Ramayana / ୧୯୮୭ର ରାମାୟଣ vs ୨୦୨୬ର ରାମାୟଣ: ବଦଳିଗଲା ଚରିତ୍ରଙ୍କ ରୂପ, ଜାଣନ୍ତୁ କ’ଣ ରହିଛି ଫରକ

ନିତେଶ ତିୱାରୀଙ୍କ ନୂଆ ଫିଲ୍ମ ‘ରାମାୟଣ’କୁ ନେଇ ଦର୍ଶକଙ୍କ ମଧ୍ୟରେ ଚର୍ଚ୍ଚା ଜୋରଦାର । ତେବେ ୧୯୮୭ରେ ରାମାନନ୍ଦ ସାଗରଙ୍କ ରାମାୟଣ ଯେଉଁ ଛାପ ଛାଡ଼ିଥିଲା, ତାହା ସହ ନୂଆ ଫିଲ୍ମର ତୁଳନା ହେବା ସ୍ୱାଭାବିକ । ଉଭୟରେ କାହାଣୀ ସମାନ ହେଲେ ମଧ୍ୟ ଚରିତ୍ରଙ୍କ ଚିତ୍ରଣ ଏବଂ ଉପସ୍ଥାପନାରେ ଅନେକ ପରିବର୍ତ୍ତନ ଦେଖିବାକୁ ମିଳୁଛି।

ରାମଙ୍କ ଭୂମିକାରେ ଅରୁଣ ଗୋଭିଲ ଓ ରଣବୀର କପୁର
୧୯୮୭ରେ ଅରୁଣ ଗୋଭିଲଙ୍କ ରାମ ଚରିତ୍ର ଶାନ୍ତ, ସୌମ୍ୟ ଓ ଭକ୍ତିଭାବରେ ପରିପୂର୍ଣ୍ଣ ଥିଲା । ଅନ୍ୟପଟେ ନୂଆ ଫିଲ୍ମରେ ରଣବୀର କପୁରଙ୍କୁ ଜଣେ ଶାରୀରିକ ଭାବେ ସକ୍ରିୟ ଯୋଦ୍ଧା ରାଜକୁମାର ଭାବେ ଦେଖାଯାଇଛି । ଅରୁଣ ଗୋଭିଲ ଏଥର ଦଶରଥଙ୍କ ଭୂମିକାରେ ନଜର ଆସିଛନ୍ତି ।

ସୀତାଙ୍କ ଚରିତ୍ରରେ ବଡ଼ ପରିବର୍ତ୍ତନ
ଦୀପିକା ଚିଖଲିଆଙ୍କ ସୀତା ଚରିତ୍ରରେ ଶାଳୀନତା, ଧୈର୍ଯ୍ୟ ଓ ଆତ୍ମସମ୍ମାନ ଦେଖିବାକୁ ମିଳୁଥିଲା । ଅନ୍ୟପଟେ ସାଇ ପଲ୍ଲବୀଙ୍କ ସୀତାଙ୍କୁ ଅଧିକ ସାହସୀ ଓ ଆଧୁନିକ ରୂପରେ ଉପସ୍ଥାପନ କରାଯାଇଛି ।

ରାବଣଙ୍କ ଚରିତ୍ରରେ ଅରବିନ୍ଦ ତ୍ରିବେଦୀ ଓ ୟଶ
ଅରବିନ୍ଦ ତ୍ରିବେଦୀଙ୍କ ରାବଣ ଥିଲେ ଅହଂକାରୀ, ଭୟଙ୍କର ଓ ପ୍ରଭାବଶାଳୀ । କିନ୍ତୁ ନୂଆ ଫିଲ୍ମରେ ୟଶଙ୍କ ରାବଣଙ୍କୁ ଜଣେ ବୁଦ୍ଧିମାନ, ରାଜନୈତିକ ଭାବେ ଚତୁର ଏବଂ ଜଟିଳ ଶାସକ ଭାବେ ଦେଖାଯାଇଛି ।

ଲକ୍ଷ୍ମଣ ଓ ଶୂର୍ପଣଖାଙ୍କ ବଦଳିଥିବା ରୂପ
ସୁନୀଲ ଲହରୀଙ୍କ ଲକ୍ଷ୍ମଣ ଚରିତ୍ରରେ ଭାଇଙ୍କ ପ୍ରତି ନିଷ୍ଠା ଓ ଆବେଗ ଥିଲା । ନୂଆ ଫିଲ୍ମରେ ରବି ଦୁବେଙ୍କ ଲକ୍ଷ୍ମଣ ଅଧିକ ଆଧୁନିକ ଓ ଚଞ୍ଚଳ ଦେଖାଯାଇଛନ୍ତି । ସେହିପରି ରେଣୁ ଧାରିୱାଲଙ୍କ ଶୂର୍ପଣଖା ଚରିତ୍ର ପୂର୍ବରୁ ଭୟଙ୍କର ରୂପରେ ଥିବାବେଳେ ରକୁଲ ପ୍ରୀତ ସିଂହଙ୍କୁ ନୂଆ ଫିଲ୍ମରେ ଲଙ୍କାର ରାଜକୁମାରୀ ଭାବେ ଆକର୍ଷଣୀୟ ରୂପରେ ଦେଖାଯାଇଛି ।

କୈକେୟୀଙ୍କ ଚରିତ୍ରରେ ମଧ୍ୟ ପରିବର୍ତ୍ତନ
ପଦ୍ମା ଖାନ୍ନାଙ୍କ କୈକେୟୀ ଚରିତ୍ର ମନ୍ଥରାଙ୍କ ପ୍ରଭାବରେ ଭ୍ରମିତ ହୋଇଥିବା ଜଣେ ରାଣୀ ଥିଲେ । ଅନ୍ୟପଟେ ଲାରା ଦତ୍ତାଙ୍କ କୈକେୟୀଙ୍କୁ ଜଣେ ଦୃଢ଼ ଇଚ୍ଛାଶକ୍ତିସମ୍ପନ୍ନ ଓ ରାଜନୈତିକ ଭାବେ ସଚେତନ ରାଣୀ ଭାବେ ଦର୍ଶାଯାଇଛି ।

ସାମଗ୍ରିକ ଭାବେ ରାମାନନ୍ଦ ସାଗରଙ୍କ ରାମାୟଣ ସରଳତା ଓ ଭାବପ୍ରବଣ ଅଭିନୟ ପାଇଁ ଆଜି ମଧ୍ୟ ଲୋକପ୍ରିୟ । ନୂଆ ରାମାୟଣ ଆଧୁନିକ ପ୍ରଯୁକ୍ତି, ବଡ଼ ବଜେଟ୍ ଓ ଭବ୍ୟ ଭିଜୁଆଲ୍ ଇଫେକ୍ଟସ୍‌ରେ ସଜ୍ଜିତ । ଏବେ ଏହାର ପ୍ରଥମ ଭାଗକୁ ନେଇ ଚର୍ଚ୍ଚା ଚାଲିଥିବାବେଳେ ୨୦୨୮ରେ ଦ୍ୱିତୀୟ ଭାଗ ଆସିବା ପରେ କାହାଣୀ କେଉଁ ମୋଡ଼ ନେବ, ତାହା ଦେଖିବାକୁ ବାକି ରହିଲା ।