Radha Ashtami / ଆଜି ପାଳିତ ହେଉଛି ରାଧା ଅଷ୍ଟମୀ: ଜାଣନ୍ତୁ କିପରି କରିବେ ରାଧାରାଣୀଙ୍କ ପୂଜା

ରାଧା ଅଷ୍ଟମୀ ହେଉଛି ରାଧାରାଣୀଙ୍କୁ ସମର୍ପିତ ଏକ ପବିତ୍ର ହିନ୍ଦୁ ପର୍ବ । ଧାର୍ମିକ ମାନ୍ୟତା ଅନୁସାରେ, ଭାଦ୍ରବ ମାସର ଶୁକ୍ଳ ପକ୍ଷ ଅଷ୍ଟମୀ ତିଥିରେ ରାଧାରାଣୀଙ୍କ ପ୍ରାକଟ୍ୟ ହୋଇଥିଲା । ଏହି କାରଣରୁ ପ୍ରତିବର୍ଷ ଏହି ଦିନକୁ ରାଧା ଅଷ୍ଟମୀ ଭାବେ ପାଳନ କରାଯାଏ ।

ଶ୍ରୀକୃଷ୍ଣଙ୍କ ଭକ୍ତି ପରମ୍ପରାରେ ରାଧାରାଣୀଙ୍କ ସ୍ଥାନ ଅତ୍ୟନ୍ତ ବିଶେଷ । ଭକ୍ତମାନଙ୍କ ମଧ୍ୟରେ ଏପରି ମାନ୍ୟତା ରହିଛି ଯେ, ରାଧାରାଣୀଙ୍କ ସ୍ମରଣ ଓ ପୂଜା ବିନା ଶ୍ରୀକୃଷ୍ଣଙ୍କ ଆରାଧନା ଅଧୂରା । ତେଣୁ ଏହି ଦିନ ଭକ୍ତମାନେ ରାଧା-କୃଷ୍ଣଙ୍କୁ ଏକାଠି ପୂଜା କରିଥାନ୍ତି ।

ରାଧା ଅଷ୍ଟମୀ ୨୦୨୬ କେବେ ?
୨୦୨୬ ମସିହାରେ ରାଧା ଅଷ୍ଟମୀ ପର୍ବ ୧୯ ସେପ୍ଟେମ୍ବର, ଶନିବାର ପାଳନ କରାଯାଉଛି ।
ଦିଆଯାଇଥିବା ତିଥି ଅନୁସାରେ-
- ଅଷ୍ଟମୀ ତିଥି ଆରମ୍ଭ: ୧୮ ସେପ୍ଟେମ୍ବର ୨୦୨୬, ଦିନ ୧:୦୨
- ଅଷ୍ଟମୀ ତିଥି ଶେଷ: ୧୯ ସେପ୍ଟେମ୍ବର ୨୦୨୬, ଦିନ ୩:୨୮
- ପୂଜାର ଶୁଭ ସମୟ:୧୯ ସେପ୍ଟେମ୍ବର, ସକାଳ ୧୧:୦୧ରୁ ଦିନ ୧:୨୮ ପର୍ଯ୍ୟନ୍ତ
- ବ୍ରତ ପାରଣ: ୨୦ ସେପ୍ଟେମ୍ବର ଦିନ ପ୍ରାୟ ୧୨ଟା ସମୟରେ

ରାଧା ଅଷ୍ଟମୀରେ କିପରି ପୂଜା କରିବେ ?
ରାଧା ଅଷ୍ଟମୀ ଦିନ ଭକ୍ତମାନେ ସକାଳୁ ଶୀଘ୍ର ଉଠି ସ୍ନାନ କରି ପରିଷ୍କାର ବସ୍ତ୍ର ପିନ୍ଧନ୍ତି । ଘରର ପୂଜାସ୍ଥାନକୁ ସଫା କରି ଏକ ଚୌକି ଉପରେ ଲାଲ କିମ୍ବା ହଳଦିଆ ବସ୍ତ୍ର ବିଛାଇ ରାଧା-କୃଷ୍ଣଙ୍କ ମୂର୍ତ୍ତି ସ୍ଥାପନ କରାଯାଏ । ଏହାପରେ ରାଧାରାଣୀଙ୍କୁ ପଞ୍ଚାମୃତରେ ଅଭିଷେକ କରାଇ ସୁନ୍ଦର ବସ୍ତ୍ର ଓ ଅଳଙ୍କାରରେ ସଜାଯାଏ ।

ପରେ ଚନ୍ଦନ, ଫୁଲ, ଧୂପ ଓ ଦୀପ ଅର୍ପଣ କରି ଭୋଗ ଲଗାଯାଏ । ରାଧାରାଣୀଙ୍କ ପ୍ରିୟ ଭୋଗ ଭାବେ ମାଖନ-ମିଶ୍ରୀ, ଧନିଆ ପଞ୍ଜିରି ଓ ଖିରି ଅର୍ପଣ କରିବାର ପରମ୍ପରା ରହିଛି । ପୂଜା ପରେ ରାଧା-କୃଷ୍ଣଙ୍କ ଆରତୀ କରି ଭକ୍ତିଭାବରେ ପ୍ରାର୍ଥନା କରାଯାଏ ।

ରାଧା ଅଷ୍ଟମୀ ବ୍ରତର ନିୟମ
ଭକ୍ତମାନେ ନିଜ ସାମର୍ଥ୍ୟ ଅନୁସାରେ ନିର୍ଜଳା, ଫଳାହାର କିମ୍ବା ଦିନକୁ ଥରେ ସାତ୍ତ୍ୱିକ ଭୋଜନ କରି ବ୍ରତ ପାଳନ କରନ୍ତି । ବ୍ରତ ସମୟରେ ଅନାଜ, ସାଧାରଣ ଲୁଣ, ପିଆଜ ଓ ରସୁଣ ଖାଇବାରୁ ବିରତ ରହିବାର ପରମ୍ପରା ରହିଛି । ଏହି ଦିନ ଦାନ-ପୁଣ୍ୟ କରିବାକୁ ମଧ୍ୟ ଶୁଭ ମନେ କରାଯାଏ । ନିଜ ସାମର୍ଥ୍ୟ ଅନୁସାରେ ଗରିବ ଓ ଆବଶ୍ୟକତାଥିବା ଲୋକଙ୍କୁ ଭୋଜନ କିମ୍ବା ଆବଶ୍ୟକ ସାମଗ୍ରୀ ଦାନ କରିପାରିବେ । ରାଧାରାଣୀଙ୍କ ମନ୍ଦିର ଦର୍ଶନ କରିବା ମଧ୍ୟ ଏହି ଦିନର ଏକ ଶୁଭ ପରମ୍ପରା ।

ବ୍ରତ ପାରଣ କେବେ ?
ରାଧା ଅଷ୍ଟମୀ ବ୍ରତ ସାଧାରଣତଃ ପରଦିନ ନବମୀ ତିଥିରେ ପାରଣ କରାଯାଏ । ସକାଳୁ ସ୍ନାନ ଓ ପୂଜା କରିବା ପରେ ବ୍ରାହ୍ମଣ କିମ୍ବା ଆବଶ୍ୟକତାଥିବା ଲୋକଙ୍କୁ ଭୋଜନ କରାଇ, ପ୍ରସାଦ ଗ୍ରହଣ କରି ବ୍ରତ ଖୋଲିବାର ପରମ୍ପରା ରହିଛି ।

ରାଧାରାଣୀଙ୍କ ମନ୍ତ୍ର
ରାଧା ଅଷ୍ଟମୀ ଦିନ ରାଧାରାଣୀଙ୍କ ନାମ ସ୍ମରଣ ଓ ମନ୍ତ୍ର ଜପ କରିବାକୁ ଭକ୍ତି ପରମ୍ପରାରେ ଶୁଭ ମନେ କରାଯାଏ । ପ୍ରଚଳିତ ମନ୍ତ୍ର ମଧ୍ୟରୁ ଗୋଟିଏ ହେଉଛି-
“ଓଁ ହ୍ରୀଂ ଶ୍ରୀରାଧାୟୈ ସ୍ୱାହା”
ଅନ୍ୟ ଏକ ପ୍ରଚଳିତ ମନ୍ତ୍ର-
“ଓଁ ହ୍ରୀଂ ଶ୍ରୀରାଧିକାୟୈ ନମଃ”
ଭକ୍ତମାନେ ଶ୍ରଦ୍ଧା ଓ ଭକ୍ତିର ସହିତ ଏହି ମନ୍ତ୍ର ଜପ କରି ରାଧାରାଣୀଙ୍କ ଆଶୀର୍ବାଦ ପ୍ରାର୍ଥନା କରନ୍ତି ।

ରାଧା ଅଷ୍ଟମୀର ଆଧ୍ୟାତ୍ମିକ ମହତ୍ତ୍ୱ
ରାଧା ଅଷ୍ଟମୀ କେବଳ ଏକ ବ୍ରତ କିମ୍ବା ପର୍ବ ନୁହେଁ; ଏହା ପ୍ରେମ, ଭକ୍ତି ଓ ସମର୍ପଣର ପ୍ରତୀକ ଭାବେ ଭକ୍ତମାନଙ୍କ ମନରେ ବିଶେଷ ସ୍ଥାନ ରଖେ । ଏହି ଦିନ ରାଧାରାଣୀଙ୍କୁ ସ୍ମରଣ କରି ଭକ୍ତମାନେ ନିଜ ଜୀବନରେ ପ୍ରେମ, ଶାନ୍ତି ଓ ଭକ୍ତିଭାବ ବୃଦ୍ଧି ପାଇଁ ପ୍ରାର୍ଥନା କରନ୍ତି । “ରାଧେ ରାଧେ ନାମ ସ୍ମରଣରେ ରାଧାରାଣୀଙ୍କ ପ୍ରତି ଭକ୍ତି ଅର୍ପଣ କରିବା ସହ ରାଧା-କୃଷ୍ଣଙ୍କ ଯୁଗଳ ଚରଣରେ ମନକୁ ସମର୍ପିତ କରିବା ହିଁ ଏହି ପବିତ୍ର ଦିନର ମୁଖ୍ୟ ଭାବନା ।