ହବିଷ୍ୟାଳି ଶିବିର ପ୍ରସ୍ତୁତ । ତୀର୍ଥ ପୁଷ୍କରିଣୀ ପ୍ରସ୍ତୁତ । ରାତି ପାହିଲେ କାର୍ତ୍ତିକ ବ୍ରତ । ଆଉ ଏବେଠୁ ଶ୍ରୀକ୍ଷେତ୍ର ମୁହାଁ ହେଲେଣି ହବିଷ୍ୟାଳି । କିଏ ମଠ ଓ ଧର୍ମଶାଳାରେ ମାସକ ପାଇଁ ବୁକିଂ ତ କିଏ ସରକାରଙ୍କ ପ୍ରଦତ୍ତ ହବିଷ୍ୟାଳି ଅଭିମୁଖେ ଛୁଟି ଆସିଛି । ଏଣେ ହବିଷ୍ୟାଳିମାନଙ୍କର ଆଗମନକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ବିଶେଷକରି ଶ୍ରୀକ୍ଷେତ୍ରଠୁ ଅନତି ଦୂରରେ ରହୁଥିବା ହବିଷ୍ୟାଳିମାନେ ଆଜିଠୁ ଆସି ଶିବିରରେ ଡେରା ପକେଇଲେଣି ।

ଏଣେ ହବିଷ୍ୟାଳିମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ନରେନ୍ଦ୍ର, ଶ୍ୱେତଗଙ୍ଗା, ମାର୍କଣ୍ଡ, ଇନ୍ଦ୍ରଦ୍ୟୁମ୍ନ ଆଜି ତୀର୍ଥ ପୁଷ୍କରିଣୀରେ ବ୍ୟାରିକେଡିଂ ସହ ଜାଲି ଦିଆଯାଇଛି । ଶିଉଳି ସଫା କରାଯାଇଛି । ହବିଷ୍ୟାଳିମାନେ ତୀର୍ଥ ପୁଷ୍କରିଣୀରେ ସ୍ନାନ କରି ବାଲୁକା ପୂଜା କରିବାର ବିଧି ରହିଥିବାରୁ ପୁଷ୍କରିଣୀରେ ସୁରକ୍ଷିତ ସ୍ନାନକୁ ଗୁରୁତ୍ୱ ଦିଆଯାଇଛି ।

ପ୍ରଶାସନ ପକ୍ଷରୁ ଚଳିତ ବର୍ଷ ପୁରୀ ସହରର ୪ଟି ସ୍ଥାନରେ ହବିଷ୍ୟାଳୀଙ୍କ ରହଣି ବ୍ୟବସ୍ଥା କରାଯାଇଛି । ଅନଲାଇନ ମାଧ୍ୟମରେ ଆବେଦନ ଆହ୍ୱାନ କରାଯାଇଥିଲା। ଯାଞ୍ଚ ପରେ ଯୋଗ୍ୟ ବିବେଚିତ ହବିଷ୍ୟାଳୀ ସେମାନଙ୍କ ନିର୍ଦ୍ଧାରିତ ହବିଷ୍ୟାଳୀ କେନ୍ଦ୍ରରେ ପହଞ୍ଚିବା ଆରମ୍ଭ କଲେଣି । ଜିଲ୍ଲାପାଳ ସମସ୍ତ ହବିଷ୍ୟାଳୀ କେନ୍ଦ୍ର ପରିଦର୍ଶନ ଓ ସମସ୍ତ କାର୍ଯ୍ୟର ତଦାରଖ କରି ସମୀକ୍ଷା କରିଥିଲେ । ସେହିଭଳି ଏସପି ମଧ୍ୟ ବିଭିନ୍ନ ହବିଷ୍ୟାଳି ଶିବିର ଯାଇ ହବିଷ୍ୟାଳୀ ମାନଙ୍କ ସୁରକ୍ଷା ବ୍ୟବସ୍ଥାର ଅନୁଧ୍ୟାନ କରିଥିଲେ । ମାସେ ପର୍ଯ୍ୟନ୍ତ ହବିଷ୍ୟାଳୀ ରାଈଦାମୋଦର ବ୍ରତ ପାଳନ କରିବେ । ବୃନ୍ଦାବତୀ ନିବାସ ହବିଷ୍ୟାଳୀ କେନ୍ଦ୍ରରେ ମାଆ ମାନେ ପହଞ୍ଚିବା ପରେ ସେମାନଙ୍କୁ ପ୍ରଶାସନ ପକ୍ଷରୁ ସ୍ବାଗତ କରାଯାଇଛି ।

ଏଥିସହ ଶ୍ରୀମନ୍ଦିର ସିଂହଦ୍ୱାର ନିକଟରେ ସେଡ୍ କୁ ସଂପ୍ରସାରଣ କରାଯାଇ ନୂଆ ସେଡ୍ ନିର୍ମିତ ହେଉଛି । ହବିଷ୍ୟାଳିଙ୍କ ସେବା କରିବା ପାଇଁ ମହିଳା ସହାୟିକାମାନେ ଆସି ବୃନ୍ଦାବତୀ ନିବାସରେ ପହଞ୍ଚି ନିଜ କାର୍ଯ୍ୟଧାରା ବାବଦରେ ଆବଗତ ହୋଇଛନ୍ତି ।

ଆସନ୍ତାକାଲି ଶ୍ରୀମନ୍ଦିରରେ ପାଳନ ହେବ କୁମାର ପୂର୍ଣ୍ଣିମା। ଶ୍ରୀମନ୍ଦିରରେ 7 ତାରିଖ ଦିନ ପୂର୍ଣ୍ଣିମା ପାଳନ ହେଉଥିବାବେଳେ ମହାପ୍ରଭୁ ଜଗନ୍ନାଥ ବି ପଶା ଖେଳନ୍ତି, ମା' ସାଆନ୍ତାଣୀଙ୍କ ସହ ଜୁଆ, କଉଡି ଖେଳରେ ଏମିତି ମଜ୍ଜି ଯାଆନ୍ତି ଯେ । ଶେଷରେ ଖେଳରେ ହାରି 7 ଦିନ ଯାଏଁ ବନ୍ଧା ପଡନ୍ତି। ମଧ୍ୟାହ୍ନ ଧୂପ ପରେ ପ୍ରଭୁ ଶ୍ରୀ ସୁଦର୍ଶନ ଶ୍ରୀମନ୍ଦିର ବାହାରେ ଥିବା ଉଗ୍ରସେନଙ୍କ ଆଶ୍ରମ (ଜମ୍ବେଶ୍ବର) ବିଜେ କରି ଫେରନ୍ତି । ସୁଦର୍ଶନଙ୍କ ନିମନ୍ତେ ସ୍ବତନ୍ତ୍ର ପୂଜା ଓ ବନ୍ଦାପନା ହୋଇଥାଏ । ସଂଧ୍ୟା ଧୂପ ପରେ ଆଜ୍ଞାମାଳ ପାପ୍ତ ହୋଇ ଶ୍ରୀ ମଦନମୋହନ ଓ ଲକ୍ଷ୍ମୀ ପ୍ରତିମା ପାଲିଙ୍କିରେ ଯାଇ ମହାଲକ୍ଷ୍ମୀ ମନ୍ଦିରର ଜଗମୋହନରେ ବିଜେ ହୁଅନ୍ତି । ଏଠାରେ ମହାପ୍ରଭୁଙ୍କ ଓ ମା' ଲକ୍ଷ୍ମୀଙ୍କ ପ୍ରତିନିଧି ଭାବେ ସେବକଙ୍କ ମଧ୍ୟରେ କଉଡ଼ି ଓ ପଶାଖେଳ ହୁଏ । ଶୀତଳ ଭୋଗ ପରେ ବାହୁଡା଼ ବିଜେ ହୋଇ ମା' ମହାଲକ୍ଷ୍ମୀ ସିଂହାସନକୁ ଓ ଶ୍ରୀ ମଦନମୋହନ ଦକ୍ଷିଣୀ ଘରକୁ ବିଜେ କରିଥାନ୍ତି । ଚନ୍ଦନଲାଗି ପରେ ବଡ଼ସିଂହାର ବେଶରେ ଠାକୁରମାନଙ୍କୁ ନୂଆ ଲୁଗା (ପତନି) ଲାଗି କରାଯାଏ।

ବଡ଼ସିଂହାର ଧୂପ ପରେ ସେବକମାନେ ପୁନର୍ବାର ରତ୍ନ ସିଂହାସନ ତଳେ ପଶା ଓ କଉଡ଼ି ଖେଳ ଖେଳନ୍ତି ଓ ପରେ ସିଂହାସନ ଉପରେ ଏହି ଖେଳ ଖେଳନ୍ତି । ମହାପ୍ରଭୁଙ୍କ ତରଫରୁ ପ୍ରତିନିଧି ମୁଦିରସ୍ତ ଓ ଲକ୍ଷ୍ମୀଙ୍କ ପ୍ରତିନିଧି ଭିତରଚ୍ଛ ମହାପାତ୍ର ୨୧ ଟି ହିଙ୍ଗୁଳ କଉଡ଼ି , ୨୧ ଟି ରୂପା କଉଡି, ପଶା ଶକଟା ଖେଳମାନ ଖେଳିଥାନ୍ତି । ଏ ଖେଳରେ ମା ମହାଲକ୍ଷ୍ମୀଙ୍କ ପାଖରେ ମହାପ୍ରଭୁ ହାରିଯିବାରୁ ମହାଲକ୍ଷ୍ମୀଙ୍କ ମନ୍ଦିରରେ ବିଜେ ହୋଇ ସାତ ଦିନ ବନ୍ଧା ରହିଥାନ୍ତି । ଅଷ୍ଟମ ଦିନ ଅବକାଶ ପୂଜାସମୟରେ ମହାପ୍ରଭୁ ବନ୍ଧାରୁ ଫିଟି ରତ୍ନ ସିଂହାସନକୁ ଫେରି ଆସନ୍ତି ।