Jailer2 Box Office / ୫ ଦିନରେ ୪୭୭ କୋଟି ପାର୍‌ କଲା ‘ଜେଲର ୨’, ରଜନୀକାନ୍ତଙ୍କ କ୍ରେଜ୍‌ରେ ଝୁମୁଛନ୍ତି ଦର୍ଶକ

ସୁପରଷ୍ଟାର ରଜନୀକାନ୍ତଙ୍କ ଫିଲ୍ମ ‘ଜେଲର ୨’ ବକ୍ସ ଅଫିସ୍‌ରେ ଜବରଦସ୍ତ ପ୍ରଦର୍ଶନ କରୁଛି । ଫିଲ୍ମଟିରେ ପୁଣି ଥରେ ରଜନୀକାନ୍ତ ନିଜର ଲୋକପ୍ରିୟ ଚରିତ୍ର ‘ମୁଥୁଭେଲ ପାଣ୍ଡିଆନ୍’ ଭୂମିକାରେ ନଜର ଆସିଛନ୍ତି । ରିଲିଜ୍‌ର ପାଞ୍ଚ ଦିନ ପରେ ମଧ୍ୟ ଫିଲ୍ମର ଆୟ ଜାରି ରହିଛି । ତେବେ ଫିଲ୍ମର ସବୁଠାରୁ ବଡ଼ ଆକର୍ଷଣ ହେଉଛି ହ୍ରିତିକ ରୋଶନଙ୍କ ସରପ୍ରାଇଜ୍ କ୍ୟାମିଓ । ତାଙ୍କର ଦମଦାର ଏଣ୍ଟ୍ରି ଏବଂ ରଜନୀକାନ୍ତଙ୍କ ସହ ତାଙ୍କର କେମିଷ୍ଟ୍ରିକୁ ଦର୍ଶକ ବେଶ୍ ପସନ୍ଦ କରୁଛନ୍ତି । ସୋସିଆଲ ମିଡିଆରେ ଏହି ଦୃଶ୍ୟକୁ ନେଇ ଜୋରଦାର ଚର୍ଚ୍ଚା ହେଉଛି ।

ପଞ୍ଚମ ଦିନରେ ମଧ୍ୟ ଜବରଦସ୍ତ ଆୟ
ସାକନିଲ୍କର ରିପୋର୍ଟ ଅନୁଯାୟୀ, ‘ଜେଲର ୨’ ପଞ୍ଚମ ଦିନରେ ଭାରତୀୟ ବକ୍ସ ଅଫିସ୍‌ରେ ୪୨.୩୫ କୋଟି ଟଙ୍କା ଆୟ କରିଛି । ରବିବାର ଫିଲ୍ମର ଆୟ ୫୫.୮୫ କୋଟି ଟଙ୍କା ଥିବାବେଳେ ସୋମବାର ଏହା ୨୪.୨ ପ୍ରତିଶତ ହ୍ରାସ ପାଇଛି । ପଞ୍ଚମ ଦିନରେ ମୋଟ ୧୫,୨୧୫ଟି ଶୋ’ ହୋଇଥିବା ବେଳେ ଦର୍ଶକଙ୍କ ଉପସ୍ଥିତି ହାର ୪୯.୯ ପ୍ରତିଶତ ରହିଛି ।

ପଞ୍ଚମ ଦିନରେ କେଉଁ ଭାଷାରୁ କେତେ ଆୟ ?
- ତାମିଲ୍: ୩୧.୪୦ କୋଟି ଟଙ୍କା, ମୋଟ ୭,୮୫୩ଟି ଶୋ’।
- ତେଲୁଗୁ: ୭.୧୫ କୋଟି ଟଙ୍କା, ମୋଟ ୨,୧୪୪ଟି ଶୋ’ ।
- ହିନ୍ଦୀ: ୩.୩୫ କୋଟି ଟଙ୍କା, ମୋଟ ୫,୦୪୪ଟି ଶୋ’।
- କନ୍ନଡ଼:୦.୪୫ ଲକ୍ଷ ଟଙ୍କା ଆୟ ହୋଇଥିବା ରିପୋର୍ଟରେ ଉଲ୍ଲେଖ ରହିଛି । ମୋଟ ୧୭୪ଟି ଶୋ’ ହୋଇଥିଲା ।

ପାଞ୍ଚ ଦିନରେ କେତେ ରୋଜଗାର କଲା ‘ଜେଲର ୨’ ?
ଫିଲ୍ମଟି ପ୍ରଥମ ଦିନରେ ୫୯.୭୦ କୋଟି ଟଙ୍କା ଆୟ ସହ ଦମଦାର ଆରମ୍ଭ କରିଥିଲା । ଏହା ପରେ ଦ୍ୱିତୀୟ ଦିନରେ ୩୭.୧୦ କୋଟି, ତୃତୀୟ ଦିନରେ ୪୭.୨୫ କୋଟି ଏବଂ ରବିବାର ୫୫.୮୫ କୋଟି ଟଙ୍କା ଆୟ କରିଥିଲା । ପଞ୍ଚମ ଦିନରେ ଫିଲ୍ମର ଆୟ ୪୨.୩୫ କୋଟି ଟଙ୍କା ରହିଥିଲା ।

ରିପୋର୍ଟ ଅନୁଯାୟୀ, ଫିଲ୍ମଟି ବିଦେଶୀ ବଜାରରୁ ଗୋଟିଏ ଦିନରେ ୧୦ କୋଟି ଟଙ୍କା ଆୟ କରିଛି । ଏହାର ମୋଟ ବିଦେଶୀ ଆୟ ୧୯୪ କୋଟି ଟଙ୍କାରେ ପହଞ୍ଚିଛି । ଅନ୍ୟପକ୍ଷରେ, ଫିଲ୍ମର ବିଶ୍ୱବ୍ୟାପୀ ଆୟ ୪୭୭.୭୫ କୋଟି ଟଙ୍କା ହୋଇଛି ।

୫୦୦ କୋଟିରୁ ମାତ୍ର ୨୨.୨୫ କୋଟି ଦୂରରେ
‘ଜେଲର ୨’ର ବିଶ୍ୱବ୍ୟାପୀ ଆୟ ୪୭୭.୭୫ କୋଟି ଟଙ୍କାରେ ପହଞ୍ଚିଥିବାରୁ ଏବେ ୫୦୦ କୋଟି ଟଙ୍କାର ମାଇଲଖୁଣ୍ଟ ଛୁଇଁବା ପାଇଁ ଫିଲ୍ମକୁ ଆଉ ମାତ୍ର ୨୨.୨୫ କୋଟି ଟଙ୍କା ଆବଶ୍ୟକ । ରଜନୀକାନ୍ତଙ୍କ ଷ୍ଟାରଡମ୍ ଏବଂ ହ୍ରିତିକ ରୋଶନଙ୍କ ସରପ୍ରାଇଜ୍ କ୍ୟାମିଓ ଯୋଗୁଁ ଫିଲ୍ମଟି ଦର୍ଶକଙ୍କ ମଧ୍ୟରେ ଚର୍ଚ୍ଚାରେ ରହିଛି । ଏବେ ସମସ୍ତଙ୍କ ନଜର ଏହା ଉପରେ ଯେ, ଫିଲ୍ମଟି କେବେ ୫୦୦ କୋଟି ଟଙ୍କାର ଆୟ ଅତିକ୍ରମ କରୁଛି ।