ଭୁବନେଶ୍ଵର: ଅସୁରକ୍ଷିତ ଅଧରାତି, ମାତିଛନ୍ତି ଅପରାଧୀ । ରାଜଧାନୀରେ କମିଶନରେଟ ପୋଲିସକୁ ଖୋଲା ଚ୍ୟାଲେଞ୍ଜ ଦେଉଛନ୍ତି ଅପରାଧୀ । ରାତିର ଅନ୍ଧକାରରେ ଖୁଲମଖୁଲା ଖଣ୍ଡା ଧରି ବାଇକ୍‌ରେ ବୁଲୁଛନ୍ତି । ଯେଉଁଠି ଯାହାକୁ ପାଉଛନ୍ତି, ଲୁଟ୍ ପାଇଁ ଗୋଡ଼ାଉଛନ୍ତି । ସୋମବାର ବିଳମ୍ବିତ ରାତିରେ ବି ଏଭଳି ଘଟିଛି ପଟିଆ କିଟ୍ ଛକ ଅଞ୍ଚଳରେ । ରୋଗୀ ଦେଖି ଫେରୁଥିବା ଜଣେ ଡାକ୍ତରଙ୍କୁ ଦୁର୍ବୃତ୍ତ ଖଣ୍ଡା ଖଣ୍ଡା ଧରି ଗୋଡ଼ାଇଛନ୍ତି । ଏ ଚିତ୍ର ସିସିଟିଭିରେ କଏଦ ହୋଇଛି ।

ମିଳିଥିବା ସୂଚନା ଅନୁସାରେ, ରାତି ପ୍ରାୟ ସମୟ ଗୋଟାଏ ହେବ । ଡାକ୍ତର ବିଏସ୍‌ଲ୍ ରଥ ରୋଗୀ ଦେଖି ତାଙ୍କ ଘରକୁ ଫେରୁଥିଲେ । କିଟ୍ ଛକ ଦେଇ ଫେରିବା ସମୟରେ ଡାକ୍ତରଙ୍କ କାର୍‌କୁ ୨ଟି ବାଇକ୍‌ରେ ପିଛା କରିଥିଲେ ୬ ଜଣ ଦୁର୍ବୃତ୍ତ । ହାତରେ ଖଣ୍ଡା ଧରି ଡାକ୍ତରଙ୍କ ଗାଡ଼ିକୁ ଗୋଡ଼ାଇ ଗୋଡ଼ାଇ ଯାଇଥିଲେ । ପ୍ରଶାନ୍ତି ବିହାର ଦୁର୍ଗା ମଣ୍ଡପରେ କାର୍ ଅଟକାଇ ଡାକ୍ତରଙ୍କୁ ଆକ୍ରମଣ କରିବା ଲାଗି ଉଦ୍ୟମ ବି କରିଥିଲେ ଦୁର୍ବୃତ୍ତ । ଏପରିକି କାର୍ ଉପରକୁ ଖଣ୍ଡା ଫିଙ୍ଗି ଭୟଭୀତ କରାଇଥିଲେ ।

ଏଥିସହ ପଢ଼ନ୍ତୁ: ମୁଖ୍ୟ ଅଭିଯୁକ୍ତଙ୍କୁ ଫସାଇବା ପାଇଁ ଏସିଡ ଆକ୍ରମଣର ଷଡ଼ଯନ୍ତ୍ର କରିଥିଲେ ବାପ-ଝିଅ!

ହେଲେ ଡାକ୍ତର ଜଣଙ୍କ ଦ୍ରୁତ ଗତିରେ କାର୍ ନେଇ ସେଠାରୁ ପଳାଇଥିଲେ । ତଥାପି ଡାକ୍ତରଙ୍କୁ ଆପାର୍ଟମେଣ୍ଟ ଯାଏଁ ପିଛା କରିଥିଲେ ଦୁର୍ବୃତ୍ତ । ଡାକ୍ତର ଆପାର୍ଟମେଣ୍ଟ ଭିତରକୁ ପଳାଇ ଯିବା ପରେ ଦୁର୍ବୃତ୍ତମାନେ ଫାଟକ ନିକଟରୁ ଫେରି ଆସିଥିଲେ । ଏ ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ଏନେଇ ସକାଳେ ଇନ‌ଫୋସିଟି ଥାନାରେ ଡାକ୍ତର ରଥ ଅଭିଯୋଗ କରିବା ପରେ ପୋଲିସ ଛାନଭିନ୍ ଆରମ୍ଭ କରିଛି ।

ସିସିଟିଭି ଫୁଟେଜ୍‌କୁ ନେଇ ପୋଲିସ ତଦନ୍ତ ଆରମ୍ଭ କରିଛି । ଫୁଟେଜ୍‌ରୁ ପୋଲିସ ଦୁର୍ବୃତ୍ତଙ୍କୁ ଟିହ୍ନଟ କରିଥିବା କହୁଥିବା ବେଳେ ଏ ପର୍ଯ୍ୟନ୍ତ ସେମାନଙ୍କ ନିକଟରେ ପହଞ୍ଚି ପାରିନାହିଁ । ତେବେ କାହିଁକି ଡାକ୍ତର ରଥଙ୍କୁ ଦୁର୍ବୃତ୍ତ ଟାର୍ଗେଟ୍ କରିଥିଲେ ? ଆକ୍ରମଣ ଉଦ୍ୟମ ପଛର କାରଣ ଲୁଟ୍ ନା ଆଉ କିଛି ? ସେନେଇ କିଛି ସ୍ପଷ୍ଟ ହୋଇ ନଥିବା ବେଳେ ଦୁର୍ବୃତ୍ତ ଧରା ପଡ଼ିଲେ ଜଣାପଡ଼ିବ ପ୍ରକୃତ କାରଣ ।

ଏଥିସହ ପଢ଼ନ୍ତୁ: ପୋଲିସକୁ ଖୋଲା ଚ୍ୟାଲେଞ୍ଜ, ଦାଦାବଟି ନ ଦେବାରୁ ହୋଟେଲ୍‌ରେ ଭଙ୍ଗାରୁଜା

ଏହା ପୂର୍ବରୁ ଦୀପାବଳି ରାତିରେ ମଧ୍ୟ କିଛି ଦୁର୍ବୃତ୍ତ ଆତଙ୍କ ଖେଳାଇଥିଲେ । ଦୀପାବଳି ରାତି ପ୍ରାୟ ୧୦ଟା ହେବ ଭୁବନେଶ୍ଵରର ଭିଏସ୍ଏସ୍ ନଗର ସ୍ଥିତ 'ହୋଟେଲ୍ ଶ୍ରୀକ୍ଷେତ୍ର'ରେ ପହଞ୍ଚିଥିଲେ କିଛି ମଦ୍ୟପ । ହୋଟେଲ୍ ବନ୍ଦ ରହିଥିବା ବେଳେ କର୍ମଚାରୀଙ୍କ ବାରଣ ସତ୍ତ୍ଵେ ସେଠାରେ ମଦ୍ୟପାନ କରିଥିଲେ ।

ମଦ ପିଇବା ପାଇଁ ଚାଖଣା ମାଗିଥିଲେ ଦୁର୍ବୃତ୍ତ । ହେଲେ ହୋଟେଲ୍‌ରେ ଥିବା କର୍ମଚାରୀ ଚାଖଣା ନ ଦେବାରୁ ଦୁର୍ବୃତ୍ତ ସଂଘବଦ୍ଧ ଆକ୍ରମଣ କରିଛନ୍ତି । ହୋଟେଲ୍ କର୍ମଚାରୀଙ୍କୁ ଆକ୍ରମଣ କରିବା ସହ ଭିତରେ ପଶି ଦୁର୍ବୃତ୍ତ ଭଙ୍ଗାରୁଜା କରିଛନ୍ତି । ଏନେଇ ସହିଦନଗର ଥାନା ପୋଲିସରେ ଅଭିଯୋଗ କରିଛନ୍ତି ହୋଟେଲ ମାଲିକ । ଦାଦାବଟି ନ ଦେବାରୁ ଏଭଳି ଭଙ୍ଗାରୁଜା ହୋଇଥିବା ହୋଟେଲ ମାଲିକ କହିଛନ୍ତି ।