ଗାୟକ ଦିଲଜିତ ଦୋସାଞ୍ଜଙ୍କୁ ଧମକ। ସେ ପୁଣି ଅଭିନେତା ଅମିତାଭ ବଚ୍ଚନଙ୍କୁ ମୁଣ୍ଡିଆ ମାରିବାରୁ ଧମକ ଦିଆଯାଇଥିବା ସୂଚନା ରହିଛି। କିଏ ଏବଂ କାହିଁକି ଏପରି କରିଛି ବୋଲି ସୋସିଆଲ ମିଡିଆରେ ଆଲୋଚନା। ଏକ ରିପୋର୍ଟ ଅନୁଯାୟୀ, ଶିଖସ୍‌ ଫର୍‌ ଜଷ୍ଟିସ (SFJ) ବଲିଉଡ ମେଗାଷ୍ଟାର ଅମିତାଭ ବଚ୍ଚନଙ୍କ ପାଦ ଛୁଇଁବା ପରେ ପଞ୍ଜାବୀ ଗାୟକ-ଅଭିନେତା ଦିଲଜିତ ଦୋସାଞ୍ଜଙ୍କ କନସର୍ଟ ବନ୍ଦ କରିବାକୁ ଧମକ ଦେଇଛି।

ଖାଲିସ୍ତାନୀ ଆତଙ୍କବାଦୀ ସଂଗଠନ ଶିଖସ୍‌ ଫର ଜଷ୍ଟିସ ଅଷ୍ଟ୍ରେଲିଆରେ ପଞ୍ଜାବୀ ଗାୟକ ଦିଲଜିତ ଦୋସାଞ୍ଜଙ୍କ ଆଗାମୀ କନସର୍ଟକୁ ବନ୍ଦ କରିବାକୁ ଧମକ ଦେଇଛି। ଦିଲଜିତ ଦୋସାଞ୍ଝ ଅମିତାଭ ବଚ୍ଚନଙ୍କ ପାଦ ଛୁଇଁବା ପରେ ଏହି ଧମକ ଦିଆଯାଇଛି। ଶିଖସ ଫର ଜଷ୍ଟିସ (SFJ) କହିଛି ଯେ ଅମିତାଭ ବଚ୍ଚନଙ୍କ ପାଦ ଛୁଇଁ ‘୧୯୮୪ ଶିଖ ହତ୍ୟାକାଣ୍ଡର ପ୍ରତ୍ୟେକ ପୀଡିତ, ପ୍ରତ୍ୟେକ ବିଧବା ଏବଂ ପ୍ରତ୍ୟେକ ଅନାଥଙ୍କୁ ଅପମାନିତ କରିଛନ୍ତି।’

ପ୍ରକୃତରେ, କୌନ ବନେଗା କରୋଡ଼ପତିରେ ଅମିତାଭ ବଚ୍ଚନଙ୍କ ପାଦ ଛୁଇଁବା ପରେ ଦିଲଜିତ ଦୋସାଞ୍ଜ କଠୋର ସମାଲୋଚନାର ସମ୍ମୁଖୀନ ହେଉଛନ୍ତି। ପଞ୍ଜାବୀ ଗାୟକ ଦିଲଜିତ ଦୋସାଞ୍ଜଙ୍କ କନସର୍ଟ ନଭେମ୍ବର ୧ରେ ଅଷ୍ଟ୍ରେଲିଆରେ ହେବାକୁ ଯାଉଛି। ଏହା ପୂର୍ବରୁ, ଖାଲିସ୍ତାନୀ ଆତଙ୍କବାଦୀ ସଂଗଠନ ଶିଖସ୍‌ ଫର ଜଷ୍ଟିସ ଏହାକୁ ବନ୍ଦ କରିବାକୁ ଧମକ ଦେଇଛି।ଆତଙ୍କବାଦୀ ସଂଗଠନ ଅନୁଯାୟୀ, ଅମିତାଭ ବଚ୍ଚନ ହେଉଛନ୍ତି ସେହି ବଲିଉଡ ଅଭିନେତା ଯିଏ ୧୯୮୪ ଅକ୍ଟୋବର ୩୧ରେ ‘ଖୁନ କା ଅବଦାଲା ଖୁନ ସେ’ ସ୍ଲୋଗାନ ଦେଇ ଭାରତୀୟ ଜନତାକୁ ଉସୁକାଇଥିଲେ, ଯାହା ଫଳରେ ୩୦,୦୦୦ ରୁ ଅଧିକ ଶିଖଙ୍କ ମୃତ୍ୟୁ ହୋଇଥିଲା। ଏପରି ପରିସ୍ଥିତିରେ, ଦିଲଜିତ ଦୋସାଞ୍ଜ ଅମିତାଭ ବଚ୍ଚନଙ୍କ ପାଦ ଛୁଇଁବା ପରେ ଏହି ଗ୍ୟାଙ୍ଗ କ୍ରୋଧିତ ହୋଇ ପଡ଼ିଛି। ଯାହାକୁ ଦୃଷ୍ଟିରେ ରଖି ଦିଲଜିତଙ୍କୁ ଧମକ ଦିଆଯାଇଥିବା ଜଣାପଡିଛି।

ଦିଲଜିତ ଦୋସାଞ୍ଜ:

ପଞ୍ଜାବୀ ସୁପରଷ୍ଟାର ଦିଲଜିତ ଦୋସାଞ୍ଜଙ୍କ ଅଭିନୀତ ବାୟୋପିକ୍ ଫିଲ୍ମ ‘ଅମର ସିଂ ଚମକିଲା’ଇଣ୍ଟରନ୍ୟାସନାଲ ଏମି ପୁରସ୍କାର ୨୦୨୫ରେ ଦୁଇଟି ବିଭାଗରେ ମନୋନୀତ ହୋଇଛି। ‘ଶ୍ରେଷ୍ଠ ଅଭିନେତା’ ଏବଂ ‘ଶ୍ରେଷ୍ଠ ଟିଭି ମୁଭି’। ଏହି ସଫଳତା ଭାରତୀୟ ସିନେମା ଓ ପଞ୍ଜାବୀ ସଂସ୍କୃତିର ବିଶ୍ୱ ମଞ୍ଚରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସାବ୍ୟସ୍ତ ହୋଇଛି। ଏନେଇ ଦିଲଜିତ ଇନଷ୍ଟାଗ୍ରାମରେ ନିଜର ଖୁସି ବ୍ୟକ୍ତ କରି ନିର୍ଦ୍ଦେଶକ ଇମିତିଆଜ ଅଲୀ ଏବଂ ସମଗ୍ର ଟିମ୍‌କୁ କୃତଜ୍ଞତା ଜଣାଇଛନ୍ତି। ସେ ଲେଖିଛନ୍ତି, “ଏହା ସବୁ ଇମିତିଆଜ ଅଲୀ ସାରଙ୍କ କାରଣରୁ ସମ୍ଭବ ହୋଇଛି।” ଏହି ମନୋନୟନ ତାଙ୍କର ଅଭିନୟ ଦକ୍ଷତା ଏବଂ ଫିଲ୍ମର ଶୈଲ୍ପିକ ଉତ୍କର୍ଷତାର ଏକ ସ୍ୱୀକୃତି।

ଅଧିକ ପଢ଼ନ୍ତୁ ମନୋରଞ୍ଜନ ଖବର: