ଅହମଦାବାଦ: ମ୍ୟାନଜେମେଣ୍ଟରେ ସ୍ନାତକୋତ୍ତର (PGP) ହାସଲ କରିଥିବା ୨୦୨୫ ବ୍ୟାଚର ଚୂଡ଼ାନ୍ତ ପ୍ଲେସମେଣ୍ଟ ସାରିଛି IIM, ଅହମଦାବାଦ । ନିକଟ ବର୍ଷ ଗୁଡ଼ିକ ଅପେକ୍ଷା ଘରୋଇ କ୍ଷେତ୍ରରେ ହୋଇଥିବା ନିଯୁକ୍ତିରେ ବେତନ ବେଶ ବଢ଼ିଛି । IIM, ଅହମଦାବାଦର ୪୦୬ ଛାତ୍ରଛାତ୍ରୀଙ୍କ ମଧ୍ୟରୁ ୩୯୫ ଜଣ ବିଭିନ୍ନ ବଡ଼ କମ୍ପାନୀର ଅଫର୍ ଲେଟର ଗ୍ରହଣ କରିଥିବା ବେଳେ ୧୧ ଜଣ ନିଜସ୍ଵ ଷ୍ଟାର୍ଟଅପ୍ ଓ ପାରିବାରିକ ବ୍ୟବସାୟକୁ ଚୟନ କରିଛନ୍ତି ।

ପ୍ଲେସମେଣ୍ଟ ପାଇଥିବା ଛାତ୍ରଛାତ୍ରୀଙ୍କ ମଧ୍ୟରୁ ୧୫୬ ଜଣ ବ୍ୟାଙ୍କିଂ କ୍ଷେତ୍ରକୁ ବାଛିଥିବା ବେଳେ ୯୯ ଜଣ ଆର୍ଥିକ ସେବା ଏବଂ ବୀମା (BFSI), ୫୬ ଜଣ ସାଧାରଣ ପରିଚାଳନା କ୍ଷେତ୍ରରେ ନିଯୁକ୍ତି ପାଇଛନ୍ତି । ବୋଷ୍ଟନ କନସଲ୍ଟିଂ ଗ୍ରୁପ୍‍, McKinsey & Company, ଆସେଞ୍ଚର, ଗୋଲ୍ଡମ୍ଯାନ୍ ସାଚ୍ ଭଳି କମ୍ପାନୀରେ ନିଯୁକ୍ତି ମିଳିଛି IIM, ଅହମଦାବାଦର ଛାତ୍ରଛାତ୍ରୀଙ୍କୁ ।

ଏଥିସହ ପଢ଼ନ୍ତୁ: ଭାରତ ସହ ଯୁଦ୍ଧ ହେଲେ ସାଉଦି ଆରବ ଆମକୁ ସାହାଯ୍ୟ କରିବ: ପାକ୍ ପ୍ରତିରକ୍ଷା ମନ୍ତ୍ରୀ

ଭାରତରେ ଆର୍ଥିକ ସେବା ଏବଂ ବୀମା କ୍ଷେତ୍ରରେ ସର୍ବାଧିକ ବାର୍ଷିକ ପ୍ଯାକେଜ୍ ୧.୧ କୋଟିରେ ନିଯୁକ୍ତି ମିଳିଛି । ଯେତେବେଳେ କି ମଧ୍ୟମ ବର୍ଗରେ ବାର୍ଷିକ ୩୪.୬ ଲକ୍ଷରୁ ୩୩.୫ ଲକ୍ଷ ପ୍ୟାକେଜ ରହିଛି । କନସଲ୍ଟିଂ ଭୂମିକାରେ ବାର୍ଷିକ ୪୦ ଲକ୍ଷରୁ ୪୦ ଲକ୍ଷ ଅଫର୍ କରାଯାଇଛି । ସାମଗ୍ରୀ ପରିଚାଳନା ଓ IT ଭୂମିକାରେ ୩୬ରୁ ନେଇ ୪୪ ଲକ୍ଷ ପର୍ଯ୍ୟନ୍ତ ବାର୍ଷିକ ପ୍ୟାକେଜରେ ନିଯୁକ୍ତି ମିଳିଛି ।

IIM, ଅହମଦାବାଦର ପ୍ଲେସମେଣ୍ଟରେ ୧୭୮ଟି କମ୍ପାନୀ ଭାଗ ନେଇଥିଲେ । ବୋଷ୍ଟନ କନସଲ୍ଟିଂ ଗ୍ରୁପ୍ ସର୍ବାଧିକ ୩୫ ଜଣଙ୍କୁ ପ୍ଲେସମେଣ୍ଟ ଦେଇଥିବା ବେଳେ ଆସେଞ୍ଚର ୩୧, ବେନ୍ ଆଣ୍ଡ କୋ ୧୭ ଜଣଙ୍କୁ ଚୟନ କରିଛି । ଲାଟେରାଲ୍ ପ୍ଲେସମେଣ୍ଟ ମାଧ୍ୟମରେ ଉପକୃତ ହୋଇଛନ୍ତି ୫୯ ପ୍ରତିଶତ ଛାତ୍ରଛାତ୍ରୀ ।

Argus News | argus news | Odisha Latest News, Breaking News, Trending News, Live TV