ମୁମ୍ବାଇ: ବଲିଉଡ୍ ଅଭିନେତ୍ରୀ କରିସ୍ମା ଶର୍ମା ଗୁରୁତର । ମୁମ୍ବାଇ ଲୋକାଲ ଟ୍ରେନ୍‌ରୁ ଡେଇଁ ପଡ଼ିବା ପରେ କରିସ୍ମାଙ୍କ ଶରୀରରେ ଗଭୀର ଆଘାତ ଲାଗିଛି । ଏବେ ସେ ହସ୍ପିଟାଲ୍‌ରେ ଚିକିତ୍ସିତ ହେଉଛନ୍ତି । କରିସ୍ମାଙ୍କ ମୁଣ୍ଡରେ କ୍ଷତ ହୋଇଛି । ରାଗିଣୀ MMS ରିଟର୍ଣ୍ଣ ଓ ପ୍ୟାର କା ପଞ୍ଚନାମା ଭଳି ଫିଲ୍ମରେ କାମ କରିଥିବା କରିସ୍ମା କାହିଁକି ଚଳନ୍ତା ଟ୍ରେନ୍‌ରୁ ଡେଇଁ ପଡ଼ିଲେ । ନିଜେ ସେ ତା'ର ଖୁଲାସା କରିଛନ୍ତି ।

ସୋସିଆଲ୍ ମିଡିଆରେ କରିସ୍ମା ଷ୍ଟାଟସ୍ ଦେଇଛନ୍ତି । ଯେଉଁଥିରେ ସେ ଲେଖିଛନ୍ତି ଯେ, ସୁଟିଂ ପାଇଁ ବିଳମ୍ବ ହେଉଥିବାରୁ ସେ ତାଙ୍କ ସାଥୀମାନଙ୍କ ସହ ଲୋକାଲ୍ ଟ୍ରେନ୍‌ରେ ଚର୍ଚ୍ଚଗେଟ୍ ଯିବାକୁ ନିଷ୍ପତ୍ତି ନେଇଥିଲେ । ଆଉ ଟ୍ରେନ୍‌ରେ ଚଢ଼ିବା ମାତ୍ରେ ବେଗ ବଢ଼ି ଯାଇଥିଲା । ଫଳରେ କରିସ୍ମାଙ୍କ ବନ୍ଧୁ ପଛରେ ରହି ଯାଇଥିଲେ ।

ଆଉ ସାଥୀମାନେ ଟ୍ରେନ୍‌ରେ ଚଢ଼ି ପାରିନଥିବାରୁ ଡରରେ ଚଳନ୍ତା ଟ୍ରେନ୍‌ରୁ କରିସ୍ମା ଡେଇଁ ପଡ଼ିଥିଲେ । ଫଳରେ ସେ ଗୁରୁତର ଭାବେ ଆହତ ହୋଇଛନ୍ତି । ଏବେ ହସ୍ପିଟାଲରେ କରିସ୍ମାଙ୍କ ଚିକିତ୍ସା କରାଯାଉଛି । ଏନେଇ ଅଭିନେତ୍ରୀ କରିସ୍ମା ଲାଲ୍ ଶର୍ମା ତାଙ୍କ ଇନଷ୍ଟାଗ୍ରାମରେ ଷ୍ଟାଟସ୍ ଦେଇ ସମସ୍ତଙ୍କୁ ଅବଗତ କରିଛନ୍ତି ।

କରିସ୍ମା ଲେଖିଛନ୍ତି, ଚର୍ଚ୍ଚ ଗେଟ୍ ଯାଉଥିବା ବେଳେ ସେ ଶାଢ଼ୀ ପିନ୍ଧିଥିଲେ । ଟ୍ରେନ୍‌ରୁ ଡେଇଁବା ଫଳରେ ତାଙ୍କ ମୁଣ୍ଡରେ ଆଘାତ ଲାଗିଛି । ଶରୀରରେ ବି କ୍ଷତ ହୋଇଛି । ଡାକ୍ତର MRI କରିବା ଲାଗି ପରାମର୍ଶ ଦେଇଛନ୍ତି । ଏବେ ଡାକ୍ତର କରିସ୍ମାଙ୍କୁ ଗୋଟିଏ ଦିନ ପାଇଁ ନିରୀକ୍ଷଣରେ ରଖିଛନ୍ତି ।

Argus News | argus news | Odisha Latest News, Breaking News, Trending News, Live TV