ପୁଣି ଭାଇରାଲ ହେଲା ଶ୍ରୀମନ୍ଦିର ଭିତର ବେଢ଼ା ଫଟୋ । ଫଟୋଟିରେ ଶ୍ରୀମନ୍ଦିର ଭିତର ବେଢ଼ାରେ ଥିବା ରୋହିଣୀ କୁଣ୍ଡ ,ବିମଳା ମନ୍ଦିର ସମ୍ମୁଖ ସିଂହ ,ସାକ୍ଷୀଗୋପାଳ ଆଦିର ଭ୍ୟୁ ଅପଲୋଡ କରିଛନ୍ତି ଜଣେ insta ୟୁଜର । ବିମଳାଙ୍କ ମନ୍ଦିର ସମ୍ମୁଖ ସିଂହ ମଧ୍ୟ ସ୍ପଷ୍ଟ ଦେଖାଯାଉଛି । ତେବେ ଶୁଭ୍ରାଂଶୁ ନାମକ ଇନଷ୍ଟା ଆଇଡିରୁ ଫଟୋଟି ଅପଲୋଡ଼ ହୋଇଛି । ଉକ୍ତ ଆକାଉଣ୍ଟଟି ଅନ୍ୟ ୟୁଜରଙ୍କ ପାଇଁ ପ୍ରାଇଭେଟ୍ ରହିଛି ।

ଏ ଘଟଣା ଥରେ ନୁହେଁ ବରଂ ବାରମ୍ବାର ଘଟୁଛି । ଶ୍ରୀମନ୍ଦିର ଭିତରେ ମୋବାଇଲ ବ୍ୟବହାର ବାରଣ ସତ୍ତ୍ୱେ ନିୟମ ଭାଙ୍ଗୁଛନ୍ତି ଶ୍ରଦ୍ଧାଳୁ । ଯେଉଁଥିପାଇଁ ନିକଟରେ ଏନେଇ ଶ୍ରୀମନ୍ଦିର ପକ୍ଷରୁ ମଧ୍ୟ କଡା ପଦକ୍ଷେପ ନିଆଯାଇଛି ।

ନିକଟରେ ଶ୍ରୀଜଗନ୍ନାଥ ମନ୍ଦିରର ଚାରି ଦ୍ୱାରରେ ନିୟୋଜିତ ପୋଲିସ କର୍ମଚାରୀମାନଙ୍କୁ ବଡି କ୍ୟାମେରା ସହିତ ସଜ୍ଜିତ କରାଯାଇଛି ଯେଉଁଥିରେ ଅଡିଓ କ୍ଷମତା ଏବଂ ଯଥେଷ୍ଟ ସଂରକ୍ଷଣ କ୍ଷମତା ରହିଛି । ଏହି ପଦକ୍ଷେପ ମନ୍ଦିର ପରିସରରେ ପ୍ରବେଶ କରୁଥିବା ସନ୍ଦିଗ୍ଧ ବ୍ୟକ୍ତିମାନଙ୍କ ଉପରେ ନଜର ରଖିବାରେ ଯଥେଷ୍ଟ ଉନ୍ନତି ଆଣିବ ବୋଲି ଆଶା କରାଯାଉଛି । ଏହି କ୍ୟାମେରାଗୁଡ଼ିକ ମନ୍ଦିର ଭିତରକୁ ପ୍ରତିବନ୍ଧିତ ସାମଗ୍ରୀ ଆଣିବାକୁ ନିଷେଧ କରିବାରେ ମଧ୍ୟ ସାହାଯ୍ୟ କରିବ । ଏହା ବ୍ୟତୀତ ସେମାନେ ଅଣ-ସେବାୟତଙ୍କୁ ଚିହ୍ନଟ କରିବାରେ ଏବଂ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ସାହାଯ୍ୟ କରିବେ।