ଯଦି ଆପଣ ଛୋଟ ହେଉ କି ବଡ଼ ପ୍ରାୟ ପ୍ରତ୍ୟେକ କିଣାକିଣି ପାଇଁ ଫୋନ୍ ବାହାର କରି QR କୋଡ୍ ସ୍କାନ୍ କରି UPI ମାଧ୍ୟମରେ ପେମେଣ୍ଟ କରନ୍ତି, ତେବେ ୨ ଅକ୍ଟୋବର, ଗାନ୍ଧୀ ଜୟନ୍ତୀ ଦିନ ଆପଣଙ୍କୁ ଟିକେ ସତର୍କ ରହିବାକୁ ପଡ଼ିପାରେ ।

ଦେଶର କିଛି ପ୍ରମୁଖ ବ୍ୟବସାୟୀ ସଂଗଠନ ‘No UPI Day’ ପାଳନ କରିବାକୁ ଆହ୍ୱାନ ଦେଇଛନ୍ତି । ଏହାର ଅର୍ଥ, ସେହି ଦିନ କିଛି ଦୋକାନ, କିରାଣା ଷ୍ଟୋର୍, ପେଟ୍ରୋଲ୍ ପମ୍ପ ଓ ଅନ୍ୟ ବ୍ୟବସାୟିକ ପ୍ରତିଷ୍ଠାନରେ ବ୍ୟବସାୟୀମାନେ UPI ପେମେଣ୍ଟ ଗ୍ରହଣ ନକରିବାକୁ ପାରନ୍ତି । ଏପରି ସ୍ଥିତିରେ ଗ୍ରାହକଙ୍କୁ ନଗଦ କିମ୍ବା ଡେବିଟ୍/କ୍ରେଡିଟ୍ କାର୍ଡ ବ୍ୟବହାର କରିବାକୁ ପଡ଼ିପାରେ।

UPIକୁ ନେଇ କାହିଁକି ଅସନ୍ତୋଷ ?
ବ୍ୟବସାୟୀ ସଂଗଠନଗୁଡ଼ିକର ଅସନ୍ତୋଷର ମୁଖ୍ୟ କାରଣ ହେଉଛି Merchant Discount Rate (MDR) ଫି । ବ୍ୟବସାୟୀମାନଙ୍କ ଦାବି ଅନୁସାରେ, ପେଟ୍ରୋଲ୍-ଡିଜେଲ୍, କିରାଣା, ଇଲେକ୍ଟ୍ରୋନିକ୍ସ ଓ ଅନାଜ ଭଳି କ୍ଷେତ୍ରରେ ଲାଭ ମାର୍ଜିନ୍ ପୂର୍ବରୁ ହିଁ କମ୍ ରହିଥାଏ । ଏଭଳି ପରିସ୍ଥିତିରେ UPI ପେମେଣ୍ଟ ଉପରେ ଅତିରିକ୍ତ ଚାର୍ଜ ଲାଗିଲେ ବ୍ୟବସାୟୀଙ୍କ ଉପରେ ଆର୍ଥିକ ଚାପ ବଢ଼ିବ ବୋଲି ସେମାନେ ଯୁକ୍ତି ଦେଉଛନ୍ତି ।

ମଧ୍ୟପ୍ରଦେଶର ଭୋପାଳ, ଇନ୍ଦୋର, ଗ୍ୱାଲିୟର ଓ ଜବଲପୁର ଭଳି ସହରରେ ଏହି ପ୍ରସଙ୍ଗକୁ ନେଇ ପୂର୍ବରୁ ମଧ୍ୟ ପ୍ରତୀକାତ୍ମକ ‘No UPI Day’ ପାଳନ କରାଯାଇଥିବା ଦାବି କରାଯାଇଛି । ବ୍ୟବସାୟୀ ସଂଗଠନଗୁଡ଼ିକର କହିବା ଅନୁସାରେ, ଏହାର ପ୍ରଭାବରେ ବ୍ୟବସାୟ ମଧ୍ୟ ପ୍ରଭାବିତ ହୋଇଥିଲା ।

MDR କ’ଣ ?
ସରଳ ଭାଷାରେ କହିଲେ,MDR ହେଉଛି ଡିଜିଟାଲ୍ ପେମେଣ୍ଟ ପ୍ରକ୍ରିୟା ସହ ଜଡ଼ିତ ଏକ ପ୍ରୋସେସିଂ ଫି । ଧରନ୍ତୁ ଆପଣ ଗୋଟିଏ ଦୋକାନରେ ୧,୦୦୦ର ସାମଗ୍ରୀ କିଣିଲେ ଏବଂ ଫୋନ୍‌ରେ QR କୋଡ୍ ସ୍କାନ୍ କରି UPI ମାଧ୍ୟମରେ ପେମେଣ୍ଟ କଲେ । ଆପଣଙ୍କ ବ୍ୟାଙ୍କ ଖାତାରୁ ବ୍ୟବସାୟୀଙ୍କ ଖାତାକୁ ଟଙ୍କା ପହଞ୍ଚାଇବା ପାଇଁ ବ୍ୟାଙ୍କ, ପେମେଣ୍ଟ ସିଷ୍ଟମ୍ ଓ ଅନ୍ୟ ଡିଜିଟାଲ୍ ଭିତ୍ତିଭୂମି କାମ କରେ । ଏହି ବ୍ୟବସ୍ଥାର ଖର୍ଚ୍ଚ ସହ MDR ଭଳି ଚାର୍ଜ ଜଡ଼ିତ ହୋଇପାରେ ।

୧୫ ଅକ୍ଟୋବରରୁ କେତେ ଚାର୍ଜ ଲାଗିବ ?
ବ୍ୟବସାୟୀ ସଂଗଠନଗୁଡ଼ିକ ଯେଉଁ ନୂଆ ନିୟମକୁ ନେଇ ଆପତ୍ତି ଜଣାଉଛନ୍ତି, ସେହି ଅନୁସାରେ ୧୫ ଅକ୍ଟୋବର ୨୦୨୬ରୁ ୨,୦୦୦ରୁ ଅଧିକ P2M (Peer-to-Merchant) UPI ଲେନଦେନ ଉପରେ ୦.୪୦% ଫି ଲାଗିବ ବୋଲି ଦାବି କରାଯାଉଛି । ଏହାର ସର୍ବାଧିକ ସୀମା ୩୦୦ ରହିବ ବୋଲି ମଧ୍ୟ କୁହାଯାଉଛି ।
ତେଣୁ ଲେନଦେନର ମୂଲ୍ୟ ଅଧିକ ହେଲେ ମଧ୍ୟ ଉଲ୍ଲେଖିତ ସୀମା ଅନୁସାରେ ସର୍ବାଧିକ ୩୦୦ ପର୍ଯ୍ୟନ୍ତ ଚାର୍ଜ ହୋଇପାରିବ ବୋଲି ଦାବି ରହିଛି ।

କେଉଁ ବ୍ୟବସାୟୀ ସଂଗଠନ ସମର୍ଥନ କରୁଛନ୍ତି ?
ମହାରାଷ୍ଟ୍ର ଚେମ୍ବର ଅଫ୍ କମର୍ସ (MACCIA), କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (CAIT) ଏବଂ ଅଲ୍ ଇଣ୍ଡିଆ କନ୍ସ୍ୟୁମର୍ ପ୍ରଡକ୍ଟ୍ସ ଡିଷ୍ଟ୍ରିବ୍ୟୁଟର୍ସ ଫେଡେରେସନ୍ (AICPDF) ସମେତ ଅନେକ ବ୍ୟବସାୟୀ ସଂଗଠନ ଏହି ଆନ୍ଦୋଳନକୁ ସମର୍ଥନ କରୁଥିବା ଦାବି କରାଯାଇଛି ।

ଏଥି ସହ ପଢନ୍ତୁ : BSNL ଦେଲା ବଡ଼ ଖବର: ୧ ଟଙ୍କାରେ ଅସୀମିତ କଲ ଏବଂ 24GB ଡାଟା

୨ ଅକ୍ଟୋବରରେ କ’ଣ କରିବେ ?
ଯଦି ଆପଣ ୨ ଅକ୍ଟୋବରରେ ବଜାରରୁ କିଣାକିଣି କରିବା, ପେଟ୍ରୋଲ୍ ଭରିବା କିମ୍ବା ବାହାରେ ଖାଇବାକୁ ଯିବାର ଯୋଜନା କରିଛନ୍ତି, ତେବେ ସହିତ କିଛି ନଗଦ ଟଙ୍କା କିମ୍ବା କାର୍ଡ ରଖିବା ଭଲ । କାରଣ କିଛି ବ୍ୟବସାୟୀ ସେହି ଦିନ UPI ଗ୍ରହଣ ନକରିପାରନ୍ତି ।

ତେବେ ‘No UPI Day’ ଏକ ବ୍ୟବସାୟୀ ସଂଗଠନଗୁଡ଼ିକର ଆହ୍ୱାନ; ଦେଶର ପ୍ରତ୍ୟେକ ଦୋକାନରେ UPI ବନ୍ଦ ରହିବ ବୋଲି ଧରିନେବା ଠିକ୍ ନୁହେଁ । ତେଣୁ ବାହାରକୁ ଯିବା ପୂର୍ବରୁ ପେମେଣ୍ଟ ବିକଳ୍ପ ବିଷୟରେ ଦୋକାନୀଙ୍କୁ ପଚାରିନେବା ଭଲ।