ବଲିଉଡ୍‌ ଅଭିନେତ୍ରୀ କରିସ୍ମା କପୁରଙ୍କ ପୂର୍ବତନ ସ୍ଵାମୀ ତଥା ଶିଳ୍ପପତି ସଞ୍ଜୟ କପୁରଙ୍କ ମୃତ୍ୟୁ ଘଟିଛି। ହୃଦଘାତ ଯୋଗୁ ତାଙ୍କର ଦେହାନ୍ତ ହୋଇଛି। ସଞ୍ଜୟ ଲଣ୍ଡନରେ ରହୁଥିଲେ। ତାଙ୍କୁ ୫୩ ବର୍ଷ ହୋଇଥିଲା। ତାଙ୍କ ବ୍ୟାବସାୟିକ ପରାମର୍ଶଦାତା ସୁହେଲ ସେଠ୍‌ ସଞ୍ଜୟଙ୍କ ମୃତ୍ୟୁ ନେଇ ସ୍ପଷ୍ଟ କରିଛନ୍ତି। ମହୁମାଛି ପାଇଁ ତାଙ୍କର ହୃଦଘାତ ହୋଇଥିବା ଜଣାପଡ଼ିଛି। ସୂଚନା ଅନୁସାରେ, ଗତ ଗୁରୁବାର ଘୋଡ଼ାଦୌଡ଼ ପ୍ରତିଯୋଗିତାରେ ସଞ୍ଜୟ ଭାଗ ନେଇଥିଲେ। ଘୋଡ଼ା ଦୌଡ଼ କରୁଥିବା ସମୟରେ ତାଙ୍କ ପାଟି ଭିତରେ ଏକ ମହୁମାଛି ପଶିଯାଇଥିଲା, ଯାହାକୁ ଭୁଲବଶତଃ ସଞ୍ଜୟ ଗିଳିଦେଇଥିଲେ। ଏହା ପରେ ତାଙ୍କୁ ହୃଦଘାତ ହୋଇଥିଲା।

ବୋଧହୁଏ ଶରୀରର ଆଭ୍ୟନ୍ତରରେ ମହୁମାଛି ଦଂଶିବାରୁ ହୃଦଘାତ ହୋଇଥିବା କୁହାଯାଉଛି। ଜୁନ ୧୨ ତାରିଖରେ ୟୁକେରେ ହୃଦଘାତରେ ସଞ୍ଜୟ କପୁରଙ୍କ ମୃତ୍ୟୁ ଘଟିଛି। କରିସ୍ମା ଏବଂ ସଞ୍ଜୟଙ୍କ ଦୁଇଟି ସନ୍ତାନ ଅଛନ୍ତି। ଗୋଟିଏ ଝିଅ ଏବଂ ଗୋଟିଏ ପୁଅ। ଉଭୟ ସନ୍ତାନ କରିସ୍ମାଙ୍କ ସହିତ ରୁହନ୍ତି। ଏବେ ବର୍ତ୍ତମାନ ବଡ ପ୍ରଶ୍ନ ଉଠୁଛି କି ସଞ୍ଜୟ କପୁରଙ୍କ ଦେହାନ୍ତ ପରେ ତାଙ୍କର କୋଟି କୋଟି ସମ୍ପତ୍ତିର ମାଲିକ କିଏ ହେବ ? ଏହାସହ ପତ୍ନୀ କରିସ୍ମା କପୁରଙ୍କୁ କେତେ ସମ୍ପତ୍ତି ମିଳିବ ? ଏନେଇ ସୋସିଆଲ ମିଡିଆରେ ବଡ ଚର୍ଚ୍ଚା। ସଞ୍ଜୟ କପୁର ଏବଂ କରିସ୍ମା କପୁର ୨୦୦୩ ମସିହାରେ ବିବାହ କରିଥିଲେ। କରିସ୍ମାଙ୍କ ପୂର୍ବରୁ, ସଞ୍ଜୟ ଫ୍ୟାଶନ ଡିଜାଇନର୍‌ ଏବଂ ଷ୍ଟାଇଲିଷ୍ଟ ନନ୍ଦିତା ମହତାନୀଙ୍କୁ ବିବାହ କରିଥିଲେ। ଏହି ବିବାହ ୧୯୯୬ ରୁ ୨୦୦୦ ପର୍ଯ୍ୟନ୍ତ ଚାଲିଥିଲା। କରିସ୍ମା ଏବଂ ସଞ୍ଜୟଙ୍କ ବିବାହ ୨୦୦୩ରୁ ୨୦୧୬ ପର୍ଯ୍ୟନ୍ତ ଚାଲିଥିଲା। କରିସ୍ମାଙ୍କୁ ଛାଡପତ୍ର ଦେବା ପରେ, ସେ ପ୍ରିୟା ସଚଦେବଙ୍କୁ ତୃତୀୟ ଥର ବିବାହ କରିଥିଲେ। ସଞ୍ଜୟ କପୁର ଜଣେ ବହୁତ ବଡ଼ ବ୍ୟବସାୟୀ ଥିଲେ। ସେ Sona Comstarର ଅଧ୍ୟକ୍ଷ ଥିଲେ।

ତାଙ୍କ ପିତାଙ୍କ ମୃତ୍ୟୁ ପରେ ସେ ୨୦୧୫ରେ କମ୍ପାନୀର ଦାୟିତ୍ୱ ନେଇଥିଲେ। ବ୍ଲୁମବର୍ଗ ଅନୁଯାୟୀ, Sona Comstarର ବଜାର ମୂଲ୍ୟ ୩୧୦୦୦ କୋଟି ଟଙ୍କା। ସଞ୍ଜୟଙ୍କ ତିନୋଟି ସନ୍ତାନ ଅଛନ୍ତି। କରିସ୍ମା କପୁରଙ୍କ ଦୁଇଟି ସନ୍ତାନ – ସମାଇରା ଏବଂ କିୟାନ ଏବଂ ଦ୍ୱିତୀୟ ସ୍ତ୍ରୀ ପ୍ରିୟା ସଚଦେବଙ୍କ ପୁଅ ଅଜାରିଆସ। ତାଙ୍କ ମୃତ୍ୟୁ ପରେ ସଞ୍ଜୟଙ୍କ ସ୍ଥାନ କିଏ ନେବେ ସେ ବିଷୟରେ ମଧ୍ୟ ରିପୋର୍ଟ ଆରମ୍ଭ ହୋଇଛି। ତଥାପି, ତାଙ୍କ ତିନି ସନ୍ତାନଙ୍କ ମଧ୍ୟରୁ ଏବେ କେହି ତାଙ୍କ ସ୍ଥାନ ନେବେ ନାହିଁ ବୋଲି ଆଶା କରାଯାଉଛି। Sona Comstarର କାର୍ଯ୍ୟ କିଏ ସମ୍ଭାଳିବ ତାହା ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ନିଶ୍ଚିତ ହୋଇନାହିଁ। କୁହାଯାଉଛି ଯେ ସଞ୍ଜୟଙ୍କ ଭଉଣୀ ମନ୍ଦିରା କପୁର ଏବଂ ସୁପର୍ଣା ମୋଟୱାନି ପରିଚାଳନା ଭୂମିକା ଗ୍ରହଣ କରିପାରନ୍ତି।

ଫୋର୍ବସ ଅନୁଯାୟୀ, ସଞ୍ଜୟ କପୁରଙ୍କ ସମ୍ପତ୍ତିର ପରିମାଣ ୧୦୩୦୦ କୋଟି ଟଙ୍କା। ଆଇନ ଅନୁଯାୟୀ, ତାଙ୍କ ଟଙ୍କାର ପରିଚାଳନା ତାଙ୍କ ପତ୍ନୀ ପ୍ରିୟା ସଚଦେବଙ୍କୁ ଦିଆଯାଇଛି। କରିସ୍ମା କପୁରଙ୍କ ଠାରୁ ସଞ୍ଜୟଙ୍କ ଦୁଇ ସନ୍ତାନ ସମାଇରା ଏବଂ କିୟାନ ମଧ୍ୟ ଭଲ ଭାବରେ ଯତ୍ନ ନିଆଯାଇଛି। ରିପୋର୍ଟ ଅନୁଯାୟୀ, ଲିଗାସି ପ୍ଲାନିଂର ଅଂଶ ସ୍ବରୂପ, ସଞ୍ଜୟ ଉଭୟଙ୍କୁ ୧୪ କୋଟି ଟଙ୍କାର ବଣ୍ଡ ଉପହାର ଦେଇଥିଲେ। ସେମାନଙ୍କ ପାଇଁ ପ୍ରତ୍ୟେକଙ୍କ ପାଇଁ ୧୦ ଲକ୍ଷ ଟଙ୍କାର ମାସିକ ଆୟ ମଧ୍ୟ ସୁନିଶ୍ଚିତ କରାଯାଇଥିଲା। ବର୍ତ୍ତମାନ ପର୍ଯ୍ୟନ୍ତ ସେନେଇ ସେମିତି କିଛି ଜଣାପଡିନାହିଁ କି ସଞ୍ଜୟଙ୍କ ସମ୍ପତ୍ତିର ମାଲିକ କିଏ ହେବ ?

Argus News | argus news | Odisha Latest News, Breaking News, Trending News, Live TV