Kriti Sanon / ରାକ୍ଷୀ ବିଜ୍ଞାପନରେ କ୍ରିତିଙ୍କ ଲୁକ୍‌, ସୋସିଆଲ୍ ମିଡିଆରେ ଝଡ଼ ଆଉ ତା'ପରେ...

ବଲିଉଡ୍ ଅଭିନେତ୍ରୀ କ୍ରିତି ସାନନଙ୍କ ରକ୍ଷାବନ୍ଧନକୁ ନେଇ ଆସିଥିବା ଏକ ବିଜ୍ଞାପନକୁ କେନ୍ଦ୍ର କରି ସୋସିଆଲ ମିଡିଆରେ ବିବାଦ ଦେଖାଦେଇଛି । ଅଗଷ୍ଟ ୨୫ରେ ସାମ୍ନାକୁ ଆସିଥିବା ଏହି ବିଜ୍ଞାପନରେ କ୍ରିତିଙ୍କ ଡିପ୍ ନେକ୍ ଓ ବ୍ରାଲେଟ୍ ଷ୍ଟାଇଲ୍ ବ୍ଲାଉଜ୍‌କୁ ନେଇ କିଛି ୟୁଜର୍‌ ପ୍ରଶ୍ନ ଉଠାଇଥିଲେ । ପାରମ୍ପରିକ ଭାରତୀୟ ପର୍ବ ରକ୍ଷାବନ୍ଧନ ସହ ଜଡ଼ିତ ବିଜ୍ଞାପନରେ ଏଭଳି ପୋଷାକ ଉପଯୁକ୍ତ ନୁହେଁ ବୋଲି କିଛି ଲୋକ ମତ ଦେଇଥିଲେ ।

ଏହି ବିବାଦରେ ଅଭିନେତ୍ରୀ କଙ୍ଗନା ରଣାୱତ ମଧ୍ୟ ସାମିଲ ହୋଇଥିଲେ । ସେ ମଧ୍ୟ କ୍ରିତିଙ୍କ ପୋଷାକକୁ ନେଇ ପ୍ରଶ୍ନ ଉଠାଇଥିଲେ । ତେବେ ଏହାରି ମଧ୍ୟରେ କ୍ରିତିଙ୍କ ଭଉଣୀ ନୁପୁର ସାନନ ତାଙ୍କ ସମର୍ଥନରେ ଆଗକୁ ଆସିଛନ୍ତି ।

ଟ୍ରୋଲ୍‌ମାନଙ୍କୁ ନୁପୁରଙ୍କ କଡ଼ା ଜବାବ
ସୋସିଆଲ ମିଡିଆରେ ସକ୍ରିୟ ଥିବା ନୁପୁର, କ୍ରିତିଙ୍କ ଷ୍ଟୋରୀକୁ ରିପୋଷ୍ଟ କରି ଟ୍ରୋଲ୍‌ମାନଙ୍କୁ ଜବାବ ଦେଇଛନ୍ତି । ସେ କହିଛନ୍ତି, ଜଣେ ମହିଳାଙ୍କ ପୋଷାକକୁ ନେଇ ଅନ୍ୟ କେହି ଏତେ ବିଚଳିତ କାହିଁକି ହେଉଛନ୍ତି, ତାହା ଭାବିବା ଦରକାର । ନିଜକୁ ପରିବର୍ତ୍ତନ କରି ସମୟ ସହ ଆଗକୁ ବଢ଼ିବାର ଆବଶ୍ୟକତା ରହିଛି ବୋଲି ସେ ଟ୍ରୋଲ୍‌ମାନଙ୍କୁ କହିଛନ୍ତି ।

ନୁପୁର ଆହୁରି ମଧ୍ୟ କହିଛନ୍ତି ଯେ, କ୍ରିତି ଯାହାଙ୍କୁ ରାକ୍ଷୀ ବାନ୍ଧନ୍ତି, ସେ ନିଜେ ତାଙ୍କ ଭଉଣୀ । ଯଦି ତାଙ୍କୁ ନିଜ ଭଉଣୀର ପୋଷାକକୁ ନେଇ କୌଣସି ସମସ୍ୟା ନାହିଁ, ତେବେ ଅନ୍ୟମାନଙ୍କର ସେଥିରେ ଅସୁବିଧା କାହିଁକି ବୋଲି ସେ ପ୍ରଶ୍ନ କରିଛନ୍ତି ।

କ୍ରିତି ମଧ୍ୟ ଭାଙ୍ଗିଲେ ନୀରବତା
ଏହି ବିବାଦ ଉପରେ କ୍ରିତି ସାନନ ମଧ୍ୟ ଏକ ଲମ୍ବା ନୋଟ୍ ଜରିଆରେ ନିଜ ମତ ରଖିଛନ୍ତି । ତାଙ୍କ କହିବା ଅନୁସାରେ, ପର୍ବପର୍ବାଣୀର ପ୍ରକୃତ ଭାବନା କେବଳ ପୋଷାକରେ ନୁହେଁ; ବରଂ ସେହି ସମ୍ପର୍କ, ଭଲପାଇବା ଓ ପରମ୍ପରାରେ ରହିଛି, ଯାହାକୁ ଆମେ ହୃଦୟରୁ ପାଳନ କରୁ ।

କ୍ରିତି କହିଛନ୍ତି ଯେ, ରକ୍ଷାବନ୍ଧନ ତାଙ୍କ ପାଇଁ ଭଲପାଇବା ଓ ପରସ୍ପରର ସୁରକ୍ଷାର ସମ୍ପର୍କକୁ ପାଳନ କରିବାର ପର୍ବ । ସେ ଓ ନୁପୁର ପରସ୍ପରକୁ ରାକ୍ଷୀ ବାନ୍ଧନ୍ତି ଏବଂ ଦୁହେଁ ବିଶ୍ୱାସ କରନ୍ତି ଯେ, ଜଣେ ଭାଇ ଯେପରି ଭଉଣୀଙ୍କୁ ସୁରକ୍ଷା ଦେଇପାରନ୍ତି, ସେହିପରି ଦୁଇ ଭଉଣୀ ମଧ୍ୟ ପରସ୍ପରର ସୁରକ୍ଷା କରିପାରନ୍ତି । ସେମାନେ ପରସ୍ପରର ଭଲ ସ୍ୱାସ୍ଥ୍ୟ, ସୁଖ ଓ ଦୀର୍ଘାୟୁ କାମନା କରନ୍ତି । କ୍ରିତି ଏହା ମଧ୍ୟ କହିଛନ୍ତି ଯେ, ତାଙ୍କ ଏହି ପ୍ରାର୍ଥନା ତାଙ୍କ ପୋଷା କୁକୁରମାନଙ୍କ ପାଇଁ ମଧ୍ୟ ରହେ, କାରଣ ସେମାନେ ତାଙ୍କ ପରିବାରର ଅଂଶ ।

ମହିଳାଙ୍କ ପୋଷାକ ନେଇ ପ୍ରଶ୍ନ ଉଠାଇଲେ କ୍ରିତି
କ୍ରିତି ମହିଳାଙ୍କ ପୋଷାକକୁ ନେଇ ସମାଜର ମନୋଭାବ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି । ମହିଳାମାନଙ୍କୁ କେବେ ପର୍ଯ୍ୟନ୍ତ କ'ଣ ପିନ୍ଧିବା ଉଚିତ ବୋଲି କୁହାଯିବ ବୋଲି ସେ ପ୍ରଶ୍ନ କରିଛନ୍ତି । ତାଙ୍କ ମତରେ, ସମୟ ସହିତ ଏଥନିକ୍ ଫ୍ୟାଶନ୍‌ରେ ଅନେକ ପରିବର୍ତ୍ତନ ଆସିଛି । ତଥାପି ଜଣେ ମହିଳା ନିଜ ସଂସ୍କୃତି ଓ ପରମ୍ପରା ସହ କେତେ ଜଡ଼ିତ, ତାହା କେବଳ ତାଙ୍କ ପୋଷାକ ଦେଖି କାହିଁକି ବିଚାର କରାଯିବ ବୋଲି ସେ କହିଛନ୍ତି ।

କ୍ରିତିଙ୍କ ସ୍ପଷ୍ଟ ମତ ହେଉଛି ସଂସ୍କୃତି ଓ ପରମ୍ପରା ମଣିଷର ହୃଦୟରେ ରହେ, କେବଳ ପୋଷାକ କିମ୍ବା ନେକ୍‌ଲାଇନ୍‌ରେ ନୁହେଁ । ତାଙ୍କ ଏହି ବୟାନ ପରେ ରକ୍ଷାବନ୍ଧନ ବିଜ୍ଞାପନକୁ ନେଇ ଚାଲିଥିବା ବିବାଦ ଆହୁରି ଚର୍ଚ୍ଚାର ବିଷୟ ପାଲଟିଛି ।