ବର୍ଷକରେ ଭୁବନେଶ୍ୱରରୁ ୫୮ କୋଟି ଟଙ୍କାର ସାଇବର ଠକେଇ । ରୁଜୁ ହୋଇଛି ୨୫୧ ଟି ମାମଲା । ମୁଣ୍ଡବିନ୍ଧା ପାଲଟିଲାଣି ସାଇବର ଠକଙ୍କ କାରସାଦି । ସେପଟେ ୨୨ କୋଟି ଟଙ୍କା ଫ୍ରିଜ ସହ ଫେରାଇଛି ସାଇବର ଥାନା । ୬୧ ଜଣ ଅଭିଯୁକ୍ତ ଗିରଫ । ଶତଚେଷ୍ଟା ପରେ ମଧ୍ୟ ସୁଧୁରୁନି ସ୍ଥିତି ।

କୁହାଯାଏ ଯେ ରାଜଧାନୀ ଭୁବନେଶ୍ଵରରେ ସମ୍ଭ୍ରାନ୍ତ ଓ ଶିକ୍ଷିତ ଲୋକ ବସବାସ କରନ୍ତି । କିନ୍ତୁ ଏହି ଚାଲାକ ଲୋକଙ୍କୁ ଚୂନ ଲଗାଇଛନ୍ତି ସାଇବର ଠକ । ୨୦୨୫ ମସିହାରେ ଭୁବନେଶ୍ୱର ସାଇବର ଥାନାରେ ୨୫୧ ଟି ମାମଲା ରୁଜୁ ହେବା ସହ ୫୭ କୋଟି ୫୮ ଲକ୍ଷ ଟଙ୍କା ଠକେଇ ହେଇଛି । ଅତ୍ୟାଧୁନିକ ଜ୍ଞାନକୌଶଳ, ମାନବସମ୍ବଳ ବୃଦ୍ଧି, ଫୋରନସିକ ସାଇନ୍ସର ବ୍ୟବହାର ଓ ଆଇଟି ଏକ୍ସପର୍ଟ ଙ୍କ ସୁପରିଚାଳନା ଯୋଗୁଁ ୨୨ କୋଟିରୁ ଉର୍ଦ୍ଧ୍ବ ଟଙ୍କା ଫେରସ୍ତ ଓ ଫ୍ରିଜ ହୋଇଛି । ମାମଲାରେ ୬୧ ଜଣଙ୍କୁ ଗିରଫ କରାଯାଇଛି । ମ୍ୟୁଲ ଆକାଉଣ୍ଟ, ଫେକ ସୀମ ଜରିଆରେ ଠକେଇ ବୃଦ୍ଧି ପାଉଛି ।

ସାଇବର କ୍ରାଇମ କୋଡ଼ିନେସନ ସେଣ୍ଟରର ତଥ୍ୟ ମଧ୍ୟ ଉଭୟ ସାଧାରଣ ଲୋକ ଓ ତଦନ୍ତକାରୀ ସଂସ୍ଥା ପାଇଁ ଚ୍ୟଲେଞ୍ଜ ଆଣି ଦେଇଛି । ୨୦୨୫ରେ ସାରା ଦେଶରେ ୧୯ ହଜାର ୮ ଶହ ୧୨ କୋଟି ଟଙ୍କାର ଠକେଇ ହୋଇଛି । ଏଣୁ ଏବେ ନିଜେ ସଚେତନ ହେବାର ସମୟ ଆସିଛି । ଘଟଣା ଘଟିବାର ୩ ଘଣ୍ଟା ମଧ୍ୟରେ ୧୯୩୦ ନମ୍ବରରେ ତୁରନ୍ତ କଲ କରିବାକୁ ପରାମର୍ଶ ଦିଆଯାଇଛି । ମୋବାଇଲ ହଜିଲେ ନିର୍ଦ୍ଧିଷ୍ଟ ୱେବସାଇଟ ଜରିଆରେ ଅଭିଯୋଗ କରିପାରିବେ । ଏହାବାଦ ମଧ୍ୟ ସଂଚାର ସାଥି ୱେବସାଇଟରେ ସେହି ସମୟରେ ଅଭିଯୋଗ କଲେ ପୋଲିସ ସାଇବର ଠକଙ୍କୁ ଧରିବାରେ ସମର୍ଥ ହୋଇପାରିବ । ଫିଜିକାଲ କ୍ରାଇମ ଠାରୁ ବର୍ତ୍ତମାନ ସାଇବର କ୍ରାଇମ ବଢିବାରେ ଲାଗିଛି । ଡିଜିଟାଲ ଯୁଗରେ ବିନା ହତିଆରରେ ଅପରାଧ ଘଟାଉଥିବା ଅଦୃଶ୍ୟ ଠକ ପୋଲିସ ପାଇଁ ମୁଣ୍ଡବିନ୍ଧାର କାରଣ ପାଲଟିଛନ୍ତି ।