ଭୁବନେଶ୍ଵର: ଅପେକ୍ଷାର ଅନ୍ତ, ଦ୍ଵିତୀୟ ଇନିଂସ ଆରମ୍ଭ କରିବେ ସୁପରଷ୍ଟାର ଅନୁଭବ ମହାନ୍ତି । ଧରିବେ ବାନ୍ଧବୀ ଜାଗ୍ରତି ଶୁକ୍ଳାଙ୍କ ହାତ । ବନ୍ଧୁତାରୁ ବାନ୍ଧି ହେବେ ବନ୍ଧନରେ । ଶୁକ୍ରବାର ଠାରୁ ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ଫଟୋରେ ମୋହର ମାରିଛନ୍ତି ଜାଗ୍ରତି ଶୁକ୍ଳା । ଅନୁଭବ ମହାନ୍ତିଙ୍କୁ ସେ ବାହା ହେଉଥିବା ଏବଂ ନିର୍ବନ୍ଧ ସରିଥିବା ସ୍ପଷ୍ଟ କରିଛନ୍ତି ।

ସୋସିଆଲ୍ ମିଡିଆ ଫେସ୍‌ବୁକ୍‌ରେ ଅନୁଭବଙ୍କ ସହ ଫଟୋ ପୋଷ୍ଟ କରିଛନ୍ତି ଜାଗ୍ରତି । ଯେଉଁଥିରେ ଅନୁଭବ, ଜାଗ୍ରତିଙ୍କୁ ମୁଦି ପିନ୍ଧାଇଥିବା ଦେଖା ଯାଉଛି । ଜାଗ୍ରତି ଲେଖିଛନ୍ତି, ମୁଁ ମୋର ଭଲ ବନ୍ଧୁଙ୍କୁ ହଁ କହିଲି । ଆଶୀର୍ବାଦ ପାଇଁ ଆମ ପରିବାର ଓ ଶୁଭେଛୁ, ବନ୍ଧୁଙ୍କ ନିକଟରେ କୃତଜ୍ଞ । ବନ୍ଧୁତାର ବନ୍ଧନ ନୂଆ ରୂପ ନେଇଛି । ଆମ ଦୁହିଁଙ୍କ ପ୍ରେମ କାହାଣୀ ଏକାଠି ଲେଖିବାକୁ ମୁଁ ଆଉ ଅପେକ୍ଷା କରି ରହିପାରିବି ନାହିଁ ।

ଅନୁଭବଙ୍କ ସହ ନିର୍ବନ୍ଧ ନେଇ ଜାଗ୍ରତିଙ୍କ ଫେସବୁକ୍ ପୋଷ୍ଟ ପରେ ଶୁଭେଚ୍ଛାର ସୁଅ ଛୁଟିବାରେ ଲାଗିଛି । କିଛିଦିନ ତଲେ ଜାଗ୍ରତି ଲେଖିଥିବା ଅନୁଭବ ମହାନ୍ତିଙ୍କ ବାୟୋଗ୍ରାଫି ବହି ଉନ୍ମୋଚନ ହୋଇଥିଲା । ଏହା ପରେ ସଂଗ୍ରାମଙ୍କ ସହ ଅର୍ଗସ ପଡକାଷ୍ଟରେ ଜାଗ୍ରତି, ଅନୁଭବଙ୍କୁ ବାହା ହେବେ ବୋଲି କହିଥିଲେ । ଆଉ ଏବେ ଉଭୟଙ୍କ ନିର୍ବନ୍ଧ ସରିଛି ।

ପୂର୍ବରୁ ସୁପରଷ୍ଟାର ଅନୁଭବ ମହାନ୍ତି ତାଙ୍କ ରିଲ୍ ହିରୋଇନ୍ ବର୍ଷା ପ୍ରିୟଦର୍ଶିନୀଙ୍କୁ ବିବାହ କରିଥିଲେ । ତେବେ ବିବାହର କିଛିବର୍ଷ ପରେ ଦୁହିଁଙ୍କ ସମ୍ପର୍କରେ ଫାଟ ଆସିଥିଲା । କୋର୍ଟ କଚେରିରେ ଗଡ଼ିଥିଲା ମାମଲା । ସେପଟେ ସାଂସଦ ଅନୁଭବଙ୍କ ସାକ୍ଷାତକାର ନେଇ ତାଙ୍କର ଘନିଷ୍ଠ ହୋଇଥିଲେ ସାମ୍ବାଦିକା ଜାଗ୍ରତି ଶୁକ୍ଲା । ଆଉ ଶେଷରେ ଅନୁଭବଙ୍କ ସହ ବର୍ଷାଙ୍କ ଛାଡ଼ପତ୍ର ହୋଇଥିଲା । ଆଉ ଏହା ପରେ ହିଁ ଚର୍ଚ୍ଚା ଜୋର୍ ହୋଇଥିଲା ଜାଗ୍ରତିଙ୍କୁ ଦ୍ଵିତୀୟ ବିବାହ କରିବେ ଅନୁଭବ ।

ପୂର୍ବରୁ ସମ୍ପର୍କକୁ ଉଭୟ ଅନୁଭବ ଓ ଜାଗ୍ରତି ବନ୍ଧୁତା କହି ଆସୁଥିଲେ । ଏବେ ନିର୍ବନ୍ଧ ହୋଇଥିବା ବେଳେ ଜାଗ୍ରତି ଖୋଦ୍ ଲେଖିଛନ୍ତି ଉଭୟ ମିଶି ପ୍ରେମକାହାଣୀ ଲେଖିବାକୁ ଆଉ ଅପେକ୍ଷା କରି ପାରିବେ ନାହିଁ । ଜାଗ୍ରତି ଓ ଅନୁଭବଙ୍କ ବନ୍ଧନକୁ ନେଇ ତାଙ୍କ ପ୍ରଶଂସକ ବି ଖୁସି ଜାହିର୍ କରିଛନ୍ତି ।

Argus News | argus news | Odisha Latest News, Breaking News, Trending News, Live TV