ଅର୍ଗସ ବ୍ୟୁରୋ: ବଲିଉଡ୍‌ରୁ ଆସୁଛି ବଡ଼ ଖବର । ଅଭିନେତା ସୈଫ ଅଲ୍ଲୀ ଖାନଙ୍କୁ ହତ୍ୟା ଉଦ୍ୟମ ହୋଇଛି । ସୈଫଙ୍କ ମୁମ୍ବାଇ ବାନ୍ଦ୍ରା ସ୍ଥିତ ଘରେ ପଶି ଛୁରି ଭୁସି ହତ୍ୟା ଉଦ୍ୟମ କରିଛି ଦୁର୍ବୃତ୍ତ । ମିଳିଥିବା ସୂଚନା ଅନୁସାରେ, ରାତି ପ୍ରାୟ ୨ଟା ସମୟରେ ସୈଫ ଅଲ୍ଲୀ ଖାନଙ୍କୁ ଛୁରାମାଡ଼ ହୋଇଛି । ୨ରୁ ୩ ଥର ଛୁରାମାଡ଼ ହୋଇଥିବା କୁହାଯାଉଛି ।

ଏବେ ଅଭିନେତା ସୈଫ ଅଲ୍ଲୀ ଖାନଙ୍କୁ ଲୀଳାବତି ହସ୍ପିଟାଲରେ ଭର୍ତ୍ତି କରାଯାଇଛି । ତେବେ କିଏ ଓ କେଉଁ କାରଣରୁ ସୈଫ ଅଲ୍ଲୀ ଖାନଙ୍କୁ ଛୁରି ଭୁସିଲା ତାର ଛାନଭିନ୍ କରୁଛି ପୋଲିସ । କୁହାଯାଉଛି ଛୁରାମାଡ଼ ସମୟରେ ସୈଫ ପରିବାରର ଅନ୍ୟ ସଦସ୍ୟଙ୍କ ସହ ଘରେ ଶୋଇଥିଲେ ।

ପୋଲିସ ଅନୁସାରେ, ଛୁରାମାଡ଼ କରିଥିବା ଦୁର୍ବୃତ୍ତ ଚୋରି କରିବାକୁ ଆସିଥିଲା । ଘରର ସଦସ୍ୟ ଉଠିଯିବାରୁ ସେ ଖସି ପଳାଇଛି । ପୋଲିସ ମାମଲା ରୁଜୁ କରି ଦୁର୍ବୃତ୍ତଙ୍କୁ ଧରିବା ଲାଗି ଏକାଧିକ ଟିମ୍ ଗଠନ କରିଛି । ପୋଲିସ ମୁମ୍ବାଇ କ୍ରାଇମବ୍ରାଞ୍ଚ ମଧ୍ୟ ସମାନ୍ତରାଳ ଭାବେ ତଦନ୍ତ ଆରମ୍ଭ କରିଥିବା ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।