Entertainment News / ଅଲ୍ଲୁ ଅର୍ଜୁନଙ୍କ ବୟାନକୁ ନେଇ ବିବାଦ… 'ଝିଅ ଘର ଆଗରେ ଅପେକ୍ଷା କରନ୍ତୁ' କହି ଟ୍ରୋଲ୍ ହେଲେ

ସାଉଥ ଇଣ୍ଡଷ୍ଟ୍ରୀର ଲୋକପ୍ରିୟ ଅଭିନେତା ଅଲ୍ଲୁ ଅର୍ଜୁନ୍ ପୁଣି ଏକ ନୂଆ ବିବାଦରେ ପଡ଼ିଛନ୍ତି। ନିକଟରେ ଏକ ସାର୍ବଜନୀନ କାର୍ଯ୍ୟକ୍ରମରେ ସେ ଦେଇଥିବା ବକ୍ତବ୍ୟକୁ ନେଇ ସୋସିଆଲ୍ ମିଡିଆରେ ପ୍ରବଳ ଚର୍ଚ୍ଚା ଓ ସମାଲୋଚନା ଆରମ୍ଭ ହୋଇଯାଇଛି। ହାଇଦ୍ରାବାଦଠାରେ ଅନୁଷ୍ଠିତ 'ଅଲ୍ଲୁ ଅର୍ଜୁନ୍ ଫ୍ୟାନ୍ସ ଆସୋସିଏସନ୍' (AAFA) ର ଏକ ସମ୍ମିଳନୀରେ ସେ ପ୍ରଶଂସକମାନଙ୍କୁ ସମ୍ବୋଧିତ କରିଥିଲେ। ସୋସିଆଲ୍ ମିଡିଆରେ ଚାଲିଥିବା ନକାରାତ୍ମକତା ଓ 'ଫ୍ୟାନ୍ ୱାର୍' (ପ୍ରଶଂସକଙ୍କ ମଧ୍ୟରେ କଳହ) ରୁ ଦୂରେଇ ରହିବାକୁ ସେ ପରାମର୍ଶ ଦେଇଥିଲେ।

ଅଭିନେତା କହିଥିଲେ, ‘ମୁଁ ମୋର ସମସ୍ତ ପ୍ରଶଂସକ, ବିରୋଧୀ ଏବଂ ନାପସନ୍ଦ କରୁଥିବା ଲୋକଙ୍କୁ ବହୁ ଦିନରୁ ଗୋଟିଏ କଥା କହିବାକୁ ଚାହୁଁଥିଲି। ଯଦି ଆପଣ କାହାକୁ ପସନ୍ଦ କରୁନାହାନ୍ତି, ତେବେ ତାଙ୍କୁ ଘୃଣା କରିବାରେ କିମ୍ବା ଟ୍ରୋଲ୍ କରିବାରେ ନିଜର ମୂଲ୍ୟବାନ୍ ସମୟ ନଷ୍ଟ କରନ୍ତୁ ନାହିଁ। ଏହା ବଦଳରେ କିଛି ସକାରାତ୍ମକ କାର୍ଯ୍ୟରେ ମନ ଦିଅନ୍ତୁ।’

ଅଭିନେତାଙ୍କ କଥା ସକାରାତ୍ମକ ଥିଲେ ମଧ୍ୟ, ସେହି ଭାଷଣର ଏକ ସର୍ଟ ଭିଡିଓ କ୍ଲିପ୍ ଭାଇରାଲ୍ ହେବା ପରେ ହଙ୍ଗାମା ସୃଷ୍ଟି ହୋଇଛି। ସେହି ଭିଡିଓରେ ସେ ପ୍ରଶଂସକଙ୍କୁ ପରାମର୍ଶ ଦେଇ କହୁଛନ୍ତି, ‘ଇଣ୍ଟରନେଟରେ ସମୟ ନଷ୍ଟ ନକରି, ଯେଉଁ ଝିଅକୁ ଆପଣ ପସନ୍ଦ କରୁଛନ୍ତି ତା' ଘର ଆଗରେ ଯାଇ ଅପେକ୍ଷା କରନ୍ତୁ।’ ଏହି ମନ୍ତବ୍ୟକୁ ନେଇ ନେଟିଜେନ୍ସ ପ୍ରବଳ ଅସନ୍ତୋଷ ପ୍ରକାଶ କରିଛନ୍ତି। ଅନେକଙ୍କ ମତରେ, ଜଣେ ତାରକା ହୋଇ ଏପରି କହିବା ଦ୍ୱାରା ନାରୀ ନିର୍ଯାତନା, ପଛରେ ଗୋଡ଼ାଇବା (Stalking) ଏବଂ ଅସଦାଚରଣ ଭଳି ଅପରାଧିକ ମନୋବୃତ୍ତିକୁ ପ୍ରୋତ୍ସାହନ ମିଳିବ।

ଜଣେ ବ୍ୟବହାରକାରୀ ଲେଖିଛନ୍ତି, ‘ଏହା ସମ୍ପୂର୍ଣ୍ଣ ଅଜ୍ଞତା ଓ ସାମାଜିକ ସଚେତନତାର ଅଭାବ।’ ଅନ୍ୟ ଜଣେ ଲେଖଛନ୍ତି, ‘ଅଲ୍ଲୁ ଅର୍ଜୁନ୍ ନିଜର ପ୍ରଶଂସକମାନଙ୍କୁ କି ପରାମର୍ଶ ଦେଉଛନ୍ତି, ସେ ବିଷୟରେ ସତର୍କ ହେବା ଉଚିତ୍।’ ଆଉ ଜଣେ ନେଟିଜେନ୍ ମନ୍ତବ୍ୟ ଦେଇଛନ୍ତି, ‘ଆପଣ ପରୋକ୍ଷରେ ମହିଳାମାନଙ୍କୁ ହଇରାଣ କରିବା ଏବଂ ସେମାନଙ୍କ ଗତିବିଧି ଉପରେ ନଜର ରଖିବା ଭଳି କାର୍ଯ୍ୟକୁ ରୋମାଞ୍ଚକର ରୂପ ଦେଉଛନ୍ତି। ଏହା ଅତ୍ୟନ୍ତ ଲଜ୍ଜାଜନକ।’

ସୂଚନା ଥାଉ କି, ଅଲ୍ଲୁ ଅର୍ଜୁନ୍‌ଙ୍କୁ ଶେଷଥର ପାଇଁ ବ୍ଲକ୍‌ବଷ୍ଟର ଚଳଚ୍ଚିତ୍ର 'ପୁଷ୍ପା ୨: ଦି ରୁଲ୍' (Pushpa 2: The Rule) ରେ ଦେଖିବାକୁ ମିଳିଥିଲା, ଯାହା ବ୍ୟବସାୟିକ ସଫଳତାର ନୂଆ କୀର୍ତ୍ତିମାନ ସୃଷ୍ଟି କରିଥିଲା। ବର୍ତ୍ତମାନ ସେ ନିର୍ଦ୍ଦେଶକ ଅଟଲିଙ୍କ ଆଗାମୀ ସିନେମା 'ରାକା' (Raaka) ରେ ଦୀପିକା ପାଦୁକୋନଙ୍କ ସହ ଅଭିନୟ କରିବାକୁ ଯାଉଛନ୍ତି।