Crime in Odisha / କ୍ଲିନିକ୍‌ରୁ ବାହାରୁଥିଲେ ଡାକ୍ତର, ଅତର୍କିତ ଆସି ଚୋଟ ପରେ ଚୋଟ ପକାଇଲେ ଦୁର୍ବୃତ୍ତ

ସୋର (ବାଲେଶ୍ଵର): ପାର୍ବଣରେ ମସଗୁଲ୍ ଥିଲା ସହର । ବିଶ୍ଵକର୍ମାଙ୍କୁ କରୁଥିଲା ଆବାହନ । ସନ୍ଧ୍ୟାରେ ଭିଡ଼ ବଢ଼ୁଥିବା ବେଳେ ରାସ୍ତା ଉପରେ ଡାକ୍ତରଙ୍କୁ ହାଣି ପକାଇଲେ ଦୁର୍ବୃତ୍ତ । ଏଭଳି ଅଭାବନୀୟ ଘଟଣା ଘଟିଛି ସୋର ଥାନା ଅନ୍ତର୍ଗତ କଲେଜ ଛକରେ ।

ଦୁର୍ବୃତ୍ତଙ୍କ ଆକ୍ରମଣରେ ଶିଶୁ ରୋଗ ବିଶେଷଜ୍ଞ ଡାକ୍ତର ବ୍ରଜ ସୁନ୍ଦର ସ୍ଵାଇଁ ଗୁରୁତର ଆଘାତ ହୋଇଛନ୍ତି । ଡାକ୍ତର ବ୍ରଜ ସୁନ୍ଦରଙ୍କୁ ନିକଟସ୍ଥ ଏକ କ୍ଲିନିକ୍‌ରେ ଭର୍ତ୍ତି କରାଯାଇଛି । ସୂଚନା ଅନୁସାରେ, ବୁଧବାର ସନ୍ଧ୍ୟାରେ ସୋର କଲେଜ ଛକ ନିକଟ କ୍ଲିନିକ୍‌ରେ ରୋଗୀ ଦେଖି ବାହାରୁଥିଲେ ଡାକ୍ତର ବ୍ରଜ ସୁନ୍ଦର ସ୍ଵାଇଁ ।

ଡାକ୍ତର ବାବୁ କ୍ଲିନିକ୍ ବନ୍ଦ କରି ଗାଡ଼ିକୁ ଯିବା ସମୟରେ ହଠାତ୍ ୩ଟି ବାଇକ୍‌ରେ ଆସିଥିଲେ ଛଅ ଜଣ ମୁଖାପିନ୍ଧା ଦୁର୍ବୃତ୍ତ । ଆଉ ଡାକ୍ତର ବାବୁ କିଛି ବୁଝିବା ଆଗରୁ ଧରିଥିବା କଟୁରିରେ ଚୋଟ ପରେ ଚୋଟ ପକାଇ ଚାଲିଥିଲେ । ଫଳରେ ଡାକ୍ତରଙ୍କ ବେକ ପଛ ଭାଗରେ କ୍ଷତ ସୃଷ୍ଟି ହୋଇଛି ।

ତେବେ ବାଇକ୍‌ରେ ଆସି ଛଅ ଜଣ ଦୁର୍ବୃତ୍ତ ଡାକ୍ତର ବାବୁଙ୍କୁ କାହିଁକି ହାଣିଲେ ? ଆକ୍ରମଣ ପଛରେ ବ୍ୟକ୍ତିଗତ ଶତ୍ରୁତା ରହିଛି ନା କାରଣ ଆଉ କିଛି ? ମରଣାନ୍ତକ ଆକ୍ରମଣର କାରଣ ଅସ୍ପଷ୍ଟ ରହିଥିବା ବେଳେ ଘରୋଇ କ୍ଲିନିକରେ ଚିକିତ୍ସିତ ହେଉଛନ୍ତି ଡାକ୍ତର । ସୋର ଥାନା ପୋଲିସ ଛାନଭିନ୍ ଆରମ୍ଭ କରିଛି ।