ଭାରତୀୟ ସେୟାର ବଜାର ଖସିବାରେ ଲାଗିଛି । ବୈଶ୍ଵିକ ବଜାରରେ ମାନ୍ଦାବସ୍ଥା ଭିତରେ ସୋମବାର ସପ୍ତାହ ଆରମ୍ଭରୁ ଭାରତୀୟ ବଜାରରେ ବି ପ୍ରଭାବ ପଡ଼ିଛି । ସପ୍ତାହର ପ୍ରଥମ ଦିନରେ ପୁଣି ନିବେଶକଙ୍କୁ ନିରାଶ କରିଛି ଦଲାଲ୍ ଷ୍ଟ୍ରିଟ୍ । ସେନସେକ୍ସ ଓ ନିଫ୍ଟି ଉଭୟ ଆହୁରି ଦୁର୍ବଳ ହୋଇଛି ।

ବିଏସ୍ଇ ସେନସେକ୍ସ ଆଜି ୪୦୦ ପଏଣ୍ଟରୁ ଅଧିକ ହ୍ରାସ ପାଇ ୭୪ ହଜାର ୮୯୩ ପଏଣ୍ଟରେ ଖୋଲିଥିଲା । ଏହା ପୂର୍ବରୁ ଶୁକ୍ରବାର ସେନସେକ୍ସ ୭୫ ହଜାର ୩୧୧ ପଏଣ୍ଟରେ କାରବାର ବନ୍ଦ ହୋଇଥିଲା । ସେହିଭଳି ଏନ୍ଏସ୍ଇ ନିଫ୍ଟି ମଧ୍ୟ ସମାନ ସ୍ଥିତିର ସାମ୍ନା କରୁଛି । ଆଜି ନିଫ୍ଟି ୨୮୬ ପଏଣ୍ଟ ଖସି କାରବାର ୨୨ ହଜାର ୬୦୯ ପଏଣ୍ଟରେ ଆରମ୍ଭ ହୋଇଛି ।

ଶୁକ୍ରବାର ଆମେରିକା ସେୟାର ବଜାରରେ ମଧ୍ୟ ନିବେଶକଙ୍କୁ ନିରାଶ କରିଥିଲା । ଯାହାର ପ୍ରଭାବ ସୋମବାର ଏସିଆର ବଜାରରେ ଦେଖା ଦେଇଛି । କୁହାଯାଉଛି ଆମେରିକା ସେୟାର ବଜାରରେ ହ୍ରାସ ଓ ବୈଶ୍ଵିକ ସ୍ତରରେ ଦୁର୍ବଳ ସଂକେତର ପ୍ରଭାବ ଭାରତୀୟ ବଜାର ଉପରେ ପଡ଼ିଛି । ଏଥିସହ ଚୀନରେ କୋରନାର ନୂଆ ଭ୍ୟାରିଆଣ୍ଟ ଓ ଋଷ-ୟୁକ୍ରେନ୍ ଯୁଦ୍ଧକୁ ନେଇ ନିବେଶକ ପ୍ରଭାବିତ ହୋଇଛନ୍ତି ।

ଆଜି ସକାଳ ୯ଟା ୨୦ରେ ବିଏସଇରେ ତାଲିକାଭୁକ୍ତ କମ୍ପାନୀଙ୍କ ବଜାର ଅଂଶଧର ୩୯୮.୮୦ କୋଟିକୁ ଖସି ଆସିଛି । ଯେତେବେଳେ କି ଗତ ସପ୍ତାହର ଶେଷ ଦିନ ଫେବ୍ରୁଆରୀ ୨୧ରେ ଏହା ୪୦୨.୨୦ ଲକ୍ଷ କୋଟି ଟଙ୍କା ଥିଲା । ଏଭଳି ଭାବେ ବିଏସଇରେ ତାଲିକାଭୁକ୍ତ କମ୍ପାନୀଗୁଡ଼ିକର ମାର୍କେଟ୍ କ୍ୟାପ୍ ଆଜି ମାତ୍ର ୫ ମିନିଟ୍‌ରେ ୩.୪୦ ଲକ୍ଷ କୋଟି ଟଙ୍କା ହ୍ରାସ ପାଇଛି । ଅନ୍ୟ ଅର୍ଥରେ କହିଲେ, ଆଜି ନିବେଶକ ୩.୪୦ ଲକ୍ଷ କୋଟି ହରାଇଛନ୍ତି ।