ମୁମ୍ବାଇ: ଲୋକେ ଚାକିରି କରନ୍ତି, ଅର୍ଥ ସଞ୍ଚନ୍ତି । ଭାବିଥାନ୍ତି ଅବସର ପରେ ସଞ୍ଚିତ ଅର୍ଥରେ ଚଳିବେ, ବାର୍ଦ୍ଧକ୍ୟ ଭଲରେ ବିତାଇବେ । ଏଭଳି ଆଶା ରଖି ମହାରାଷ୍ଟ୍ରର ଜଣେ ସରକାରୀ ଚାକିରିଆ ଆକାଉଣ୍ଟରେ କୋଟିଏ ୨୦ ଲକ୍ଷ ଟଙ୍କା ରଖିଥିଲେ । ହେଲେ ଗୋଟିଏ ସ୍କାମ୍ ସବୁ ସାରିଦେଲା । ସଞ୍ଚିତ ଟଙ୍କା ସହ ଜୀବନ ଚାଲିଗଲା ।

ଏଭଳି ଘଟିଛି ମହାରାଷ୍ଟ୍ରର ପୁନେରେ । ଯେଉଁଠି ଜଣେ ଅବସରପ୍ରାପ୍ତ ୮୦ ବର୍ଷ ବୟସ୍କ ବୃଦ୍ଧଙ୍କ ମୃତ୍ୟୁ ହୋଇଛି । ଡିଜିଟାଲ୍ ଆରେଷ୍ଟ ସ୍କାମ୍‌ର ଶିକାର ହୋଇଥିବା ଜାଣିବା ପରେ ଉଡ଼ି ଯାଇଛି ବୃଦ୍ଧ ଜଣଙ୍କର ପ୍ରାଣ ବାୟୁ ।

ମିଳିଥିବା ସୂଚନା ଅନୁସାରେ, ଅବସରପ୍ରାପ୍ତ ସରକାରୀ ଅଧିକାରୀ ଜଣଙ୍କ ଅଗଷ୍ଟ ୧୬ରୁ ସେପ୍ଟେମ୍ବର ୧୭ ପ୍ରାୟ ମାସେ ଧରି ସ୍କାମର ଶିକାର ହୋଇଥିଲେ । ସାଇବର ଠକ ନିଜକୁ ମୁମ୍ବାଇ ସାଇବର ପୋଲିସ ଓ ସିବିଆଇ ଅଧିକାରୀ ଭାବେ ପରିଚିତ କରାଇ କରିଥିଲେ ଡିଜିଟାଲ୍ ଆରେଷ୍ଟ ।

ଏଥିସହ ପଢ଼ନ୍ତୁ: ଟ୍ରମ୍ପଙ୍କ ଏହି ୪ କାମ ସଫଳ ହେଲେ ଖସିଯିବ ସୁନା ସହ ରୂପା ମୂଲ୍ୟ !

ଅବସରପ୍ରାପ୍ତ ସରକାରୀ ଅଧିକାରୀ ଜଣଙ୍କର ୩ ଝିଅ ଥିବାବେଳେ ସେମାନେ ବିଦେଶରେ ରୁହନ୍ତି । ପୁନେର ସ୍ତ୍ରୀଙ୍କ ସହ ରହୁଥିଲେ ବୃଦ୍ଧ । ଆଉ ଏହାର ଫାଇଦା ନେଇଥିଲେ ସାଇବର ଠକ । ୩ ଝିଅଙ୍କୁ ମଧ୍ୟ ମନି ଲଣ୍ଡରିଂ ମାମଲାରେ ତଦନ୍ତ ପରିସରଭୁକ୍ତ କରାଯାଇଥିବା ନେଇ ବିଶ୍ଵାସ ଜନ୍ମାଇ ବୃଦ୍ଧଙ୍କୁ ୩ ଦିନ ପାଇଁ ଡିଜିଟାଲ୍ ଆରେଷ୍ଟ କରି ନେଇଥିଲେ ।

ଏନେଇ ମୃତକଙ୍କ ପତ୍ନୀ ମଙ୍ଗଳବାର ପୋଲିସରେ ଏତଲା ଦେଇଛନ୍ତି । ସେ କହିଛନ୍ତି, "ସ୍ଵାମୀଙ୍କୁ ମାନସିକ ଚାପ ଭିତରେ ରଖାଯାଇଥିଲା । ଜୀବନର ତମାମ ସଞ୍ଚିତ ଜମା ପୁଞ୍ଜି ହରାଇବା ପରେ ବି ସ୍ଵାମୀଙ୍କୁ ଅକଥନୀୟ ନିର୍ଯାତନା ଦେଉଥିଲେ ସାଇବର ଠକ ।"

ଏତଲା ଅନୁସାରେ, ଅକ୍ଟୋବର ୨୨ରେ ବୃଦ୍ଧ ଜଣଙ୍କ ଘରେ ଅଚେତ ହୋଇ ପଡ଼ି ଯାଇଥିଲେ । ଏହା ପରେ ତାଙ୍କୁ ମେଡିକାଲ୍ ନିଆଯାଇଥିବା ବେଳେ ମୃତ ଘୋଷଣା କରିଥିଲେ ଡାକ୍ତର । ପୋଲିସ ଅନୁସାରେ, ଏତେ ବଡ଼ ଠକେଇ ପରେ ବୃଦ୍ଧ ଜଣଙ୍କ ମାନସିକ ଭାବେ ଶକ୍ତ ଆଘାତ ପାଇଥିଲେ ।

କେମିତି ହେଲା ଠକେଇ ?

ଅଗଷ୍ଟ ୧୬ ତାରିଖରେ ବୃଦ୍ଧ ଜଣଙ୍କୁ ଏକ କଲ୍ ଆସେ । ଆଉ କଲ୍ କରିଥିବା ବ୍ୟକ୍ତି ନିଜକୁ ମୁମ୍ବାଇ ପୋଲିସର ଏନକାଉଣ୍ଟର ସ୍ପେସାଲିଷ୍ଟ ପରିଚୟ ଦିଅନ୍ତି । କୁହନ୍ତି, "ଆପଣଙ୍କ ବ୍ଯାଙ୍କ୍ ଆକାଉଣ୍ଟ ଏବଂ ଆଧାର ତଥ୍ୟର ଅପବ୍ୟବହାର ହେଉଛି । ଯାହାକି ଏକ ଘରୋଇ ଏୟାରଲାଇନ୍‌ର ମନି ଲଣ୍ଡରିଂ ସହ ଜଡ଼ିତ ।"

ପୁନେ ସାଇବର ପୋଲିସ ଅନୁସାରେ, ଏହା ପରେ ବୃଦ୍ଧଙ୍କୁ ଠକ କଲ୍ ପରେ କଲ୍ କରି ଚାଲନ୍ତି । କେତେବେଳେ IPS ଆଉ କେବେ ଦିଲ୍ଲୀ CBIର ବଡ଼ ଅଧିକାରୀ ପରିଚୟ ଦିଅନ୍ତି । କଲ୍‌ରେ ବୃଦ୍ଧ ଦମ୍ପତିଙ୍କୁ ଗିରଫ କରିବା ନେଇ କୁହନ୍ତି । ବୃଦ୍ଧଙ୍କୁ ଫୋନ୍ କ୍ୟାମେରା ଅନ୍ ରଖିବା ଲାଗି କହି ଦମ୍ପତିଙ୍କୁ ୩ ଦିନ ପର୍ଯ୍ୟନ୍ତ ଡିଜିଟାଲ୍ ଆରେଷ୍ଟ କରି ନିଅନ୍ତି ।

ଏଥିସହ ପଢ଼ନ୍ତୁ: ଭାରତର ବଡ଼ ଠକେଇ: ବ୍ୟବସାୟୀଙ୍କୁ ଅନଲାଇନ୍ ଗିରଫ କରି ୧୮ ଆକାଉଣ୍ଟରେ ୫୮ କୋଟି ଲୁଟ୍

ଆଉ ୩ ଦିନର ଡିଜିଟାଲ୍ ଆରେଷ୍ଟରେ ନେଇ ଯାଆନ୍ତି ସମସ୍ତ ବ୍ୟାଙ୍କ ଆକାଉଣ୍ଟ ତଥ୍ୟ ସହ ଆଧାର କାର୍ଡର ବିବରଣୀ । ସମସ୍ତ ତଥ୍ୟ ହାସଲ ପରେ ଠକ ୫ଟି ଆକାଉଣ୍ଟକୁ ସମସ୍ତ ଟଙ୍କା ଟ୍ରାନ୍ସଫର କରି ନିଅନ୍ତି । ଆଉ ଠକଙ୍କ ଫୋନ୍ ହଠାତ୍ କଟିବା ପରେ ଦମ୍ପତି ଜାଣି ପାରନ୍ତି ସେମାନେ ଠକେଇର ସିକାର ହୋଇଛନ୍ତି । ଆଉ ପୋଲିସରେ ଅଭିଯୋଗ କରନ୍ତି ।