Post Office Savings / ଡାକଘର ସଞ୍ଚୟ ଯୋଜନାରେ ବଡ଼ ପରିବର୍ତ୍ତନ: ଲାଗୁ ହେଲା ‘ମେକର-ଚେକର’ ବ୍ୟବସ୍ଥା
Key Points
ସୁଧ ସଂଶୋଧନ ପାଇଁ ଲାଗୁ ହେଲା ‘ମେକର-ଚେକର’ ବ୍ୟବସ୍ଥା ।
ଆପଣଙ୍କର କିମ୍ବା ପରିବାରର କାହାରି ବି ଡାକଘରରେ ସଞ୍ଚୟ ଖାତା ଥିଲେ ଏହି ଖବର ଜାଣିବା ଜରୁରୀ । ଡାକଘରର ବିଭିନ୍ନ ସଞ୍ଚୟ ଯୋଜନାରେ ଜମା ହେଉଥିବା ସୁଧରେ ସଂଶୋଧନ କରିବା ପ୍ରକ୍ରିୟାରେ ବଡ଼ ପରିବର୍ତ୍ତନ ହୋଇଛି । ଏଣିକି ଜଣେ ଅଧିକାରୀ ନିଜେ ସୁଧ ରାଶିରେ ପରିବର୍ତ୍ତନ କରିପାରିବେ ନାହିଁ । ଏଥିପାଇଁ ‘ମେକର-ଚେକର’ ବ୍ୟବସ୍ଥା ଲାଗୁ କରାଯାଇଛି ।
କେଉଁ କେଉଁ ଯୋଜନାରେ ଲାଗୁ ହେବ ନୂଆ ନିୟମ ?
ଡାକଘରର ଅନେକ ଲୋକପ୍ରିୟ ସ୍ମଲ୍ ସେଭିଂସ୍ ସ୍କିମ୍ରେ ଏହି ନିୟମ ଲାଗୁ ହେବ । ସେଗୁଡ଼ିକ ହେଲା
- PPF — ପବ୍ଲିକ୍ ପ୍ରୋଭିଡେଣ୍ଟ ଫଣ୍ଡ
- SSY — ସୁକନ୍ୟା ସମୃଦ୍ଧି ଯୋଜନା
- POSA — ପୋଷ୍ଟ ଅଫିସ୍ ସେଭିଂସ୍ ଆକାଉଣ୍ଟ
- MIS — ମାସିକ ଆୟ ଯୋଜନା
- SCSS — ସିନିୟର ସିଟିଜେନ୍ସ ସେଭିଂସ୍ ସ୍କିମ୍
- NSC — ନ୍ୟାସନାଲ ସେଭିଂସ୍ ସାର୍ଟିଫିକେଟ୍
ପୂର୍ବରୁ କ’ଣ ହେଉଥିଲା ?
ପୂର୍ବରୁ ସକ୍ଷମ କର୍ତ୍ତୃପକ୍ଷଙ୍କ ଅନୁମୋଦନ ପରେ SBCO ସୁପରଭାଇଜର ସିଧାସଳଖ ସିଷ୍ଟମ୍ରେ ସୁଧ ସଂଶୋଧନର ଏଣ୍ଟ୍ରି କରିପାରୁଥିଲେ । ଏଥିରେ ଅନ୍ୟ ଜଣେ ଅଧିକାରୀଙ୍କ ଦ୍ୱାରା ଆଉଥରେ ଯାଞ୍ଚ ଆବଶ୍ୟକ ନଥିଲା । ଏବେ ଏହି ପ୍ରକ୍ରିୟା ବଦଳିଛି । ଜଣେ ଅଧିକାରୀ ଏଣ୍ଟ୍ରି କରିବେ ଏବଂ ଅନ୍ୟ ଜଣେ ଅଧିକାରୀ ତାହାକୁ ଯାଞ୍ଚ କରି ଅନୁମୋଦନ କରିବେ । ଅର୍ଥାତ୍ ଡବଲ୍ ଭେରିଫିକେସନ୍ ପରେ ହିଁ ସୁଧ ସଂଶୋଧନ ବୈଧ ହେବ ।
କିପରି କାମ କରିବ ନୂଆ ମେକର-ଚେକର ସିଷ୍ଟମ୍ ?
କୌଣସି ଖାତାରେ ସୁଧ ରାଶି ଭୁଲ୍ ହୋଇଥିଲେ ତାହା ସଂଶୋଧନ ପାଇଁ ଏବେ ଏକାଧିକ ପର୍ଯ୍ୟାୟ ଦେଇ ଯିବାକୁ ପଡ଼ିବ । ପ୍ରଥମେ ହେଡ୍ ପୋଷ୍ଟମାଷ୍ଟର ମାମଲା ଏବଂ ସମ୍ପୃକ୍ତ ଦସ୍ତାବିଜ ଯାଞ୍ଚ କରିବେ । ପରେ ମାମଲା ଡିଭିଜନାଲ୍ ହେଡଙ୍କ ନିକଟକୁ ଯିବ। ସେଠାରେ ଏହାକୁ ଅନୁମୋଦନ କିମ୍ବା ଖାରଜ କରାଯାଇପାରେ ।
ଅନୁମୋଦନ ମିଳିଲେ ହେଡ୍ ଅଫିସ୍ର SBCO ସୁପରଭାଇଜର HIARM ମେନୁରେ ଏଣ୍ଟ୍ରି କରିବେ । ଏହା ପରେ ସର୍କଲ୍ର CPC ସୁପରଭାଇଜର ଏଣ୍ଟ୍ରିକୁ ଯାଞ୍ଚ କରି ଶେଷ ଅନୁମୋଦନ ଦେବେ ।
୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧ ସଂଶୋଧନ
ନୂଆ ବ୍ୟବସ୍ଥା ଅନୁସାରେ HIARM ମାଧ୍ୟମରେ ଗୋଟିଏ ଥରରେ ସର୍ବାଧିକ ୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧ ସଂଶୋଧନ କରାଯାଇପାରିବ। ଏହାଠାରୁ ଅଧିକ ରାଶି ହେଲେ ମାମଲା CPRC, ଚେନ୍ନାଇକୁ ପଠାଯିବ । ତେବେ ଏହି ବ୍ୟବସ୍ଥା କେବଳ ସୁଧ ରାଶି ସଂଶୋଧନ ପାଇଁ। ଏହା ମାଧ୍ୟମରେ ଖାତାର ମୂଳଧନ ବା Principal Amountରେ କୌଣସି ପରିବର୍ତ୍ତନ କରାଯାଇପାରିବ ନାହିଁ ।
ତାରିଖ ନେଇ ମଧ୍ୟ ରହିଛି ନିୟମ
SCSS ଏବଂ MIS ଖାତାରେ ସୁଧ ସଂଶୋଧନ ପାଇଁ କେବଳ BOD (Beginning of Day) ତାରିଖ ବ୍ୟବହାର କରାଯିବ । ଅନ୍ୟପକ୍ଷରେ ସେଭିଂସ୍ ଆକାଉଣ୍ଟ ପାଇଁ BOD ତାରିଖ କିମ୍ବା ପୂର୍ବ ଆର୍ଥିକ ବର୍ଷର ୩୧ ମାର୍ଚ୍ଚ ତାରିଖ ବ୍ୟବହାର କରାଯାଇପାରିବ ।
ଖାତାଧାରୀଙ୍କ ପାଇଁ ଏହାର ଅର୍ଥ କ’ଣ ?
ଏହି ନୂଆ ବ୍ୟବସ୍ଥାର ମୁଖ୍ୟ ଉଦ୍ଦେଶ୍ୟ ହେଉଛି ସୁଧ ସଂଶୋଧନ ସଂଖ୍ୟା ବଢ଼ାଇବା ଏବଂ ଭୁଲ୍ ଏଣ୍ଟ୍ରି କିମ୍ବା କିଛି ତ୍ରୁଟିକୁ କମାଇବା । ଏଣିକି ଜଣେ ଅଧିକାରୀଙ୍କ ଏକକ ନିଷ୍ପତ୍ତିରେ ଖାତାର ସୁଧ ରାଶି ବଦଳିପାରିବ ନାହିଁ । ଦୁଇ ପର୍ଯ୍ୟାୟର ଯାଞ୍ଚ ପରେ ହିଁ ସଂଶୋଧନ ମଞ୍ଜୁର ହେବ । ଅର୍ଥାତ୍, ଡାକଘର ଖାତାରେ ସୁଧ ନେଇ ଭୁଲ୍ ହେଲେ ଏଣିକି ତାହା ସଂଶୋଧନ ପାଇଁ ଅଧିକ କଠୋର ଯାଞ୍ଚ ପ୍ରକ୍ରିୟା ଦେଇ ଯିବାକୁ ପଡ଼ିବ ।
📱 Get Argus News App
✨Related Topics
Explore more stories