Rakhi Festival / ଆଜି ପବିତ୍ର ରକ୍ଷା ବନ୍ଧନ ଭାଇ ହାତରେ ରାକ୍ଷୀ, ମୁହଁରେ ଖୁସୀ

ଭାଇ-ଭଉଣୀର ସ୍ନେହରେ ଆଜି ବନ୍ଧା ପଡ଼ିଛି ସାରା ଓଡ଼ିଶା । କାହା ହାତରେ ରଙ୍ଗବେରଙ୍ଗର ରାକ୍ଷୀ, ତ କାହା ମୁହଁରେ ଭାଇ ପାଇଁ ଶୁଭକାମନା । ପବିତ୍ର ରକ୍ଷା ବନ୍ଧନକୁ ନେଇ ଚାରିଆଡ଼େ ଉତ୍ସବର ମାହୋଲ । ଏହି ଭାବନା ଭିତରେ ଆସନ୍ତାକାଲି ପାଳିତ ହେବ ଗହ୍ମା ପୂର୍ଣ୍ଣିମା । ମହାପ୍ରଭୁଙ୍କ ଲୀଳାକ୍ଷେତ୍ର ପୁରୀ ଶ୍ରୀମନ୍ଦିରରେ ମଧ୍ୟ ଏହି ଦିନଟିର ରହିଛି ସ୍ୱତନ୍ତ୍ର ମହତ୍ତ୍ୱ । ଭଉଣୀ ସୁଭଦ୍ରା ଦୁଇ ଭାଇ ଜଗନ୍ନାଥ ଓ ବଳଭଦ୍ରଙ୍କୁ ରାକ୍ଷୀ ପିନ୍ଧାଇବା ସହ ବଳଭଦ୍ରଙ୍କ ଜନ୍ମନୀତି ପାଳନ ହେବ। ପରମ୍ପରା, ଭକ୍ତି ଓ ଭାଇଚାରାର ଏହି ଅପୂର୍ବ ସମନ୍ୱୟକୁ ନେଇ ଉତ୍ସବମୁଖର ଓଡ଼ିଶା ।

ରକ୍ଷା ବନ୍ଧନରେ ଉତ୍ସବମୁଖର ଓଡ଼ିଶା
ପବିତ୍ର ରକ୍ଷା ବନ୍ଧନ। ଭାଇ-ଭଉଣୀଙ୍କ ଅତୁଟ ସ୍ନେହ, ଭଲପାଇବା ଓ ବିଶ୍ୱାସର ପ୍ରତୀକ ଏହି ପର୍ବକୁ ନେଇ ସାରା ରାଜ୍ୟ ଉତ୍ସବମୁଖର ହୋଇଉଠିଛି। ଘରେ ଘରେ ଭଉଣୀମାନେ ଭାଇଙ୍କ ହାତରେ ରାକ୍ଷୀ ବାନ୍ଧି ତାଙ୍କ ଦୀର୍ଘାୟୁ, ସୁଖ ଓ ସମୃଦ୍ଧି କାମନା କରୁଛନ୍ତି । ଭାଇମାନେ ମଧ୍ୟ ଭଉଣୀଙ୍କୁ ଉପହାର ଦେଇ ସବୁବେଳେ ସାଥିରେ ରହିବାର ପ୍ରତିଶ୍ରୁତି ଦେଉଛନ୍ତି । ବଜାରଠାରୁ ଆରମ୍ଭ କରି ଘରଦ୍ୱାର ପର୍ଯ୍ୟନ୍ତ ସବୁଠି ଦେଖିବାକୁ ମିଳୁଛି ଉତ୍ସବର ମାହୋଲ ।

ଏହି ପବିତ୍ର ଦିନର ପରେ ଆସନ୍ତାକାଲି ପାଳିତ ହେବ ଗହ୍ମା ପୂର୍ଣ୍ଣିମା । ଏହା ସହିତ ପ୍ରଭୁ ବଳଭଦ୍ରଙ୍କ ଜନ୍ମୋତ୍ସବ ମଧ୍ୟ ପାଳନ କରାଯିବ । ଏହି ଅବସରରେ ପୁରୀ ଶ୍ରୀମନ୍ଦିରରେ ଅନୁଷ୍ଠିତ ହେବ ବିଭିନ୍ନ ସ୍ୱତନ୍ତ୍ର ନୀତିକାନ୍ତି । ଶ୍ରୀମନ୍ଦିରର ପରମ୍ପରା ଅନୁଯାୟୀ, ମଧ୍ୟାହ୍ନଧୂପ ପରେ ଭଉଣୀ ଦେବୀ ସୁଭଦ୍ରା ମହାପ୍ରଭୁ ଶ୍ରୀଜଗନ୍ନାଥ ଓ ବଡ଼ଭାଇ ବଳଭଦ୍ରଙ୍କୁ ରାକ୍ଷୀ ପିନ୍ଧାଇବେ । ଏହି ନୀତି ଭାଇ-ଭଉଣୀଙ୍କ ପବିତ୍ର ସମ୍ପର୍କର ଦିବ୍ୟ ପ୍ରତୀକ ଭାବେ ବିବେଚିତ ହୁଏ ।

ଏହାପରେ ମାର୍କଣ୍ଡ ପୁଷ୍କରିଣୀରେ ବଳଭଦ୍ରଙ୍କ ଜନ୍ମନୀତି ଅନୁଷ୍ଠିତ ହେବ । ଏହି ଅବସରରେ ଶ୍ରୀମନ୍ଦିରରେ ଭକ୍ତଙ୍କ ଭିଡ଼ ମଧ୍ୟ ବଢ଼ିବ । ରକ୍ଷା ବନ୍ଧନ, ଗହ୍ମା ପୂର୍ଣ୍ଣିମା ଓ ବଳଭଦ୍ର ଜନ୍ମୋତ୍ସବର ଏହି ଧାର୍ମିକ ମାହୋଲ ଓଡ଼ିଶାର ପରମ୍ପରା, ଭକ୍ତି ଓ ସଂସ୍କୃତିର ଅନନ୍ୟ ଚିତ୍ର ପ୍ରଦର୍ଶନ କରୁଛି ।