ନିଜ ପୁତୁରାକୁ ହତ୍ୟା କରିବା ଅଭିଯୋଗରେ ଜଣେ ବ୍ୟକ୍ତିକୁ ଗିରଫ କରିଛି ପୋଲିସ । ପୁତୁରାର ତଣ୍ଟି ଚିପି ଜୀବନରୁ ମାରିଦେବା ପରେ ତାକୁ ଏକ ଡ୍ରମ୍‌ରେ ପୁରାଇ ପୋଡ଼ି ଦେଇଥିଲା ଅଭିଯୁକ୍ତ । ଏହି ଘଟଣା ଆଗ୍ରାର ମାଲପୁରା ଅଞ୍ଚଳରୁ ସାମ୍ନାକୁ ଆସିଛି । ପ୍ରାଥମିକ ତଦନ୍ତରୁ ମିଳିଥିବା ଖବର ଅନୁସାରେ ମୃତ ପୁତୁରା ଅଭିଯୁକ୍ତ ଦାଦାର ନାବାଳିକା ଝିଅର ଅଶ୍ଲୀଳ ଫଟୋ ଉଠାଇ ରଖିଥିଲା । ଆଉ ତାକୁ ବାରମ୍ବାର ବ୍ଲାକ୍‌ମେଲ କରୁଥିଲା । ମଙ୍ଗଳବାର ପୋଲିସ ପକ୍ଷରୁ ଏହି ସୂଚନା ମିଳିଛି ।

ଡେପୁଟି କମିଶନର ଅଫ୍ ପୋଲିସ ଅତୁଲ ଶର୍ମା କହିଛନ୍ତି ଏହି ଘଟଣା ଗତ ବର୍ଷ ଫେବ୍ରୁଆରୀ ୧୮ ତାରିଖରେ ଘଟିଥିଲା । ଅର୍ଦ୍ଧଦଗ୍ଧ ଶରୀରର ଡିଏନ୍ଏ ଟେଷ୍ଟ କରିବା ପରେ ମୃତଦେହ ଚିହ୍ନଟ ହୋଇଥିଲା । ଅଭିଯୁକ୍ତ ଦାଦା ଦେବୀରାମଙ୍କୁ ପୋଲିସ ସୋମବାର ଗିରଫ କରିଛି । ମୃତକ ହେଉଛି ରାକେଶ । ଯାହାର ବୟସ ଥିଲା ମାତ୍ର ୧୯ । ତାକୁ ପ୍ରଥମେ ଦେବୀରାମ ନିଜ ଦୋକାନକୁ ନେଇଥିଲେ, ତାପରେ ସେଠାରେ ଥିବା ଆଉ ଜଣେ ପୁତୁରା ନିତ୍ୟ କିଶୋର ସହ ମିଶି ରାକେଶର ବେକ ଚିପି ତାକୁ ମାରିଦେଇଥିଲେ ।

ତାପରେ ଉଭୟ ମିଶି ମୃତଦେହକୁ ଏକ ବ୍ଲୁ ଡ୍ରମ ଭିତରେ ରଖିଲେ । ସେହି ଡ୍ରମକୁ ଏମିତି ଏକ ସ୍ଥାନକୁ ନେଇଗଲେ, ଯେଉଁଠିକି କେହି ଯାଆ ଆସ କରନ୍ତି ନାହିଁ । ସେଠାରେ ଡ୍ରମରେ ପେଟ୍ରୋଲ ଢାଳି ନିଆଁ ଲଗାଇଦେଲେ । ପରେ ଅର୍ଦ୍ଧଦଗ୍ଧ ମୃତଦେହ ଉପରେ ପୋଲିସର ନଜର ପଡ଼ିଥିଲା । ସେହି ମୃତଦେହକୁ ଉଦ୍ଧାର କରି DNA ଟେଷ୍ଟ କରିଥିଲା ପୋଲିସ । ଏଥିରୁ ମୃତକ ରାକେଶର ପରିଚୟ ମିଳିଥିଲା । ପରେ ଏହି ଘଟଣାରେ ପୋଲିସ ଅଧିକ ତଦନ୍ତ ଆରମ୍ଭ କରିଥିଲା ।

ତଦନ୍ତରୁ ପୋଲିସ ଜାଣିବାକୁ ପାଇଥିଲା ଯେ, ଅଭିଯୁକ୍ତ ଦେବୀରାମ ଅତ୍ୟନ୍ତ କ୍ରୋଧିତ ହୋଇ ଏଭଳି କାଣ୍ଡ ଭିଆଇଛି । କାରଣ ରାକେଶ ତାଙ୍କ ନାବାଳିକା ଝିଅର ନଗ୍ନ ଫଟୋ ରଖି ତାକୁ ବ୍ଲାକ୍‌ମେଲିଂ କରୁଥିଲା । ତେବେ ପୋଲିସ ମୁଖ୍ୟ ଅଭିଯୁକ୍ତ ଦେବୀରାମଙ୍କୁ ଗିରଫ କରିଥିବା ବେଳେ ସହଯୋଗୀ ପୁତୁରା ନିତ୍ୟ କିଶୋର ଏବେ ଫେରାର ରହିଛି । ତାକୁ ଧରିବା ପାଇଁ ପୋଲିସ ପଚରାଉଚରା ଜାରି ରଖିଛି ।