Cyber Crime / ଇନଷ୍ଟାଗ୍ରାମରୁ ଆରମ୍ଭ ଠକେଇର ଖେଳ, ୨୪ ଲକ୍ଷ ହରାଇଲେ କନେଷ୍ଟବଳ

ଦିଲ୍ଲୀ ପୋଲିସର ସେଣ୍ଟ୍ରାଲ ଡିଷ୍ଟ୍ରିକ୍ଟ ସାଇବର ଥାନା ପୋଲିସ ଜଣେ ଠକକୁ ଗିରଫ କରିଛି । ଅଭିଯୁକ୍ତ ଜଣକ ଦିଲ୍ଲୀ ପୋଲିସର ଜଣେ ମହିଳା କନେଷ୍ଟବଳଙ୍କୁ ନିଜ ଜାଲରେ ଫସାଇ ପ୍ରାୟ ୨୪ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗ ହୋଇଛି । ନିଜକୁ କ୍ରିକେଟ୍ ଜଗତର ଜଣେ ବଡ଼ ହସ୍ତୀ ବୋଲି ପରିଚୟ ଦେଇ ସେ ମହିଳାଙ୍କ ବିଶ୍ୱାସ ଜିତିଥିଲା ଏବଂ ଅନଲାଇନ୍ ବେଟିଂ ପ୍ଲାଟଫର୍ମ ଜରିଆରେ ଟଙ୍କା ହଡ଼ପ କରିଥିଲା । ଗିରଫ ଅଭିଯୁକ୍ତର ନାମ ବିକ୍ରାନ୍ତ କୁମାର ଓରଫ ବିକି ତୋମର (୨୬) । ତାକୁ ଉତ୍ତରପ୍ରଦେଶର ବାଗପତ ସହ ଜଡ଼ିତ ଠିକଣାରୁ ଗିରଫ କରାଯାଇଛି ।

ଇନଷ୍ଟାଗ୍ରାମରେ ବନ୍ଧୁତା, ଅଧିକ ଲାଭର ଲୋଭ ଦେଖାଇ ଠକେଇ
ସୂଚନା ଅନୁଯାୟୀ, ଅଭିଯୁକ୍ତ ଇନଷ୍ଟାଗ୍ରାମ ଜରିଆରେ ମହିଳା କନେଷ୍ଟବଳଙ୍କ ସହ ବନ୍ଧୁତା ସ୍ଥାପନ କରିଥିଲା । ନିଜକୁ କ୍ରିକେଟ୍ ଜଗତର ଜଣେ ପ୍ରସିଦ୍ଧ ବ୍ୟକ୍ତି ବୋଲି ପରିଚୟ ଦେଇ ସେ ମହିଳାଙ୍କ ବିଶ୍ୱାସ ଜିତିଥିଲା । ଏହାପରେ ବିଭିନ୍ନ ସ୍ଥାନରେ ଟଙ୍କା ନିବେଶ କଲେ ଅଳ୍ପ ସମୟ ମଧ୍ୟରେ ବିପୁଳ ଲାଭ ମିଳିବ ବୋଲି ପ୍ରଲୋଭନ ଦେଖାଇଥିଲା ।

ଅଭିଯୁକ୍ତର କଥାରେ ବିଶ୍ୱାସ କରି ମହିଳା କନଷ୍ଟେବଳ ନିଜ ଜୀବନର ସଞ୍ଚିତ ଅର୍ଥ ନିବେଶ କରିଥିଲେ । ଏପରିକି ସେ ୧୨ ଲକ୍ଷ ଟଙ୍କାର ବ୍ୟକ୍ତିଗତ ଋଣ ନେବା ସହ ପରିଚିତ ଓ ସମ୍ପର୍କୀୟଙ୍କଠାରୁ ମଧ୍ୟ ଟଙ୍କା ଧାର ଆଣି ଅଭିଯୁକ୍ତକୁ ଦେଇଥିଲେ । ଏହିପରି ଭାବେ ମୋଟ ପ୍ରାୟ ୨୪ ଲକ୍ଷ ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି ।

୧xBet ସହ ଜଡ଼ିତ ସନ୍ଦିଗ୍ଧ ଆକାଉଣ୍ଟକୁ ୮ ଲକ୍ଷ ଟଙ୍କା ଟ୍ରାନ୍ସଫର
ଟଙ୍କା ଠକେଇ ସହ ଅଭିଯୁକ୍ତ ବିରୋଧରେ ଅନ୍ୟ ଏକ ଗୁରୁତର ଅଭିଯୋଗ ମଧ୍ୟ ଆସିଛି । ପୀଡ଼ିତାଙ୍କ ଅଭିଯୋଗ ଅନୁଯାୟୀ, ଅଭିଯୁକ୍ତ ତାଙ୍କଠାରୁ ପ୍ରାୟ ୮ ଲକ୍ଷ ଟଙ୍କା ଅନଲାଇନ୍ ବେଟିଂ ପ୍ଲାଟଫର୍ମ 1x.com (1xBet) ସହ ଜଡ଼ିତ କିଛି ସନ୍ଦିଗ୍ଧ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରାଇଥିଲା । ଏହା ବ୍ୟତୀତ, ଅଭିଯୁକ୍ତଙ୍କ ସହ ସାକ୍ଷାତ ସମୟରେ ସେ ତାଙ୍କ ସହ ଅଭଦ୍ର ବ୍ୟବହାର କରିଥିବା ମଧ୍ୟ ମହିଳା କନଷ୍ଟେବଳ ଅଭିଯୋଗ କରିଛନ୍ତି ।

ବାଗପତରୁ ଅଭିଯୁକ୍ତ ଗିରଫ, ଅନ୍ୟ ପୀଡ଼ିତଙ୍କୁ ଖୋଜୁଛି ପୋଲିସ
ମାମଲାର ତଦନ୍ତ କରି ସେଣ୍ଟ୍ରାଲ ଡିଷ୍ଟ୍ରିକ୍ଟ ସାଇବର ଥାନା ପୁଲିସର ଟିମ୍ ସର୍ଭେଲାନ୍ସ ଓ ବୈଷୟିକ ତଥ୍ୟ ଆଧାରରେ ଅଭିଯୁକ୍ତ ବିକ୍ରାନ୍ତ କୁମାର ଓରଫ ବିକି ତୋମରକୁ ଉତ୍ତରପ୍ରଦେଶର ବାଗପତ ସହ ଜଡ଼ିତ ଠିକଣାରୁ ଗିରଫ କରିଛି । ବର୍ତ୍ତମାନ ପୋଲିସ ଅଭିଯୁକ୍ତର ବ୍ୟାଙ୍କ ଆକାଉଣ୍ଟଗୁଡ଼ିକର ଯାଞ୍ଚ କରୁଛି । ଏହା ସହିତ, ଅଭିଯୁକ୍ତ ଏହିଭଳି ଉପାୟରେ ଆଉ କେତେଜଣଙ୍କୁ ଠକିଛି ଏବଂ ଏହି ଠକେଇ ପଛରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେନେଇ ତଦନ୍ତ ଜାରି ରହିଛି ।