ସପ୍ତାହ ଆରମ୍ଭର ପ୍ରଥମ ଦିନ ସୋମବାର ସେୟାର ବଜାରରେ ଉତ୍ସାହ ଦେଖିବାକୁ ମିଳିଛି । ଗତ ସପ୍ତାହରେ ମଜଭୁତ ସ୍ଥିତି ପରେ ଆଜି ବମ୍ବେ ଷ୍ଟକ୍ ଏକ୍ସଚେଞ୍ଜର ୩୦ ସେୟାର ବିଶିଷ୍ଟ ସେନସେକ୍ସ ଖୋଲୁ ଖୋଲୁ ୫୦୦ ପଏଣ୍ଟରୁ ଅଧିକ ବୃଦ୍ଧି ପାଇଛି । ସେହିଭଳି ନ୍ୟାସନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ମଧ୍ୟ ଆରମ୍ଭ ମାତ୍ରେ ୧୫୦ ପଏଣ୍ଟ ବଢ଼ି କାରବାର କରୁଛି ।

ସେୟାର ବଜାରରେ ଉତ୍ସାହ ରହିଥିବା ବେଳେ ପାୱାର ଗ୍ରୀର୍‍ ଏନଟିପିସି, ଆରଭିଏନଏଲ୍ ଆଦିର ସେୟାର ଖସୁଛି । ଗତ ସପ୍ତାହରେ ବିଏସ୍‌ଇ ସେନସେକ୍ସ ୭୬, ୯୦୫.୫୧ ପଏଣ୍ଟରେ ବନ୍ଦ ହୋଇଥିବା ବେଳେ ଆଜି ୭୭, ୪୫୬.୨୭ ପଏଣ୍ଟରେ ଖୋଲି କାରବାର ଚାଲିଛି । ସେହିଭଳି ଏନଏସ୍ଇ ନିଫ୍ଟି ଗତ ସପ୍ତାହରେ ୨୩, ୩୫୦. ୪୦ ପଏଣ୍ଟରେ ବନ୍ଦ ହୋଇଥିଲା । ଆଜି ୨୩.୫୨୫.୪୦ରେ ଖୋଲି କାରବାର ଚାଲିଛି ।

ସୋମବାର ଉଭୟ ସେନସେକ୍ସ ଓ ନିଫ୍ଟି ଭଲ ସଂକେତ ଗେଇଛନ୍ତି । ନିଫ୍ଟି-୫୦ ମଧ୍ୟ ଗୋଟିଏ ଝଟ୍‌କାରେ ୨୩ ହଜାର ୫୦୦ ପାର୍ କରିଛି । ପ୍ରାରମ୍ଭିକ କାରବାରରେ ୨୧୭୫ କମ୍ପାନୀର ସେୟାର ବୃଦ୍ଧି ପାଇ କାରବାର ଆରମ୍ଭ କରିଥିବା ବେଳେ ୪୭୨ଟି କମ୍ପାନୀର ସେୟାର ଖସୁଥିବା ଦେଖା ଯାଇଥିଲା । ସେହିଭଳି ୧୭୮ଟି ସେୟାର ମୂଲ୍ୟରେ କୌଣସି ପରିବର୍ତ୍ତନ ଆସି ନଥିଲା ।

ଗତ ସପ୍ତାହରେ ଭାରତୀୟ ସେୟାର ବଜାରରେ ଅଭିବୃଦ୍ଧି ପରିଲକ୍ଷିତ ହୋଇଥିଲା । ଯାହା ଚଳିତ ସପ୍ତାହ ଆରମ୍ଭରୁ ବି ଜାରି ରହିଛି । ଗତ ସପ୍ତାହରେ ସେନସେକ୍ସ ୩, ୦୭୬.୬ ପଏଣ୍ଟ ଅର୍ଥାତ୍ ୪.୧୬ ପ୍ରତିଶତ ବଢ଼ିଥିବା ବେଳେ ନିଫ୍ଟି ୮୫୩.୨ ପଏଣ୍ଟ ଅର୍ଥାତ୍ ୪.୨୫ ପ୍ରତିଶତ ବଢ଼ିଛି ।