ଗୁଣି ସନ୍ଦେହରେ ରାତି ଅଧରେ ଘରୁ ଟେକି ନେଇ ପିଟିଲେ, ମରିଗଲା ଭାବି ଘର ଆଗରେ ଆଣି ଫିଙ୍ଗିଦେଲେ...

କେନ୍ଦ୍ରାପଡ଼ା/କଣ୍ଟାବାଞ୍ଜି: ରାତି ଅଧରେ ଦଳବଳ ହୋଇ ଆସିଲେ, ଶୋଇଥିବା ଅବସ୍ଥାରେ ଟେକିନେଇ ମନ ଭରିଲା ଯାଏଁ ମାଡ଼ ମାରିଲେ । ପୁଣି ମରିଗଲା ଭାବି ଘର ଆଗରେ ଆଣି ଫିଙ୍ଗି ପଳାଇଲେ । ଗୁଣି ଗାରେଡ଼ି ସନ୍ଦେହରେ ବୃଦ୍ଧଙ୍କୁ ଏଭଳି ମାଡ଼ ମରା ଯାଇଥିବା ଅଭିଯୋଗ ହୋଇଛି । ବାପପୁଅ ୩ ଜଣ ମିଶି ଅମାନବୀୟ ଭାବେ ବୃଦ୍ଧଙ୍କୁ ଏଭଳି ମାଡ଼ ମାରିଥିବା ଅଭିଯୋଗ ହୋଇଛି ।

କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଥାନା ବରେଇ ଗାଁରେ ଗୁଣି ସନ୍ଦେହରେ ବୃଦ୍ଧଙ୍କୁ ମାଡ଼ ମରାଯାଇଛି । ଗୁରୁତର ବୃଦ୍ଧଙ୍କୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଏନେଇ ମାର୍ଶାଘାଇ ଥାନାରେ ଅଭିଯୋଗ ହୋଇଥିବା ବେଳେ ପୋଲିସ ମେଡିକାଲରେ ପହଞ୍ଚି ବୃଦ୍ଧଙ୍କୁ ପଚରାଉଚରା କରିଛି ।

ଅଭିଯୋଗ ଅନୁସାରେ, ସେହି ଗାଁରେ ଜଣେ ଯୁବକଙ୍କ ପତ୍ନୀଙ୍କୁ ଗୁଣି କରାଯାଇଥିବା ସନ୍ଦେହ କରି ଆକ୍ରମଣକାରୀ ବୃଦ୍ଧ ଉମେଶ ଜାତିଙ୍କୁ ମାଡ଼ ମାରିଛନ୍ତି । ଶୋଇଥିବା ବେଳେ ଘରୁ ଟେକି ନେଇ ନିସ୍ତୁକ ମାଡ଼ ମାରିବା ପରେ ମରି ଯାଇଥିବା ଭାବି ଘର ଆଗରେ ଫିଙ୍ଗି ପଳାଇଛନ୍ତି । ପୋଲିସ ଘଟଣାର ତଦନ୍ତ କରୁଛି ।

ସେପଟେ ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ଥାନା ତାଲଚକେଲ ଗାଁରେ ମଧ୍ୟ ଗୁଣି ଗାରେଡ଼ି ସନ୍ଦେହରେ ବୃଦ୍ଧଙ୍କୁ ହୋଇଛି ମରଣାନ୍ତକ ଆକ୍ରମଣ । ୬୦ ବର୍ଷୀୟ ମୀନିକେତନ ବାଗଙ୍କୁ ୩ ଜଣ ଯୁବକ ଆକ୍ରମଣ କରିଥିବା ଅଭିଯୋଗ ହୋଇଛି । ମୀନିକେତନ ନିଜ ଭାଇଙ୍କ ସହ ଚାଷ ଜମିକୁ ଯାଉଥିବା ବେଳେ ଗାଁର ୩ ଯୁବକ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ କଣ୍ଟାବାଞ୍ଜି ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ବଙ୍ଗୋମୁଣ୍ଡା ପୋଲିସ ତଦନ୍ତ କରୁଛି ।

ଅପରାଧ ସମ୍ପର୍କିତ ଅଧିକ ଖବର ପଢ଼ନ୍ତୁ