Videos
|
Devotion

Puri Srimandir / ମହାପଞ୍ଚୁକର ଦ୍ୱିତୀୟ ଦିନରେ ଶ୍ରୀଜୀଉଙ୍କ ତ୍ରିବିକ୍ରମ ବେଶ, ଶ୍ରୀମନ୍ଦିରରେ ଭକ୍ତଙ୍କ ଭିଡ଼

Rashmita Mishra
Browse all articles by Rashmita Mishra
·55 mins ago·2 min read
ମହାପଞ୍ଚୁକର ଦ୍ୱିତୀୟ ଦିନରେ ଶ୍ରୀଜୀଉଙ୍କ ତ୍ରିବିକ୍ରମ ବେଶ, ଶ୍ରୀମନ୍ଦିରରେ ଭକ୍ତଙ୍କ ଭିଡ଼
Puri Srimandir

Key Points

ଆଜି ମହାପଞ୍ଚୁକର ଦ୍ୱିତୀୟ ଦିନ...
ତ୍ରିବିକ୍ରମ ବେଶରେ ଦର୍ଶନ ଦେବେ ମହାପ୍ରଭୁ । 
ଶ୍ରୀମନ୍ଦିରରେ ଭକ୍ତଙ୍କ ଭିଡ଼ । 

ମହାପଞ୍ଚୁକର ଦ୍ୱିତୀୟ ଦିନରେ ଆଜି ଶ୍ରୀମନ୍ଦିରରେ ମହାପ୍ରଭୁଙ୍କ ଅନନ୍ୟ ତ୍ରିବିକ୍ରମ ବେଶ ବା ଡାଳିକିଆ ବେଶ ଅନୁଷ୍ଠିତ ହେବ । କାର୍ତ୍ତିକ ମାସ ଶୁକ୍ଳପକ୍ଷ ତ୍ରୟୋଦଶୀ ତିଥିରେ ଶ୍ରୀଜୀଉମାନଙ୍କ ଏହି ମନୋରମ ବେଶ ଦର୍ଶନ ପାଇଁ ଭକ୍ତଙ୍କ ମନରେ ବିଶେଷ ଉତ୍ସାହ ଦେଖିବାକୁ ମିଳିଛି । ଶ୍ରୀଜୀଉମାନଙ୍କ ଅବକାଶ ନୀତି ସମାପନ ପରେ ପୁଷ୍ପାଳକ ସେବକମାନେ ଏହି ବେଶ ସମ୍ପାଦନ କରିବେ ।

ତ୍ରିବିକ୍ରମ ବେଶର ମୁଖ୍ୟ ଆକର୍ଷଣ ହେଉଛି ମହାପ୍ରଭୁଙ୍କ ଶ୍ରୀମସ୍ତକରେ ଶୋଭା ପାଉଥିବା ସ୍ୱତନ୍ତ୍ର ଚୂଳ । ଶ୍ରୀଜଗନ୍ନାଥ ଓ ଶ୍ରୀବଳଭଦ୍ରଙ୍କ ମସ୍ତକରେ ସୋଲ, କନା, ବେତ, ଜମ୍ବୁରା ଓ କଇଁଥ ଅଠାରେ ନିର୍ମିତ ଚୂଳ ଲଗାଯାଇଥାଏ । ଏହି ଚୂଳରେ ସ୍ୱର୍ଣ୍ଣ ନିର୍ମିତ କିଆ ଡାଳି ଖୋସାଯାଇଥିବା ବେଳେ ଶୀର୍ଷଭାଗରେ ସ୍ୱର୍ଣ୍ଣ ଚନ୍ଦ୍ରିକା ଶୋଭା ପାଇଥାଏ । ଦେବୀ ସୁଭଦ୍ରାଙ୍କ ସମେତ ଅନ୍ୟ ଦୁଇ ଠାକୁରଙ୍କ ମସ୍ତକରେ ମଧ୍ୟ ସ୍ୱର୍ଣ୍ଣ ଚନ୍ଦ୍ରିକା ଖଞ୍ଜାଯାଇଥାଏ ।

ଏହି ବେଶରେ ଠାକୁରମାନଙ୍କୁ ବିଭିନ୍ନ ସ୍ୱର୍ଣ୍ଣ ଅଳଙ୍କାର ଓ ପାଟବସ୍ତ୍ରରେ ସଜ୍ଜିତ କରାଯାଏ । ଶ୍ରୀଜୀଉମାନେ ହଳ, ମୂଷଳ, ଶଙ୍ଖ ଓ ଚକ୍ର ଧାରଣ କରିଥାନ୍ତି । ଏଥିସହ ଘାଗଡା ମାଳି, ବରକୋଳି ମାଳି, ପଦ୍ମମାଳି, ଗିନିମାଳି ଓ ପଦକ ମାଳି ସହିତ ଅନ୍ୟାନ୍ୟ ଅଳଙ୍କାର, ଶ୍ରୀପୟର ଓ ଶ୍ରୀହସ୍ତ ଲାଗି କରାଯାଏ । ମହାପ୍ରଭୁଙ୍କ ଏହି ଦିବ୍ୟ ରୂପ ଭକ୍ତଙ୍କୁ ଆଧ୍ୟାତ୍ମିକ ଭାବନାରେ ବିଭୋର କରିଥାଏ ।

ଅନ୍ୟପକ୍ଷରେ ମହାପଞ୍ଚୁକର ଦ୍ୱିତୀୟ ଦିନରେ ଚଉରା ପୂଜା ସହ ହବିଷ ବ୍ରତ ପାଳନ କରୁଛନ୍ତି ହବିଷ୍ୟାଳୀମାନେ । ମାସବ୍ୟାପୀ କାର୍ତ୍ତିକ ବ୍ରତ ପାଳନ ପରେ ପଞ୍ଚୁକର ଏହି ପବିତ୍ର ଦିନଗୁଡ଼ିକରେ ଧାର୍ମିକ ଆସ୍ଥା ଆହୁରି ଗଭୀର ହୋଇଛି ।  ବ୍ରତ ପାଳନ ଓ ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀକ୍ଷେତ୍ରରେ ଲାଗି ରହିଛି ଭକ୍ତଙ୍କ ଗହଳି ଚହଳି। ଜୟ ଜଗନ୍ନାଥ ଧ୍ୱନିରେ ମୁଖରିତ ହେଉଛି ସମଗ୍ର ଶ୍ରୀମନ୍ଦିର ପରିସର ।

Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free: