ଭୁବନେଶ୍ଵର: ମହିଳାଙ୍କ ଭଳି ଅସୁରକ୍ଷିତ ଛୋଟ ଛୁଆ । ରାଜଧାନୀ ଭୁବନେଶ୍ଵରରୁ ଛୁଆଙ୍କୁ ଟାର୍ଗେଟ୍ କରୁଛନ୍ତି ଲୁଟେରା । କୌଣସି ବାହାନାରେ ଏକୁଟିଆ ଖେଳୁଥିବା କିମ୍ବା ବୁଲୁଥିବା ଛୁଆଙ୍କ ପାଖକୁ ଆସୁଛନ୍ତି । ଆଉ ସୁଯୋଗ ଦେଇ ଛୁଆଙ୍କ ବେକରେ ଛୁରି ଲଗାଇ ସୁନା ଗହଣା ଲୁଟି ନେଉଛନ୍ତି ।

ରାଜଧାନୀ ଭୁବନେଶ୍ଵରରେ ସ୍ପଷ୍ଟ ଦିବାଲୋକରେ ଏଭଳି ଲୁଟ୍ କରୁଛନ୍ତି ଲୁଟେରା । କମିଶନରେଟ୍ ପୋଲିସ ଏଭଳି ଧ୍ରୁତ ଲୁଟେରାକୁ ଗିରଫ କରିଛି । ସୂଚନା ଅନୁସାରେ, ଗିରଫ ଅଭିଯୁକ୍ତ ଜଣଙ୍କ ତପନ କୁମାର ସେଠୀ । ତପନର ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଅଞ୍ଚଳରେ । ତା' ନିକଟରୁ ଗୋଟିଏ ଛୁରି ସମେତ ସୁନା ଚେନ ଓ ଲକେଟ ପୋଲିସ ଜବତ କରିଛି ।

ଏଥିସହ ପଢ଼ନ୍ତୁ: T20 ବିଶ୍ଵକପ୍‌ରୁ ବାଂଲାଦେଶ ବିଦା ପରେ ବିଚଳିତ ପାକିସ୍ତାନ; ICCକୁ ଧମକ ଦେଲେ ନକ୍‌ଭୀ

ସୂଚନା ଅନୁସାରେ, ଶୁକ୍ରବାର ସାଲିଆସାହି ତାରିଣୀ ବସ୍ତିରେ ଖେଳୁଥିଲା ଦେଢ଼ ବର୍ଷର ଛୁଆ । ସେହି ସମୟରେ ଛୁଆର ବେକରେ ସୁନା ଚେନ ଦେଖି ତପନ ଲୁଟିବା ପାଇଁ ଯୋଜନା କରିଥିଲା । ପ୍ରଥମେ ଛୋଟ ଛୁଆ ପାଖକୁ ଯାଇ ଅନ୍ୟ ଜଣଙ୍କର ଠିକଣା ପଚାରିଥିଲା ।

ଦେଢ଼ ବର୍ଷର ଛୁଆଟି ଘର ବାହାରକୁ ଆସିବା ମାତ୍ରେ ଧାରୁଆ ଛୁରି ଦେଖାଇ ଭୟଭୀତ କରାଇଥିଲା ତପନ । ଆଖି ପିଛୁଳାକେ ଛୋଟ ଛୁଆ ବେକରୁ ସୁନା ଚେନ ସହ ଲକେଟ ନେଇ ଫେରାର୍ ହୋଇ ଯାଇଥିଲା । ଏନେଇ ମୈତ୍ରୀ ବିହାର ଥାନରେ ଅଭିଯୋଗ ପରେ ପୋଲିସ ତପନକୁ କାବୁ କରି କୋର୍ଟ ଚାଲାଣ କରିଛି ।

ଏଥିସହ ପଢ଼ନ୍ତୁ: ୪୬୮ ଦିନ ପରେ ଫର୍ମକୁ ଫେରିଲେ ଅଧିନାୟକ ସୂର୍ଯ୍ୟକୁମାର; ପଡ଼ିଆରେ ଦେଲେ ବଡ଼ ବୟାନ

ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଅଞ୍ଚଳର ତପନ ନାଁରେ ପୂର୍ବରୁ ବିଭିନ୍ନ ଥାନାରେ ଥିବା ମାମଲାର ଖୋଳତାଡ଼ ଆରମ୍ଭ କରିଛି କମିଶନରେଟ୍ ପୋଲିସ । ସାଲିଆସାହିରେ ଦେଢ଼ ବର୍ଷର ଛୁଆ ବେକରେ ଛୁରି ଲଗାଇ ସୁନା ଚେନ ଲୁଟ୍ ପରେ ସମସ୍ତେ ଆତଙ୍କିତ ହୋଇ ପଡ଼ିଛନ୍ତି ।

ଘର ବାହାରେ ପିଲାଙ୍କୁ ଖେଳିବାକୁ ଛାଡ଼ୁଥିବା ଅଭିଭାବକ ଡରି ଯାଇଛନ୍ତି । ଯଦି ବସ୍ତି ଭିତରେ ପଶି ଲୁଟେରା ଛୁଆଙ୍କ ବେକରେ ଛୁରି ଲଗାଇବାକୁ ସାହସ କରୁଛି ତାହେଲେ ନିଛାଟିଆ ରାସ୍ତାରେ ଅପରାଧର କେଉଁ ସ୍ତରକୁ ଏମାନେ ଯାଇପାରିବେ ତାକୁ ନେଇ ବି ଚର୍ଚ୍ଚା ଜୋର୍ ଧରିଛି ।