ନୂଆଦିଲ୍ଲୀ: ଅଣ୍ଡରୱାର୍ଲ୍ଡରୁ ରାଜନୀତିକୁ ଆସିଥିଲେ । ଦିନେ ତାଙ୍କ ନାଁ ଶୁଣିଲେ ଥରୁଥିଲା ମହାରାଷ୍ଟ୍ର । ମୁମ୍ବାଇରେ 'Daddy' କହିଲେ ଲୋକେ ତାଙ୍କୁ ଚିହ୍ନୁଥିଲେ । ପାଖାପାଖି ୧୮ ବର୍ଷ ଜେଲ୍‌ର କଳା କୋଠରୀରେ ସଜ୍ଜା କାଟିବା ପରେ ଏବେ ମିଳିଛି ମୁକ୍ତି । ଅଣ୍ଡରୱାର୍ଲ୍ଡ ଡନ୍ ଅରୁଣ ଗୱଲିଙ୍କୁ ବେଲ୍ ଦେଇଛନ୍ତି ସୁପ୍ରିମକୋର୍ଟ । ୨୦୦୭ରେ ଶିବ ସେନା କର୍ପୋରେଟର୍ କମଲାକର ଜାମାସନ୍ଦେକର ହତ୍ୟା ମାମଲାରେ, ଅରୁଣ ଗୱଲିଙ୍କୁ ହୋଇଥିଲା ଆଜୀବନ କାରାଦଣ୍ଡାଦେଶ ।

୨୦୧୨ରୁ ଅରୁଣ ଗୱଲି ନାଗପୁର ଜେଲ୍‌ରେ ସଜ୍ଜା କାଟୁଥିଲେ । ଜାମାସନ୍ଦେକର ହତ୍ୟା ମାମଲାରେ ମୁମ୍ବାଇର ଏକ କୋର୍ଟ ତାଙ୍କୁ ଆଜୀବନ ସଜ୍ଜା ଶୁଣାଇଥିଲେ । ପ୍ରାୟ ୧୮ ବର୍ଷ ଧରି ଅରୁଣ ଗୱଲି ସଜ୍ଜା କାଟିବା ପରେ ସୁପ୍ରିମକୋର୍ଟ ୭୩ ବର୍ଷୀୟ ଅରୁଣ ଗବଲିଙ୍କୁ ମୁକ୍ତ କରିଛନ୍ତି । ବୟସାଧିକ କାରଣରୁ ମୁକ୍ତ କରାଯାଇଥିବା ସୂଚନା ଦେଇଛନ୍ତି ସର୍ବୋଚ୍ଚ ଅଦାଲତ ।

ଅରୁଣ ଗବଲି କିଏ ?

୧୯୫୫ରେ ମହାରାଷ୍ଟ୍ରର ଅହମଦନଗରରେ ଜନ୍ମିତ ଅରୁଣ ଗୱଲି ୧୯୭୦ରେ ତାଙ୍କ ଭାଇ କିଶୋରଙ୍କ ସହ ମୁମ୍ବାଇ ଅଣ୍ଡରୱାର୍ଲ୍ଡ ଦୁନିଆରେ ପାଦ ଥାପନ୍ତି । ସମୟ ସହ ଅପରାଧ ଦୁନିଆରେ ବାଦଶାହ ପାଲଟି ଯାଏ ଗୱଲି । ୧୯୮୮ରେ ହୋଇଯାଏ ଗ୍ୟାଙ୍ଗଷ୍ଟର, ଦାଗଡ଼ି ଚାୱଲ ସ୍ଥିତ ଘରୁ ଚଳାଏ ଗ୍ୟାଙ୍ଗ । ସମୟ ବଦଳିବା ସହ ବଢ଼େ ଗୱଲିର କ୍ଷମତା, ଦାଉଦ୍ ଇବ୍ରାହିମ୍ ସହ ଆରମ୍ଭ ହୁଏ ପ୍ରତିଯୋଗୀତା । ଯାହାକୁ ନେଇ ୧୯୯୪ରେ ଗ୍ୟାଙ୍ଗ ୱାର ବି ହୁଏ ।

ଗ୍ୟାଙ୍ଗଷ୍ଟରରୁ MLA

ମୁମ୍ବାଇର ଅଣ୍ଡରୱାର୍ଲ୍ଡର ଛାଇ ଯାଇଥିବା ଅରୁଣ ଗୱଲି ୨୦୦୦ ମସିହାରେ ରାଜନୀତିକୁ ଆସେ । ୨୦୦୪ରେ ବାଇକୁଲ୍ଲା ଆସନରୁ ନିର୍ବାଚିତ ହୋଇ ବିଧାନସଭା ଯାଆନ୍ତି । ଆଉ ୨୦୦୭ରେ ରାଜନୈତିକ ଶତ୍ରୁତାରୁ ହୁଏ ଶିବ ସେନା କର୍ପୋରେଟର୍ କମଲାକର ଜାମାସନ୍ଦେକରଙ୍କ ହତ୍ୟା । ସାମାସନ୍ଦେକରଙ୍କ ବାସଭବନ ଆଗରେ ତାଙ୍କୁ ଗୁଳି କରି ହତ୍ୟା କରାଯାଏ । ଆଉ ଏହି ମାମଲାର ଟ୍ରାଏଲ୍ ୨୦୧୨ରେ ସରେ, କୋର୍ଟ ଅରୁଣ ଗୱଲିଙ୍କୁ ଶୁଣାନ୍ତି ଆଜୀବନ କାରାଦଣ୍ଡ ।

ଅପରାଧ ସମ୍ପର୍କିତ ଅଧିକ ଖବର ପଢ଼ନ୍ତୁ

ସେବେଠୁ ନାଗପୁର କେନ୍ଦ୍ରୀୟ କାରାଗାରରେ ସଜ୍ଜା କାଟୁଥିଲା ଅରୁଣ ଗୱଲି । ଗ୍ୟାଙ୍ଗଷ୍ଟରରୁ ବିଧାୟକ ହେବା ଯାଏଁ ହେଡଲାଇନ୍‌ରେ ରହୁଥିବା ଗୱଲି ଏବେ ଜେଲ୍‌ରୁ ମୁକୁଳିଛି । ଦଶନ୍ଧି ପରେ ପୁଣି ଥରେ ଚର୍ଚ୍ଚାକୁ ଆସିଛି ଅରୁଣ ଗୱଲି । ଜେଲ୍‌ରୁ 'Daddy' ମୁକୁଳିବା ପରେ ଏବେ ଉଷ୍ମ ହୋଇଛି ମହାରାଷ୍ଟ୍ର ରାଜନୀତି ।

Argus News | argus news | Odisha Latest News, Breaking News, Trending News, Live TV