କଡ଼ା ସୁରକ୍ଷାରେ ପରୀକ୍ଷା କେନ୍ଦ୍ରକୁ ଗଲା ସ୍ପେଶାଲ OTET ପ୍ରଶ୍ନପତ୍ର । ଆସନ୍ତା ୨୭ ତାରିଖରେ ଅନୁଷ୍ଠିତ ହେବ ସ୍ପେଶାଲ OTET ପରୀକ୍ଷା । କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ବିଭିନ୍ନ ପରୀକ୍ଷା କେନ୍ଦ୍ରକୁ ପଠାଯାଇଛି ସ୍ପେଶାଲ OTET ପରୀକ୍ଷା ପାଇଁ ପ୍ରଶ୍ନପତ୍ର । ମାଧ୍ୟମିକ ଶିକ୍ଷା ପରିଷଦ କାର୍ଯ୍ୟାଳୟରୁ ବିଭିନ୍ନ ପରୀକ୍ଷା କେନ୍ଦ୍ରକୁ ଯାଇଛି ପ୍ରଶ୍ନପତ୍ର ।

ପ୍ରଶ୍ନପତ୍ରକୁ ଅଧିକ ସୁରକ୍ଷିତ ରଖିବା ପାଇଁ ଡ଼ିଜି ଲକର ବା ଡିଜିଟାଲ ଲକରର ବ୍ୟବସ୍ଥା କରାଯାଇଛି । ଯେଉଁ ବାକ୍ସରେ ପ୍ରଶ୍ନପତ୍ର ଯାଇଛି ସେହି ବାକ୍ସରେ ମାନୁଆଲ ତାଲା ସହିତ ଡିଜିଟାଲ ଲକର ମଧ୍ୟ ଲଗାଯାଇଛି । ପ୍ରଶ୍ନପତ୍ର ଥିବା ଷ୍ଟ୍ରଙ୍ଗ ରୁମକୁ ସିସିଟିଭି କ୍ୟାମେରା ନଜରରେ ରଖାଯାଇଛି । ପ୍ରଶ୍ନପତ୍ର ଯାଉଥିବା ଗାଡ଼ିରେ ଜିପିଏସର ବ୍ୟବସ୍ଥା କରାଯାଇଛି । ଆସନ୍ତା ୨୭ ତାରିଖରେ ୧୯୩ ଟି ପରୀକ୍ଷା କେନ୍ଦ୍ରରେ ପାଖାପାଖି ୭୫ ହଜାର ପରୀକ୍ଷାର୍ଥୀ ପରୀକ୍ଷା ଦେବେ ।

ଆହୁରି ପଢନ୍ତୁ OTET ପ୍ରଶ୍ନପତ୍ର କେଳେଙ୍କାରୀର ବଡ଼ ଗୁମର ଖୋଲିଲା ଅଭିଯୁକ୍ତ ଜିତନ ମହାରଣା

ଦୁଇଟି ସିଟିଂରେ ଏହି ପରୀକ୍ଷା ଅନୁଷ୍ଠିତ ହେବ । ପ୍ରଥମ ସିଟିଂ ସକାଳ ୯ଟାରୁ ୧୧.୩୦ ପର୍ଯ୍ୟନ୍ତ ଚାଲିବ । ସେହିପରି ଦ୍ବିତୀୟ ସିଟିଂ ଦିନ ୨ଟାରୁ ୪.୩୦ ପର୍ଯ୍ୟନ୍ତ ଚାଲିବ । ସ୍ପେଶାଲ ଓଟିଇଟି ପାଇଁ ଆସନ୍ତା ୧୭ ତାରିଖରୁ ଓ୍ବେବସାଇଟରେ ଆଡମିଟ୍‌ କାର୍ଡ ଉପଲବ୍ଧ ହେବ । ତେବେ ପରୀକ୍ଷା କେନ୍ଦ୍ର ବଦଳି ନଥିବା ବୋର୍ଡ ପକ୍ଷରୁ ସୂଚନା ଦିଆଯାଇଛି ।

ସୂଚନା ଅନୁସାରେ, ଜୁଲାଇ ୨୦ରେ ହେବାକୁ ଥିବା ସ୍ବତନ୍ତ୍ର ଓଟିଇଟି ପ୍ରଶ୍ନପତ୍ର ଲିକ୍‌ କାରଣରୁ ବାତିଲ ହୋଇଥିଲା । ଆଉ ଏହାର ତଦନ୍ତ କ୍ରମେ ବୋର୍ଡ ଉପସଭାପତି ନିହାର ମହାନ୍ତିଙ୍କ ସମେତ ୮ ଜଣକୁ ଗିରଫ କରିଥିଲା କ୍ରାଇମବ୍ରାଞ୍ଚ । ଏହାସହ ଅଗଷ୍ଟ ୩୧ରେ ପରୀକ୍ଷା ପାଇଁ ସମୟ ଧାର୍ଯ୍ୟ କରାଯାଇଥିଲା । ମାତ୍ର ପୁଣି ଏହାକୁ ବାତିଲ କରାଯାଇଥିଲା । ଆଉ ଏବେ ସେପ୍ଟେମ୍ବର ୨୭ ତାରିଖରେ ପରୀକ୍ଷା କରାଯିବା ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି ।

ଆହୁରି ପଢନ୍ତୁ OTET ପ୍ରଶ୍ନପତ୍ର ଲିକ ନେଇ କ୍ରାଇମବ୍ରାଞ୍ଚକୁ ମିଳୁଛି ନୂଆ ଲିଙ୍କ୍

OTET ପ୍ରଶ୍ନପତ୍ର କେଳେଙ୍କାରୀର ବଡ଼ ଗୁମର ଖୋଲିଥିଲା ଅଭିଯୁକ୍ତ ଜିତନ ମହାରଣା । କଟକରୁ ପ୍ରଶ୍ନପତ୍ର ଚୋରି ହେବା ପରେ ଜଣେ ଡ୍ରାଇଭରଙ୍କ ଜରିଆରେ ନୟାଗଡ଼ ପଠା ଯାଇଥିଲା । ପେନ୍ ଡ୍ରାଇଭ୍ ଓ ହାର୍ଡକପି ନୟାଗଡ ପଠେଇଥିଲା ଅଭିଯୁକ୍ତ ଜିତନ । ଏଥିପାଇଁ ସେ ୧୫୦୦ ଟଙ୍କାରେ ଡ଼୍ରାଇଭରକୁ ନିୟୋଜିତ କରିଥିଲା । ଗିରଫ ହୋଇଥିବା ଅଭିଯୁକ୍ତ ବିଜୟ ମିଶ୍ରଙ୍କ ସମ୍ପର୍କୀୟଙ୍କ ମାଧ୍ୟମରେ ଏହି ପ୍ରଶ୍ନପତ୍ରକୁ ନୟାଗଡ ପଠେଇଥିଲା । ଆଉ ସେଠାରୁ ଅଭିଯୁକ୍ତ ଶିକ୍ଷକ ନେତା ବିଜୟ ମିଶ୍ର OTET ପ୍ରଶ୍ନପତ୍ର ପେନଡ୍ରାଇଭ୍ ଓ ହାର୍ଡକପି ସଂଗ୍ରହ କରିଥିଲା । ଏ ବାବଦରେ ସେ ଜିତନକୁ ପଇସା ପୈଠ କରିଥିଲା । ଏହି ମାମଲାରେ ଡ଼୍ରାଇଭରକୁ ଜେରା କରିଥିଲା କ୍ରାଇମବ୍ରାଞ୍ଚ୍ । ଏହା ସହିତ ଅଭିଯୁକ୍ତ ବିଜୟଙ୍କ ସମ୍ପର୍କୀୟଙ୍କୁ ମଧ୍ୟ ଜେରା କରିଥିଲା କ୍ରାଇମବ୍ରାଞ୍ଚ୍ ।