ଭୋପାଳ: ନୀଳ ଡ୍ରମ୍‌କୁ ନେଇ ପୁଣି ଚର୍ଚ୍ଚା । ବର୍ଷକ ମଧ୍ୟରେ ନୀଳ ଡ୍ରମରେ ଦୁଇଟି ଦୁଇଟି ବଡ଼ ହତ୍ୟାକାଣ୍ଡ ପରେ ପୁଣି ଚର୍ଚ୍ଚାକୁ ଆସିଛି । ମଧ୍ୟପ୍ରଦେଶରେ ଏକ ନୀଳ ଡ୍ରମରୁ ଜଣେ ନିଖୋଜ ଯୁବତୀଙ୍କ ଗଳିତ ମୃତଦେହ ମିଳିଛି । ମହିଳାଙ୍କ ହାତଗୋଡ଼କୁ ବାନ୍ଧି ଦିଆଯାଇଥିବା ବେଳେ ସେ ଗରବା ଡ୍ରେସ୍ ପିନ୍ଧିଛନ୍ତି ।

ମଧ୍ୟପ୍ରଦେଶର ଦେୱାସ ଜିଲ୍ଲାର ଅଭିଯୁକ୍ତଙ୍କ ଘରୁ ମିଳିଛି ନୀଳ ଡ୍ରମ । କୁହାଯାଉଛି, ଯୁବତୀ ଜଣଙ୍କୁ ଏକତରଫା ଭଲ ପାଉଥିବା ଯୁବକ ନୀଳ ଡ୍ରମରେ ଭର୍ତ୍ତି କରି ପାଣି ଭରି ଦେଇଥିଲେ । ଅଭିଯୁକ୍ତ ମନୁ ଯେତେବେଳେ ଜାଣିଲେ, ଯୁବତୀ ଆଉ କାହା ସହ ସମ୍ପର୍କରେ ଅଛନ୍ତି । ସେ ତାଙ୍କୁ ରାସ୍ତାରୁ ହଟାଇବାକୁ ନିଷ୍ପତ୍ତି ନେଇଥିଲେ ।

ଏଥିସହ ପଢ଼ନ୍ତୁ: ମୁମ୍ବାଇ ୨୬/୧୧ ଆତଙ୍କବାଦୀଙ୍କ ସହ ଲଢ଼ିଥିଲେ, ଏବେ ଗଞ୍ଜେଇ ଚୋରା ଚାଲାଣର କିଙ୍ଗପିନ୍; ରହିଛି ଓଡ଼ିଶା ଲିଙ୍କ୍

ମିଳିଥିବା ସୂଚନା ଅନୁସାରେ, ମୃତକ ହେଉଛନ୍ତି ୨୨ ବର୍ଷୀୟ ଲକ୍ଷିତା ଚୌଧୁରୀ । ତାଙ୍କୁ ସୋମବାର ହତ୍ୟା କରାଯାଇଛି । ଲକ୍ଷିତା ନିଖୋଜ ନେଇ ତିନିଦିନ ତଳେ ପରିବାର ଲୋକେ ଏତଲା ଦେଇଥିଲେ । ସୋମବାର କଲେଜ ଯାଇ ଘରକୁ ଫେରି ନଥିଲେ ଲକ୍ଷିତା । ଏହା ପରେ ଘର ଲୋକ ପୋଲିସରେ ଏତଲା ଦେଇଥିଲେ ।

ସୋମବାର ଲକ୍ଷିତାଙ୍କୁ ନୀଳ ଡ୍ରମ୍‌ରେ ଭର୍ତ୍ତି କରି ଭୈଶାଳୀ ଆଭେନ୍ୟୁ କଲୋନି ସ୍ଥିତ ଘରେ ରଖିଥିଲେ ଅଭିଯୁକ୍ତ ମନୁ । ମୃତଦେହ ଷଢ଼ିବା ଆରମ୍ଭ ହେବାରୁ ଦୁର୍ଗନ୍ଧ ହୋଇଥିଲା । ଲୋକଙ୍କ ଅଭିଯୋଗ କ୍ରମେ ପୋଲିସ ପହଞ୍ଚିଥିଲା । ଆଉ ନୀଳ ଡ୍ରମରୁ ବେଡସିଟ୍ ବନ୍ଧା ଅବସ୍ଥାରେ ମିଳିଥିଲା ଲକ୍ଷିତାଙ୍କ ଗଳିତ ମୃତଦେହ ।

ହତ୍ୟା ନେଇ ମନୁ ପୋଲିସକୁ କହିଛନ୍ତି, ଲକ୍ଷିତା ଆଉ କାହା ସହ ସମ୍ପର୍କରେ ଥିବା ଜାଣିବା ପରେ ସେ ରାଗି ଯାଇଥିଲେ । ସୋମବାର ଲକ୍ଷିତାଙ୍କୁ ତାଙ୍କ ଘରକୁ ଡାକି ହାତଗୋଡ଼ ବେଡସିଟ୍‌ରେ ବାନ୍ଧି ନୀଳ ଡ୍ରମରେ ଭର୍ତ୍ତି କରି ପାଣି ଫୁଲ୍ କରିଥିଲେ । ଆଉ ସେହି ଡ୍ରମକୁ ଘରେ ଛାଡ଼ି ପଳାଇଥିଲେ ।

ନୂଆ ନୁହେଁ ନୀଳ ଡ୍ରମ୍ ହତ୍ୟା

ତେବେ ନୀଳ ଡ୍ରମ୍ ବା ବ୍ଲୁ ଡ୍ରମ୍ ହତ୍ୟା ନୂଆ ନୁହେଁ । ଏହା ପୂର୍ବରୁ ଗତ ମାର୍ଚ୍ଚ ଓ ଅଗଷ୍ଟରେ ନୀଳ ଡ୍ରମ୍‌ରେ ହତ୍ୟା ଚର୍ଚ୍ଚାକୁ ଆସିଥିଲା । ମୀରଟରେ ଜଣେ ମହିଳା ତାଙ୍କ ପ୍ରେମିକଙ୍କ ସହ ମିଶି ସ୍ଵାମୀକୁ ହତ୍ୟା କରିବା ପରେ ଶରୀରକୁ ଖଣ୍ଡ ଖଣ୍ଡ କରି କାଟି ସିମେଣ୍ଟ ସହ ଡ୍ରମରେ ଭର୍ତ୍ତି କରିଥିଲେ ।

ଏଥିସହ ପଢ଼ନ୍ତୁ: ପ୍ରଥମେ ୧୨ ବର୍ଷର ଝିଅକୁ ମାରିଦେଲା ମାଆ, ପରେ ହାରିଦେଲେ ନିଜ ଜୀବନ

ସେହିଭଳି ରାଜସ୍ଥାନର ଅଲୱାରରେ ଦେଖିବାକୁ ମିଳିଥିଲା ସମାନ ଘଟଣା । ପ୍ରେମିକ ସହ ମିଶି ପତ୍ନୀ, ସ୍ଵାମୀଙ୍କୁ ହତ୍ୟା କରିଥିଲା । ଆଉ ରହୁଥିବା ଭଡ଼ା ଘରର ପ୍ରଥମ ମହଲାରେ ନୀଳ ଡ୍ରମରେ ରଖି ଦେଇଥିଲେ ସ୍ଵାମୀଙ୍କ ମୃତଦେହ । ସେତେବେଳେ ନୀଳଡ୍ରମରୁ ପୁରୁଷଙ୍କ ମୃତଦେହ ମିଳିଥିବା ବେଳେ ଏବେ ଯୁବତୀଙ୍କ ଗଳିତ ଶବ ମିଳିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।