସେବା ମଧ୍ୟ ମିଳିପାରିବ । ଏହି ATMରୁ ତୁରନ୍ତ ନିମ୍ନଲିଖିତ କାର୍ଡ ପ୍ରିଣ୍ଟ କରି ନେଇପାରିବେ
- RuPay ଡେବିଟ୍ କାର୍ଡ
- କ୍ରେଡିଟ୍ କାର୍ଡ
- National Common Mobility Card (NCMC)
ଅର୍ଥାତ୍, ଆବେଦନ ପରେ କାର୍ଡ ଘରେ ପହଞ୍ଚିବା ପାଇଁ କୁରିଅରକୁ ଅପେକ୍ଷା କରିବାର ଆବଶ୍ୟକତା କମିପାରେ । ATMରୁ କାର୍ଡ ପ୍ରିଣ୍ଟ ହେବା ପରେ ତାହାକୁ ତୁରନ୍ତ ବ୍ୟବହାର କରିହେବ ।
କେଉଁ ବ୍ୟାଙ୍କ କରୁଛନ୍ତି ପରୀକ୍ଷଣ ?
ଏହି ନୂଆ ATM ସମାଧାନର ଏବେ ପରୀକ୍ଷଣ ଓ ମୂଲ୍ୟାଙ୍କନ ଚାଲିଛି । ଏଥିରେ NPCI (National Payments Corporation of India), ATM ନିର୍ମାତା କମ୍ପାନୀ ସହିତ ୯ଟି ବ୍ୟାଙ୍କ ସାମିଲ ହୋଇଛନ୍ତି ।
ପରୀକ୍ଷଣରେ ସାମିଲ ବ୍ୟାଙ୍କଗୁଡ଼ିକ ହେଲେ
- State Bank of India (SBI)
- Bank of Baroda (BoB)
- Punjab National Bank (PNB)
- Bank of India (BoI)
- UCO Bank
- Central Bank of India
- Union Bank of India
- Slice Small Finance Bank
- Airtel Payments Bank
ଆଗାମୀ ଦିନରେ ATM ହେବ ‘ମିନି ବ୍ୟାଙ୍କ’
ନୂଆ ଟେକ୍ନୋଲୋଜି ସହିତ ATMର ଭୂମିକା କେବଳ ଟଙ୍କା ଉଠାଇବା ମେସିନ୍‌ରେ ସୀମିତ ରହିବ ନାହିଁ । ଏହାକୁ ଧୀରେ ଧୀରେ ଏକ ମିନି ବ୍ୟାଙ୍କ ଶାଖା ଭଳି କରିବା ଦିଗରେ ପଦକ୍ଷେପ ନିଆଯାଉଛି । ଭବିଷ୍ୟତରେ ATM ମାଧ୍ୟମରେ ଚେକ୍ ଜମା, ନୂଆ ବ୍ୟାଙ୍କ ଆକାଉଣ୍ଟ ଖୋଲିବା ଏବଂ ଇନ୍‌ଷ୍ଟାଣ୍ଟ ଲୋନ୍ ପାଇଁ ଆବେଦନ ଭଳି ସୁବିଧା ମଧ୍ୟ ମିଳିପାରେ ।
ଏହା ଲାଗୁ ହେଲେ ଛୋଟଛୋଟ ବ୍ୟାଙ୍କିଂ କାମ ପାଇଁ ଗ୍ରାହକଙ୍କୁ ବ୍ୟାଙ୍କ ଶାଖାରେ ଲମ୍ବା ଲାଇନ୍‌ରେ ଠିଆ ହେବାର ଆବଶ୍ୟକତା ବହୁତ କମିଯିବ ।