SBI Khimji Finserve / ଡିଜିଟାଲ୍ ବ୍ୟାଙ୍କିଂରେ ନୂଆ ପଦକ୍ଷେପ… ଖିମ୍‌ଜି ଫିନ୍‌ସର୍ଭ ସହ ହାତ ମିଳାଇଲା SBI

ଭୁବନେଶ୍ୱର: ଡିଜିଟାଲ୍‌ ବ୍ୟାଙ୍କିଂ ଓ ଆର୍ଥିକ ସେବାକୁ ଅଧିକ ସରଳ, ସୁରକ୍ଷିତ ଏବଂ ସ୍ୱଚ୍ଛ କରିବା ଦିଗରେ ଖିମ୍‌ଜି ଫିନ୍‌ସର୍ଭ ପ୍ରାଇଭେଟ୍‌ ଲିମିଟେଡ୍‌ ଏବଂ ଭାରତୀୟ ଷ୍ଟେଟ୍‌ ବ୍ୟାଙ୍କ (ଏସ୍‌ବିଆଇ) ମଧ୍ୟରେ ଏକ ନୂଆ ପଦକ୍ଷେପ ନିଆଯାଇଛି । ଅକ୍ଟୋବର ୨୬, ୨୦୨୬ରେ ଭୁବନେଶ୍ୱରସ୍ଥିତ ଖିମ୍‌ଜି କେଡି ଆଣ୍ଡ ସନ୍ସର କର୍ପୋରେଟ୍‌ କାର୍ଯ୍ୟାଳୟକୁ ଏସ୍‌ବିଆଇର ଡେପୁଟି ମ୍ୟାନେଜିଂ ଡାଇରେକ୍ଟର (ଟ୍ରାଞ୍ଜାକ୍ସନ୍‌ ବ୍ୟାଙ୍କିଂ) ଚନ୍ଦର ଶେଖର ଶର୍ମା ଗସ୍ତ କରିଥିଲେ । ଏହି ଅବସରରେ ଏସ୍‌ବିଆଇ ପକ୍ଷରୁ CMP API ଇଣ୍ଟିଗ୍ରେସନ୍‌ ସମ୍ପର୍କିତ ଆସୋସିଏସନ୍‌ ପତ୍ର ଖିମ୍‌ଜି ଫିନ୍‌ସର୍ଭ ପ୍ରାଇଭେଟ୍‌ ଲିମିଟେଡ୍‌ର ସିଇଓ ଅରିନ୍ଦମ ରାୟଙ୍କୁ ହସ୍ତାନ୍ତର କରାଯାଇଛି ।

• ଡିଜିଟାଲ୍‌ ଆର୍ଥିକ କାରବାରକୁ ମିଳିବ ନୂଆ ଦିଗ

CMP API ଇଣ୍ଟିଗ୍ରେସନ୍‌ ଦ୍ୱାରା ଗ୍ରାହକଙ୍କୁ ସହଜରେ ଋଣ ମିଳିବା ସହ ସୁରକ୍ଷିତ ଅର୍ଥ କାରବାର ଏବଂ ବାସ୍ତବିକ ସମୟରେ ନେଣଦେଣ ପ୍ରକ୍ରିୟାକୁ ଅଧିକ ସୁବିଧାଜନକ କରିବାର ଲକ୍ଷ୍ୟ ରହିଛି । ଏହା ଦ୍ୱାରା କାରବାର ଉତ୍ତମ ଭାବେ ପରିଚାଳନା ହେବା ସହିତ ଆର୍ଥିକ ପ୍ରକ୍ରିୟାରେ ସ୍ୱଚ୍ଛତା ଆଣିବାକୁ କମ୍ପାନୀ ଆଶା ରଖିଛି ।

କମ୍ପାନୀ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ଆସନ୍ତା ମାସରେ ସଂଗଠନରେ ଏଣ୍ଟରପ୍ରାଇଜ୍‌ ରିସୋର୍ସ ପ୍ଲାନିଂ (ERP) ବ୍ୟବସ୍ଥା ଲାଗୁ ହେବା ସହ ଏହି ଡିଜିଟାଲ୍‌ ପଦକ୍ଷେପକୁ ତ୍ବରାନ୍ବିତ କରାଯିବାର ଯୋଜନା ରହିଛି ।

• ସୁନା ଋଣ ଓ ଅଳଙ୍କାର ବ୍ୟବସାୟ ନେଇ ଆଲୋଚନା

ଏହି ଗସ୍ତ ସମୟରେ ଏସ୍‌ବିଆଇର ପ୍ରତିନିଧିମାନେ ଖିମ୍‌ଜି ଗ୍ରୁପ୍‌ର ପ୍ରମୋଟର୍‌ ଏବଂ ବୋର୍ଡ ସଦସ୍ୟମାନଙ୍କ ସହ ମଧ୍ୟ ଆଲୋଚନା କରିଥିଲେ । ବୈଠକରେ ସୁନା ଋଣ ଏବଂ ଅଳଙ୍କାର କ୍ଷେତ୍ରରେ ଭବିଷ୍ୟତର ସହଯୋଗ ଓ ବ୍ୟବସାୟିକ ସୁଯୋଗ ଉପରେ ଚର୍ଚ୍ଚା ହୋଇଥିଲା । ଏହି ଅବସରରେ ଖିମ୍‌ଜି କେଡି ଆଣ୍ଡ ସନ୍ସର ମ୍ୟାନେଜିଂ ଡାଇରେକ୍ଟର ମିତେଶ ଖିମ୍‌ଜି କହିଥିଲେ, ଡିଜିଟାଲ୍ ପରିବର୍ତ୍ତନ କେବଳ ପ୍ରଯୁକ୍ତିବିଦ୍ୟା ଗ୍ରହଣ କରିବା ବିଷୟରେ ନୁହେଁ; ଏହା ସ୍ମାର୍ଟ ପ୍ରକ୍ରିୟା ନିର୍ମାଣ କରିବା, ଗ୍ରାହକ ଅଭିଜ୍ଞତା ବୃଦ୍ଧି କରିବା ଏବଂ ସ୍ଥାୟୀ ଅଭିବୃଦ୍ଧି ପାଇଁ ଏକ ଦୃଢ଼ ଭିତ୍ତିଭୂମି ସ୍ଥାପନ କରିବା ବିଷୟରେ ଆଲୋଚନା ହୋଇଛି ।

• ଡିଜିଟାଲ୍‌ ରୂପାନ୍ତରଣ ଦିଗରେ ଆଉ ଏକ ପଦକ୍ଷେପ

ଏସ୍‌ବିଆଇ ସହ ଏହି ସହଯୋଗ ଖିମ୍‌ଜି ଫିନ୍‌ସର୍ଭର ଡିଜିଟାଲ୍‌ ଆର୍ଥିକ ସେବା ଏବଂ ଆଭ୍ୟନ୍ତରୀଣ କାର୍ଯ୍ୟପ୍ରଣାଳୀକୁ ଆଧୁନିକ କରିବାର ପ୍ରୟାସର ଏକ ବଡ଼ ଅଂଶ । ସହଜରେ ଋଣ ମିଳିବା ସହ ସୁରକ୍ଷିତ ଅର୍ଥ କାରବାର ମାଧ୍ୟମରେ ଗ୍ରାହକ ସେବା ଓ ବ୍ୟବସାୟିକ ପରିଚାଳନାରେ ଉନ୍ନତି ଆଣିବା ଏହି ପଦକ୍ଷେପର ପ୍ରମୁଖ ଉଦ୍ଦେଶ୍ୟ।