Ramayana / ‘ରାମାୟଣ’କୁ ନେଇ ବଢ଼ିଲା ବିବାଦ, ସୀତାଙ୍କ ଫାଇଟ୍ ସିନ୍‌କୁ ନେଇ ମୁକେଶ ଖାନ୍ନା କହିଲେ...

ରଣବୀର କପୁରଙ୍କ ଅଭିନୀତ ଫିଲ୍ମ ‘ରାମାୟଣ’କୁ ନେଇ ବିବାଦ ଧୀରେ ଧୀରେ ବଢ଼ିବାରେ ଲାଗିଛି । ଫିଲ୍ମର ବିଭିନ୍ନ ଦୃଶ୍ୟକୁ ନେଇ ସୋସିଆଲ ମିଡିଆରେ ଦର୍ଶକମାନେ ନିଜ ନିଜର ମତ ରଖୁଛନ୍ତି । ବିଶେଷକରି ଫିଲ୍ମରେ ସାଇ ପଲ୍ଲବୀଙ୍କ ଦ୍ୱାରା ଅଭିନୀତ ମାତା ସୀତାଙ୍କ ଏକ ଫାଇଟ୍ ସିନ୍‌କୁ ନେଇ ବିବାଦ ଦେଖାଦେଇଛି । ଏବେ ଏହି ପ୍ରସଙ୍ଗରେ ମହାଭାରତ ଧାରାବାହିକରେ ଭୀଷ୍ମଙ୍କ ଭୂମିକାରେ ଲୋକପ୍ରିୟତା ପାଇଥିବା ଅଭିନେତା ମୁକେଶ ଖାନ୍ନା ମଧ୍ୟ ନିଜର ଅସନ୍ତୋଷ ପ୍ରକାଶ କରିଛନ୍ତି ।

ମୁକେଶ ଖାନ୍ନା ନିଜର ଲେଟେଷ୍ଟ ଭ୍ଲଗ୍‌ରେ ଫିଲ୍ମର ନିର୍ମାତାମାନଙ୍କୁ ସମାଲୋଚନା କରି କହିଛନ୍ତି ଯେ, ବାଲ୍ମୀକି ରାମାୟଣରେ ମାତା ସୀତାଙ୍କୁ ଜଣେ ଯୋଦ୍ଧା ଭାବେ ଚିତ୍ରଣ କରାଯାଇନାହିଁ । ନିର୍ମାତାମାନେ ନିଜ କଳ୍ପନା ଅନୁସାରେ ଧାର୍ମିକ କାହାଣୀରେ ପରିବର୍ତ୍ତନ କରୁଥିବାରୁ ସେ ଦୁଃଖ ପ୍ରକାଶ କରିଛନ୍ତି ।

ସେ କହିଛନ୍ତି ଯେ, ଆମ ଧର୍ମର ଲୋକମାନେ କେବଳ ଟଙ୍କା ରୋଜଗାର ପାଇଁ ଧାର୍ମିକ ଗ୍ରନ୍ଥ ସହ ନିଜ ଇଚ୍ଛା ଅନୁସାରେ ପରିବର୍ତ୍ତନ କରୁଛନ୍ତି । ଯଦିଓ ସେ ଏପର୍ଯ୍ୟନ୍ତ ଫିଲ୍ମଟି ଦେଖିନାହାନ୍ତି, ତଥାପି ରିଭ୍ୟୁ, ଜନସାଧାରଣଙ୍କ ମତ, ପ୍ରୋମୋ ଏବଂ ଭାଇରାଲ୍ କ୍ଲିପ୍ ଆଧାରରେ ନିଜ ମତ ରଖିବାର ଅଧିକାର ତାଙ୍କର ଅଛି ବୋଲି ସେ କହିଛନ୍ତି ।

ମୁକେଶ ଖାନ୍ନା ଆହୁରି କହିଛନ୍ତି ଯେ, ସେ ୧୨୦୦ ଟଙ୍କା ଟିକେଟ୍ କିଣି ଏହି ଫିଲ୍ମ ଦେଖିବାକୁ ଚାହାନ୍ତି ନାହିଁ । ନିର୍ମାତା ନମିତ ମଲହୋତ୍ରାଙ୍କୁ ଫିଲ୍ମର ଆୟ ଦେବାକୁ ମଧ୍ୟ ସେ ଇଚ୍ଛୁକ ନୁହନ୍ତି । ତାଙ୍କ ମତରେ ଫିଲ୍ମରେ ଧାର୍ମିକ ଭାବନା ସହ ଖେଳାଯାଇଛି ।

ସୀତାଙ୍କୁ ଯୋଦ୍ଧା ଭାବେ ଦେଖାଇବାକୁ ନେଇ ପ୍ରଶ୍ନ
ନିଜ ୟୁଟ୍ୟୁବ୍ ଚ୍ୟାନେଲ୍ ‘ଭୀଷ୍ମ ଇଣ୍ଟରନ୍ୟାସନାଲ୍’ରେ ଭିଡିଓ ସେୟାର କରି ମୁକେଶ ଖାନ୍ନା କହିଛନ୍ତି ଯେ, ବାଲ୍ମୀକି ରାମାୟଣରେ କେଉଁଠି ମଧ୍ୟ ମାତା ସୀତାଙ୍କୁ ଯୁଦ୍ଧ କରୁଥିବା ଦେଖାଯାଇନାହିଁ । ସେ ମର୍ଯ୍ୟାଦା ପୁରୁଷୋତ୍ତମ ଶ୍ରୀରାମଙ୍କ ପତ୍ନୀ ଥିଲେ । ସେ ସ୍ୱାମୀଙ୍କ ସହ ବନବାସକୁ ଯିବାକୁ ସ୍ୱୀକାର କରିଥିଲେ ଏବଂ ସେବା ଓ ତ୍ୟାଗର ଉଦାହରଣ ଦେଇଥିଲେ ।

ତାଙ୍କ କହିବା ଅନୁସାରେ, ଯଦି ସୀତା ଜଣେ ଯୋଦ୍ଧା ଥିଲେ, ତେବେ ରାବଣ ତାଙ୍କୁ ଅପହରଣ କରିବା ସମୟରେ ସେ କାହିଁକି ଯୁଦ୍ଧ କରିନଥିଲେ ? ନିର୍ମାତାମାନେ ଏହି ଦୃଶ୍ୟକୁ ଅଦ୍ଭୁତ ରାମାୟଣରୁ ନେଇଥିବା କଥା କହିଥିବା ବେଳେ, ମୁକେଶ ଖାନ୍ନା ଏହାକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି ।

ସେ ଧାର୍ମିକ ଗ୍ରନ୍ଥଗୁଡ଼ିକରେ ପରିବର୍ତ୍ତନ କରିବାକୁ ନେଇ ଅସନ୍ତୋଷ ପ୍ରକାଶ କରିବା ସହ ଅନ୍ୟ ଧର୍ମର ପବିତ୍ର ଗ୍ରନ୍ଥରେ ଏଭଳି ପରିବର୍ତ୍ତନ କରିବାକୁ ନିର୍ମାତାମାନେ ସାହସ କରିପାରିବେ କି ବୋଲି ପ୍ରଶ୍ନ କରିଛନ୍ତି । ତାଙ୍କ ମତରେ ସୀତାଙ୍କ ଚରିତ୍ରକୁ ଏଭଳି ଭାବେ ଦେଖାଇବା ଦ୍ୱାରା ମୂଳ ଚରିତ୍ରର ପରିଚୟ ବଦଳିଯାଉଛି ।
ୟଶ ଓ ରଣବୀରଙ୍କ ତୁଳନାକୁ ନେଇ ମତ ରଖିଲେ

ଫିଲ୍ମରେ ରାମଙ୍କ ଭୂମିକାରେ ରଣବୀର କପୁର ଏବଂ ରାବଣଙ୍କ ଭୂମିକାରେ ୟଶଙ୍କ ଅଭିନୟକୁ ନେଇ ହେଉଥିବା ତୁଳନା ସମ୍ପର୍କରେ ମଧ୍ୟ ମୁକେଶ ଖାନ୍ନା ନିଜର ମତ ରଖିଛନ୍ତି । ତାଙ୍କ ଅନୁସାରେ, ୟଶଙ୍କୁ ଅଧିକ ପ୍ରଶଂସା ମିଳିବାର କାରଣ ହେଉଛି ଫିଲ୍ମର ସ୍କ୍ରିପ୍ଟ । ତାଙ୍କ ମତରେ ସ୍କ୍ରିପ୍ଟରେ ରାବଣଙ୍କ ମହିମାମଣ୍ଡନ କରାଯାଇଛି ଏବଂ ରାମଙ୍କ ଅପେକ୍ଷା ରାବଣଙ୍କୁ ଅଧିକ ପ୍ରଭାବଶାଳୀ ଭାବେ ଦେଖାଇବାକୁ ଚେଷ୍ଟା ହୋଇଛି ।

ଅନୁପମ ଖେରଙ୍କ ରିଭ୍ୟୁକୁ ମଧ୍ୟ କଲେ ଖାରଜ
ମୁକେଶ ଖାନ୍ନା ଅଭିନେତା ଅନୁପମ ଖେରଙ୍କ ଉପରେ ମଧ୍ୟ ମତ ରଖିଛନ୍ତି । ଅନୁପମ ଖେର ଫିଲ୍ମର ଖୁବ୍ ପ୍ରଶଂସା କରିଥିବା ଦେଖି ସେ ଆଶ୍ଚର୍ଯ୍ୟ ହୋଇଥିଲେ । କିନ୍ତୁ ପରେ ଅନୁପମ ଖେର ଏହି ଫିଲ୍ମରେ ଜଟାୟୁଙ୍କ ଚରିତ୍ରକୁ ସ୍ୱର ଦେଇଥିବା ଜାଣିବା ପରେ ତାଙ୍କ ପ୍ରଶଂସାର କାରଣ ବୁଝିପାରିଥିବା କହିଛନ୍ତି । ସେ ସ୍ପଷ୍ଟ ଭାବେ ଅନୁପମ ଖେରଙ୍କ ରିଭ୍ୟୁକୁ ଖାରଜ କରିଛନ୍ତି । ଏହିଭଳି ଭାବେ ‘ରାମାୟଣ’ର ଦୃଶ୍ୟ, ଚରିତ୍ର ଚିତ୍ରଣ ଏବଂ ଧାର୍ମିକ କାହାଣୀର ଉପସ୍ଥାପନାକୁ ନେଇ ବିବାଦ ଜାରି ରହିଛି ।