କେନ୍ଦୁଝର ଜିଲ୍ଲାର ଆରାଧ୍ୟ ଦେବୀ ଘଟଗାଁ ମା' ତାରିଣୀଙ୍କ ମନ୍ଦିର ଆଜି ଦିନବେଳା ବନ୍ଦ ରହିଛି । ଆଜି ମା'ଙ୍କ ଆଷାଢୀ ପର୍ବ ପାଇଁ ପ୍ରଥା ଅନୁଯାୟୀ ମା' ତାରିଣୀ ମନ୍ଦିର, ମା' ଦୁଆରଶୁଣି ମନ୍ଦିର ଦିନବେଳା ସମ୍ପୂର୍ଣ୍ଣ ବନ୍ଦ ରହିଛି । ଆଜି ସନ୍ଧ୍ୟା ୭ ଘଟିକା ଠାରୁ ମନ୍ଦିର ଖୋଲା ଯାଇ ମା'ଙ୍କ ନୀତିକାନ୍ତି ଅନୁଷ୍ଠିତ ହେବା ସହ ରାତ୍ର ୧୦ ଘଟିକା ପର୍ଯ୍ୟନ୍ତ ପୂଜାର୍ଚ୍ଚନା ଯଥାରୀତି ଅନୁଯାୟୀ ଅନୁଷ୍ଠିତ ହେବ।

ଏହି ସମୟରେ ଭକ୍ତ ମାନେ ମା'ଙ୍କ ଦର୍ଶନ କରିପାରିବେ । ତେବେ ପ୍ରତ୍ୟେକ ବର୍ଷ ଅଷାଢ ମାସର ଶେଷ ଗୁରୁବାରରେ ମା'ଙ୍କ ଆଷାଢୀ ପର୍ବ ପାଳନ କରାଯାଇଥାଏ । ଏହି ଗୋଟିଏ ଦିନ ଭକ୍ତଙ୍କ ମଙ୍ଗଳ କାମନା ପାଇଁ ମା' ତାରିଣୀ ଉପବାସ ରହିଥାନ୍ତି । ତେଣୁ ଦିନବେଳା ମନ୍ଦିର ବନ୍ଦ ରହିବା ସହ ସମସ୍ତ ନିତିକାନ୍ତି ମଧ୍ୟ ବନ୍ଦ ରହିଥାଏ । ଏହି ଆଷାଢୀ ପର୍ବରେ ବିଳମ୍ବିତ ରାତିରେ ମା'ଙ୍କ ନିଷୀପୂଜା ମଧ୍ୟ ଅନୁଷ୍ଠିତ ହୋଇଥାଏ । ଆଜି ଆସୁଥିବା ଭକ୍ତମାନେ ମନ୍ଦିର ବାହାରୁ ହିଁ ମା'ଙ୍କୁ ଦର୍ଶନ କରୁଥିବା ଦେଖିବାକୁ ମିଳିଛି ।