ହାତରେ ମେହେନ୍ଦି ଲଗାଇ ସାଙ୍ଗ ମାନଙ୍କ ସହ ହଳଦୀ ରସମ ପୁରା କରୁଛନ୍ତି ଜାଗ୍ରତି। ସାଙ୍ଗରେ ଅଛନ୍ତି ବନ୍ଧୁମାନେ। ବହୁ ପ୍ରତୀକ୍ଷା ପରେ ହାତକୁ ଦି ହାତ ହେବେ ଅଭିନେତା ଅନୁଭବ ମହାନ୍ତି ଓ ଉପସ୍ଥାପିକା ଜାଗୃତି ଶୁକ୍ଳା। ରାଜସ୍ଥାନର ଜୟପୁର ଠାରେ ଏକ ରିସୋଟ ରେ ଆୟୋଜିତ ହେଉଛି ଷ୍ଟାର କପଲଙ୍କ ବାହାଘର। ଜାଗ୍ରତିଙ୍କ ହଳଦୀ ରସମର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ଗତ ଶୁକ୍ରବାର ଦିନ ସରିଥିଲା ଉଭୟଙ୍କ ନିର୍ବନ୍ଧ । ଯାହାକୁ ନେଇ ଅନୁଭବ ଜାଗ୍ରତି ନିଜ ନିଜର ଅଫିସିଆଲ ଆକାଉଣ୍ଟରେ ପୋଷ୍ଟ କରିଥିଲେ । ଜାଗ୍ରତି ଲେଖିଥିଲେ, " ମୁଁ ମୋର ଭଲ ବନ୍ଧୁଙ୍କୁ ହଁ କହିଲି । ଆଶୀର୍ବାଦ ପାଇଁ ଆମ ପରିବାର ଓ ଶୁଭେଛୁ, ବନ୍ଧୁଙ୍କ ନିକଟରେ କୃତଜ୍ଞ । ବନ୍ଧୁତାର ବନ୍ଧନ ନୂଆ ରୂପ ନେଇଛି । ଆମ ଦୁହିଁଙ୍କ ପ୍ରେମ କାହାଣୀ ଏକାଠି ଲେଖିବାକୁ ମୁଁ ଆଉ ଅପେକ୍ଷା କରି ରହିପାରିବି ନାହିଁ ।"ସେହପରି ଅନୁଭବ ମଧ୍ୟ ନିଜ ଇନଷ୍ଟାଗ୍ରାମ ଆକାଉଣ୍ଟରେ ନିଜର ନିର୍ବନ୍ଧର ଫଟୋ ଶେୟାର କରିଥିଲେ ।

ତେବେ ଅର୍ଗସକୁ ଦେଇଥିବା ସାକ୍ଷାତକାରରେ ଅନୁଭବ ଖୁବଶୀଘ୍ର ଦ୍ବିତୀୟ ବିବାହ କରିବାକୁ ଯାଉଥିବା କହିଥିବା ବେଳେ ଜାଗ୍ରତି ମଧ୍ୟ ଚଳିତ ବର୍ଷ ବିବାହ କରିବେ ବୋଲି କହିଥିଲେ । ଯଦିଓ ଉଭୟ ପରସ୍ପରକୁ ବିବାହ କରିବା କଥା ସ୍ପଷ୍ଟ କରିନଥିଲେ, କିନ୍ତୁ ସେମାନଙ୍କର ସମ୍ପର୍କ ଖୁବ ଗଭୀର ବୋଲି କହିଥିଲେ । ଏବେ ସମସ୍ତଙ୍କ ସାମ୍ନାରେ ଉଭୟ ନିଜର ସମ୍ପର୍କକୁ ସମ୍ମତି ଜଣାଇଛନ୍ତି ।

ସୂଚନା ମୁତାବକ ଅନୁଭବ ଏବଂ ଜାଗ୍ରତିଙ୍କ ସମ୍ପର୍କ ୨୦୨୦ ମସିହାରେ ଆରମ୍ଭ ହୋଇଥିଲା । ଜାଗ୍ରତି ଲୋକସଭା ଟିଭିରେ ଉପସ୍ଥାପିକା ଥିବାବେଳେ ଯୁବ ସାଂସଦ ଭାବେ ଅନୁଭବଙ୍କ ସାକ୍ଷାତକାର ନେଇଥିଲେ । ପରେ ଅନୁଭଙ୍କ ଉପରେ ବହି ଲେଖିବା ଉଦ୍ଦେଶ୍ୟରେ ତାଙ୍କ ସହ ମିଳାମିଶା ଆରମ୍ଭ କରିଥିଲେ । ଏହା ପରଠୁ ସମ୍ପର୍କ ଆହୁରି ଘନିଷ୍ଠ ହୋଇଥିଲା । 2020 ମସିହାରେ ଅନୁଭବ ନିଜ ପତ୍ନୀ ବର୍ଷା ପ୍ରିୟଦର୍ଶନୀଙ୍କଠାରୁ ଡିଭୋର୍ସ ପାଇଁ କୋର୍ଟର ଦ୍ବାରସ୍ଥ ହୋଇଥିଲେ। ବର୍ଷା ଅଭିଯୋଗ କରିଥିଲେ ଯେ , ଦିଲ୍ଲୀରେ ଥିବା ତାଙ୍କର ବାନ୍ଧବୀ ଜାଗ୍ରତିଙ୍କ ପାଇଁ ତାଙ୍କର ଡିଭୋର୍ସ ହେବାକୁ ଯାଉଛି । ପୁଣି ଅନୁଭବ ମଧ୍ୟ ସମୟ ସମୟରେ ଜାଗ୍ରତିଙ୍କ ଫଟୋ ପୋଷ୍ଟ କରୁଥିଲେ, ଯାହାକୁ ନେଇ ଚର୍ଚ୍ଚା ହୋଇଥିଲା।