ଓଡିଶାରୁ ଗାଡି ଚୋରି କରି ଆନ୍ଧ୍ରପ୍ରଦେଶର କରୁଥିଲେ ବିକ୍ରୀ । ବେଶୀ କିଛି ପରିଶ୍ରମ କରିବାକୁ ପଡୁନଥିଲା । ଟିକେ ମୁଣ୍ଡ ଖଟେଇ ମାଲେ ମାଲ୍ ହେଉଥିଲେ ଦୁଇ ଚୋର । ହେଲେ ଚୋର ଘର ସବୁଦିନ ଅନ୍ଧାର ନୁହେଁ । ଶେଷରେ ଧରାପଡିଗଲା ଚୋରି ।

ଗତ କିଛି ଦିନ ଧରି ଖୋର୍ଦ୍ଧା ଜିଲ୍ଲା ନିରାକାରପୁର ଅଂଚଳରେ ଗାଡି ଚୋରି ବଢିବାରେ ଲାଗିଛି । ପୁରୀ ଜିଲ୍ଲା ଡେଲାଙ୍ଗ ଓ ଗଡିଶାଗୋଦା ଥାନା ଅଞ୍ଚଳର କିଛି ଉଚ୍ଚଶିକ୍ଷିତ ଯୁବକ ଟଙ୍କା ରୋଜଗାର ଆଶାରେ ନିରାକାରପୁରରେ ଘରଭଡା ନେଇ ରହି ଚୋରି କରୁଛନ୍ତି । ଆଉ ସୁଯୋଗ ପାଇ ଅତି ଚତୁରତାର ସହିତ ବିଳମ୍ବିତ ରାତିରେ ଗାଡି ଚୋରି କରି ନେଇ ଆନ୍ଧ୍ରପ୍ରଦେଶର ଦଲାଲଙ୍କ ସହାୟତାରେ ଆନ୍ଧ୍ରପ୍ରଦେଶରେ କମମୂଲ୍ୟରେ ବିକ୍ରୀ କରି ବିନା ପରିଶ୍ରମରେ ଭଲ ରୋଜଗାର କରୁଛନ୍ତି ।

ନିକଟରେ ନିରାକାରପୁର ଅଂଚଳର ହିଟୁ ପ୍ରଧାନ ଭଡାଘର ଗ୍ରୀଲ୍ ଭାଙ୍ଗି ବୁଲେଟ୍ ମୋଟର ସାଇକେଲ ଚୋରି ହୋଇଥିବା ନେଇ ଥାନାରେ ଲିଖିତ ଅଭିଯୋଗ କରିଥିଲେ । ଅନୁରୂପ ଭାବରେ ନିରାକାରପୁର ଅଂଚଳରୁ ଆଉ କେତୋଟି ଗାଡି ଚୋରି ହୋଇଥିବା ନେଇ ନିରାକାରପୁର ଥାନାରେ ଲିଖିତ ଅଭିଯୋଗ ହୋଇଥିଲା । ଏନେଇ ଚୋର ମାନଙ୍କ ଟେର୍ ପାଇ ପାରିନଥିଲା ନିରାକାରପୁର ପୋଲିସ ।

ଗତ ୧୦ଦିନ ପୂର୍ବରୁ ଆନ୍ଧ୍ରପ୍ରଦେଶ ସୋମପେଟା ପୋଲିସ ପେଟ୍ରୋଲିଂ କରୁଥିବା ସମୟରେ ୩ଟି ଚୋରା ଗାଡି ଜବତ କରି ଜଣେ ଅଭିଯୁକ୍ତକୁ ଗିରଫ କରି ତଦନ୍ତ ଚଳାଇଥିଲା ପୋଲିସ । ଆନ୍ଧ୍ରପ୍ରଦେଶ ପୋଲିସ ନିରାକାରପୁରର ରାହୁଳହଜ ନାମକ ଏକ ଯୁବକର ଭଡା ଘରେ ଚଢ଼ାଉ କରି ଅଭିଯୁକ୍ତ ଜଣଙ୍କୁ ଗିରଫ କରିଛି । ସେପଟେ ମାଷ୍ଟରମାଇଣ୍ଡ ଗଡିଶାଗୋଦା ବିଣ୍ଡିପୁର ଗ୍ରାମର ପ୍ରମୋଦ ପାଇକରାୟଙ୍କ ପୁଅ ପ୍ରଦୀପ ପାଇକରାୟ (ପଦି) ଘଟଣାସ୍ଥଳରୁ ଫେରାର ମାରିଛି । ଖବର ପାଇ ନିରାକାରପୁର ପୋଲିସ ସୋମପେଟା ଥାନାରେ ପହଞ୍ଚି ତିନୋଟି ମୋଟର ସାଇକେଲ ଜବତ କରି ଆଣିଥିବା ଜଣାପଡିଛି । ତେବେ ଉପଯୁକ୍ତ କାଗଜପତ୍ର ଦେଖାଇଲେ ଗାଡି ଗୁଡିକୁ ଚୋରି ହୋଇଥିବା ବ୍ୟକ୍ତିମାନଙ୍କୁ ଦିଆଯିବ ବୋଲି ଜଣାପଡିଛି ।