ଅର୍ଗସ ବ୍ୟୁରୋ: ପୁଷ୍ପା, ପୁଷ୍ପାରାଜ୍…. ଫାୟାର ନେହିଁ ୱାଇଲ୍ଡ ଫାୟାର ହେ…. ଅଲ୍ଲୁ ଅର୍ଜୁନଙ୍କ ନୂଆ ଡାଇଲଗ୍ ତାଙ୍କର ନୂଆ ଫିଲ୍ମକୁ ଏକଦମ ମ୍ୟାଚ୍ କରିଛି । ଏବେ ସାରା ବିଶ୍ୱରେ ଦେଖିବାକୁ ମିଳିଛି ‘ପୁଷ୍ପା-୨’ ଜଲୱା। ବକ୍ସ ଅଫିସରେ ଗୋଟିଏ ପରେ ଗୋଟିଏ ରେକର୍ଡ ଭାଙ୍ଗି ଇତିହାସ ସୃଷ୍ଟି କରୁଛି ପୁଷ୍ପା-୨ । ବହୁ ପ୍ରତିକ୍ଷୀତ ପୁଷ୍ପା-୨ ବକ୍ସ ଅଫିସରେ ନୂଆ ଅଧ୍ୟାୟ ଲେଖିବା ଜାରି ରଖିଛି । ରିଲିଜର ୧୦ ଦିନ ଭିତରେ ସାରା ବିଶ୍ୱରେ ‘ପୁଷ୍ପା-୨’ ୧୦୦୦ କୋଟି କଲେକ୍ସନ କରି ସାରିଥିଲା । କିନ୍ତୁ ୧୧ ଦିନରେ ଏହା ଆଉ ଏକ ରେକର୍ଡ ନିଜ ନାମରେ କରିଛି । ରିଲିଜ ହେବାର ୧୧ ଦିନ ପରେ ‘ପୁଷ୍ପା-୨’ କେବଳ ଭାରତରେ ହିଁ ୯୦୦ କୋଟି ଆୟ କରିବାରେ ସଫଳ ହୋଇଛି । ରିପୋର୍ଟ ଅନୁସାରେ, ‘ପୁଷ୍ପା-୨’ ୧୧ତମ ଦିନରେ କେବଳ ଭାରତରେ ହିଁ ୯୦୦ କୋଟି ଟଙ୍କାର ବିଜନେସ କରିଛି ।

ଏଥିରୁ ହିନ୍ଦୀ ଭାଷାରେ ଏହି ଫିଲ୍ମ ୫୫ କୋଟି ଟଙ୍କା ଆୟ କରିଥିବା ବେଳେ ତେଲୁଗୁ ଭାଷାରେ ୧୬ କୋଟି ଏବଂ ତାମିଲ ଭାଷାରେ ୩ କୋଟି ଟଙ୍କା ଆୟ କରିପାରିଛି । ତେବେ କନ୍ନଡ଼ ଏବଂ ମାଲାୟଲମ ଭାଷାରେ ‘ପୁଷ୍ପା-୨’ ବିଶେଷ ପ୍ରଭାବ ପକାଇପାରିନାହିଁ । ତେବେ ଶନିବାର ପୁଷ୍ପା-୨ ମୋଟ ୬୩.୩ କୋଟି ଆୟ କରିବାରେ ସଫଳ ହୋଇଥିଲା । ସେହିପରି ତେଲୁଗୁ ଭାଷାରୁ ୨୭୯.୩୫ କୋଟି ଆୟ କରିଥିବା ବେଳେ ତାମିଲରୁ ୪୮.୧ କୋଟି କଲେକ୍ସନ କରିପାରିଛି । ତେବେ କନ୍ନଡ଼ ଭାଷାରେ ମୋଟ ୬.୫୫ କୋଟି ଏବଂ ମାଲାୟାଲମ ଭାଷାରେ ମାତ୍ର ୧୩.୪ କୋଟି ଟଙ୍କା ଆୟ କରିଛି ‘ପୁଷ୍ପା-୨’। ତେବେ ସାରା ବିଶ୍ବରେ ୧୧ ଦିନର ଆୟ ମୋଟ ୧୩୦୦ ଛୁଇଁଛି । ଏହା ଖୁବ ଶୀଘ୍ର ୨୦୦୦ କୋଟି ଟଙ୍କାର ମାଇଲଷ୍ଟୋନ ଛୁଇଁବ ବୋଲି ଆଶା କରାଯାଉଛି ।