ବେଙ୍ଗାଲୁରୁ: ବିଳମ୍ବ ପାଲଟିଲା ବିଡ଼ମ୍ବନା । ଖାଦ୍ୟ ଡେରିରେ ଆଣି ପହଞ୍ଚିବାରୁ ଜୋମାଟୋ ଡେଲିଭରି ବୟଙ୍କୁ ପିଟିଲେ ଦୁଇ ଯୁବକ । ରବିବାର ବେଙ୍ଗାଲୁରୁ ସହରରେ ଏ ଘଟଣା ଘଟିଛି । ଶୋଭା ଥିଏଟର ନିକଟରେ ଜୋମାଟୋ ଡେଲିଭରି ବୟଙ୍କୁ ସର୍ବସାଧାରଣରେ ମାଡ଼ ମରାଯାଇଥିବା ବେଳେ ଭାଇରାଲ୍ ହେଉଛି ଭିଡିଓ ।

ଭାଇରାଲ୍ ଭିଡିଓରେ ଦେଖା ଯାଉଛି, ଡେଲିଭରି ବୟ ଜଣଙ୍କ ଅର୍ଡର ନେଇ ପହଞ୍ଚୁଛନ୍ତି । ଆଉ ପହଞ୍ଚିବା ମାତ୍ରେ ଦୁଇ ଜଣ ଯୁବକ ତାଙ୍କୁ ଘେରି ଯାଇ ମାଡ଼ ମାରୁଛନ୍ତି । ଏପରିକି ତାଙ୍କ ବାଇକ୍‌ ପଛରେ ଥିବା ଡେଲିଭରି ବ୍ୟାଗ୍ ଉପରେ ଚଢ଼ି ଛିଡ଼ା ହେଉଛନ୍ତି ଜଣେ ଯୁବକ । ନିକଟରେ ପଡ଼ିଥିବା ପ୍ଲାଷ୍ଟିକ୍ କଣ୍ଟେନର ଆଣି ତାଙ୍କ ମୁଣ୍ଡକୁ ପିଟିବା ବେଳେ ଅନ୍ୟ ଜଣେ ଚେୟାର୍ ଫିଙ୍ଗୁଛନ୍ତି ।

ମାମଲାରେ ପୋଲିସ ତୁରନ୍ତ ହସ୍ତକ୍ଷେପ କରିବା ସହ ଡେଲିଭରି ଏଜେଣ୍ଟ ଓ ମାଡ଼ ମାରିଥିବା ଦୁଇ ଯୁବକଙ୍କ ବୟାନ ରେକର୍ଡ କରିଛି । ତେବେ ପୋଲିସରେ ଜୋମାଟୋ ଡେଲିଭରି ବୟ ଜଣଙ୍କ ବିଧିବଦ୍ଧ ଭାବେ କୌଣସି ମାମଲା ରୁଜୁ କରି ନଥିବା ପ୍ରକାଶ କରିଛନ୍ତି ।

ଏହା ପୂର୍ବରୁ ଖାଦ୍ୟ ଦେବାକୁ ଆସିଥିବା ଜଣେ ଡେଲିଭରି ଏଜେଣ୍ଟଙ୍କୁ ମହିଳା ଚାପୁଡ଼ା ମାରିଥିଲେ । ରାତିରେ ଖାଦ୍ୟ ମଗାଇବାରେ ବାରମ୍ବାର ବିଫଳ ହେବାରୁ ଚାପୁଡ଼ା ମାରିଥିଲେ ମହିଳା । ଆଉ ଏବେ ପୁଣି ଥରେ ଦୁଇ ଯୁବକ, ଜଣେ ଡେଲିଭରି ବୟଙ୍କୁ ମାଡ଼ ମାରିଥିବା ବେଳେ ଭିଡିଓ ଭାଇରାଲ୍ ହେବାରେ ଲାଗିଛି ।