ଅର୍ଗସ ବ୍ୟୁରୋ : କବାଠ ଠକ ଠକ କଲାଣି ପ୍ରେମ ସପ୍ତାହ । ପ୍ରେମରେ ପଡିଥିବା ପ୍ରେମକୁ ବୁଝିଥିବା ପ୍ରେମୀଯୁଗଳମାନେ ପ୍ରସ୍ତୁତ ବି ହୋଇଗଲେଣି । ହେବେନି ବା କେମିତି, ନିଜ ପ୍ରେମିକ ବା ପ୍ରେମିକା ସହ ଏହି ୭ ଦିନ ଯେ ବେଶ ଗୁରୁତ୍ବପୂର୍ଣ୍ଣ ତାହା ସେମାନେ ଭଲ ଭାବେ ଜାଣିଛନ୍ତି । କେହି କେହି ନିଜ ଜୀବନସାଥୀ ସହ ଏହି ଦିନଗୁଡିକୁ ମନେଇଥାନ୍ତି, ତ କେହି କେହି ନିଜର ଏକତରଫା ପ୍ରେମକୁ ସଫଳ କରିବାକୁ ପୁରା ପ୍ରୟାସ କରିଥାନ୍ତି । ଯେମିତିକି ପ୍ରମିକାର ମନ ପସନ୍ଦର ଚକୋଲେଟ, ଟେଡି, ଗୋଲାପ ଦେଇ ମନର କଥା କହିଥାଏ ପ୍ରେମିକ । ଆଉ ହସିଦିଏ ସବୁ ବୁଝିଯାଏ ଅବୁଝା ପ୍ରେମିକା । ଇଏ ପ୍ରେମ ନୁହେଁ ତ ଆଉ କଣ ...

ଦର୍ଶକବନ୍ଧୁ , ପ୍ରେମ ପ୍ରତିଟି ମଣିଷ ଜୀବନରେ ହୋଇଥାଏ । ସେ ପୁଅ ହେଉ କି ଝିଅ ପ୍ରେମର ସ୍ପର୍ଶ ସମସ୍ତଙ୍କୁ ହୋଇଥାଏ । କୁହନ୍ତି ପ୍ରେମରେ ପଡିଲେ ମଣିଷ ବଦଳିଯାଏ । ଆଉ ଏହି ପ୍ରେମ ଯଦି ଏକ ସଚ୍ଚାପ୍ରେମ ହୋଇଥାଏ , ତେବେ ମଣିଷର ଖରାପ ସ୍ବଭାବକୁ ବଦଳାଇ ଦିଏ , ମଣିଷ ଭଲ ପାଇବା ଶିଖାଇଦିଏ । ବୁଝିବାକୁ ଗଲେ, ପ୍ରେମ ଏକ ନିଆରା ଅନୁଭୁତି, ଏକ ମିଠା ସମ୍ପର୍କର ଆରମ୍ଭ ।
ଫେବୃଆରୀ ୭-୧୪ ଯାଏଁ ପ୍ରେମ ସପ୍ତାହ ପାଳନ କରାଯାଏ । ବିଶେଷ ଭାବେ ଫେବୃଆରୀ ୧୪ ଭାଲେଣ୍ଟାଇନ ଡେ ନିଜ ପ୍ରେମକୁ ଉପସ୍ଥାପନ କରିବା ପାଇଁ ସବୁଠୁ ଭଲ ଦିନ ବୋଲି ପ୍ରେମୀଯୁଗଳ ମାନେ ମାନିଥାଆନ୍ତି । କିନ୍ତୁ ଏହି ଦିନ ଯେ କେବଳ ପ୍ରେମିକ ପ୍ରେମିକାଙ୍କ ପାଇଁ ତା ନୁହେଁ, ନିଜର ପରିବାରର ନିଜ ପ୍ରିୟ ସଦସ୍ୟ ସହ ବି ଭାଲେଣ୍ଚାଇନ ଡେ ସେଲିବ୍ରେଟ କରାଯାଏ । ଆଉ କେହି କେହି ନିଜ ସହ ମଧ୍ୟ ଏହି ଦିନ ସେଲିବ୍ରେଟ କରିଥାଆନ୍ତି ।

ଶୁକ୍ରବାର ଅର୍ଥାତ ଫେବୃଆରୀ ୭ରୁ ଆରମ୍ଭ ହେଉଛି ପ୍ରେମ ସପ୍ତାହର ପ୍ରଥମ ଦିନ । ପ୍ରଥମ ଦିନରୁ ୧୪ ତାରିଖ ଯାଏଁ ଏହି ପର୍ଯ୍ୟାୟ କ୍ରମେ ଡେ ଗୁଡିକ ଆସିଥାଏ । ରୋଜ୍ ଡେ, ପ୍ରପୋଜ ଡେ, ଚକୋଲେଟ୍ ଡେ, ଟେଡି ଡେ , ପ୍ରମିଜ୍ ଡେ, ହଗ୍‌ ଡେ, କିସ୍‌ ଡେ ଆଉ ଶେଷରେ ଭାଲେଣ୍ଟାଇନ ଡେ ।
ଫେବୃଆରୀ ୭, ରୋଜ୍‌ ଡେ :

ପ୍ରେମ ସପ୍ତାହର ଆରମ୍ଭ ଏହି ଦିନରୁ ହୋଇଥାଏ । ଏହି ଦିନ ପ୍ରେମିକ/ପ୍ରେମିକା ଗୋଲାପ ଫୁଲ ଦେଇ ନିଜର ପାର୍ଟନରକୁ ପ୍ରେମ ପ୍ରତିପାଦନ କରିଥାନ୍ତି । କାରଣର ଗୋଲାପକୁ ପ୍ରେମର ଏକ ପ୍ରତିକ ବୋଲି କୁହାଯାଏ ।

ଫେବୃଆରୀ ୮, ପ୍ରପୋଜ୍ ଡେ :
ଏହିଦିନ ନିଜର ମନର କଥା ନିଜ ପାର୍ଟନରକୁ କହିଥାନ୍ତି । ମନରେ ରଖିଥିବା ଭଲ ପାଇବାକୁ ନିଜ ପ୍ରେମ ଆଗରେ ପ୍ରକାଶ କରାଯାଏ । ଅନେକ ଦିନରୁ ମନରେ ଲୁଚାଇ ରଖିଥିବା ଭଲପାଇବାକୁ ପ୍ରପୋଜ ଡେ ରେ ଉପସ୍ଥାପନା କରିଥାଏ ପ୍ରେମିକ/ପ୍ରେମିକା । ତେଣୁ ଆପଣ ବି ଯଦି ଅନେକ ଦିନରୁ ନିଜ ମନକଥା ନିଜ ମନର ମଣିଷକୁ କହିପାରୁ ନଥାନ୍ତି, ତେବେ ମନର କଥା କହିବାକୁ ଏହି ଦିନ ଆପଣଙ୍କ ପାଇଁ ଖୁବ ଭଲ ଦିନ ।

ଫେବୃଆରୀ ୯, ଚକୋଲେଟ ଡେ :
ଯେତେ ରାଗ ଅଭିମାନ ଥିଲେ, ସବୁ ଦୂର ହୋଇଯାଏ ଗୋଟେ ଚକୋଲେଟରେ। ତେଣୁ ଚକୋଲେଟକୁ ମଧ୍ୟ ପ୍ରେମର ଏକ ପ୍ରତିକ ବୋଲି ଧରାଯାଏ । ଯେତେବେଳେ ମନ ପସନ୍ଦର ଚକୋଲେଟ ମିଳିଯାଏ , ସେତେବେଳେ ମନ ସତରେ ଖୁସିରେ ପୁରିଉଠେ । କିନ୍ତୁ ଯଦି ନିଜେ ହାତରେ ତିଆରି ଚକୋଲେଟକୁ ଆପଣ ନିଜ ପାର୍ଟନରକୁ ଦିଅନ୍ତି, ତାର ଖୁସି ଟିକେ ନିଆରା । ତେଣୁ ଚେଷ୍ଟା କରନ୍ତୁ ନିଜ ପାର୍ଟନରକୁ ନିଜ ହାତରେ ଚକୋଲେଟ ତିଆରି କରି ଦେବାପାଇଁ । ଯେଉଁଥିରେ ପ୍ରେମ ଆହୁରି ବଢେ ।

ଫେବୃଆରୀ ୧୦, ଟେଡି ଡେ :
ଟେଡି ସାଧାରଣତଃ ଝିଅମାନଙ୍କୁ ବେଶ ପସନ୍ଦ । ତେଣୁ ନିଜ ପ୍ରେମିକାକୁ ପସନ୍ଦର ଟେଡି ଦେଲେ ଉଭୟଙ୍କ ମଧ୍ୟରେ ଖୁସି ଆଉ ଭଲପାଇବା ଆହୁରି ବଢେ ।

ଫେବୃଆରୀ ୧୧, ପ୍ରମିଜ୍‌ ଡେ :
ପ୍ରମିଜ୍ ଡେ । ଯେଉଁଠି ଉଭୟ ନିଜ ଭଲ ପାଇବାର ରାଣ ଖାଆନ୍ତି । ପରସ୍ପର ସହ ସାଥି ହୋଇ ଚାଲିବାର ପ୍ରତିଶୃତି ଦିଅନ୍ତି । ପ୍ରେମର ଆରମ୍ଭରେ ଯେମିତି ପ୍ରତ୍ୟେକ ମୁହୁର୍ତ୍ତ ମିଠା ଲାଗେ, ସାରା ଜୀବନ ମଧ୍ୟ ଦୁଇଜଣଙ୍କ ପ୍ରେମ ସେମିତି ହିଁ ରହୁ ବୋଲି ପରସ୍ପରକୁ କଥା ଦିଅନ୍ତି ।

ଫେବୃଆରୀ ୧୨, ହଗ୍‌ ଡେ :
ଆଲିଙ୍ଗନ ଦିବସ । ପ୍ରେମର ଆଲିଙ୍ଗନର ଅନୁଭୁତି ଏକ ନିଆରା ଅନୁଭୁତି । ଯେଉଁଠି
ଗୋଟିଏ ଆଲିଙ୍ଗନ ସବୁ ଦୁଃଖ , କଷ୍ଟକୁ ଦୂର କରେ । ଯେଉଁଠି ଉଭୟ ଉଭୟଙ୍କ ପାଇଁ ଥିବା ଭଲ ପାଇବା, ସ୍ନେହ, ପ୍ରେମକୁ ପ୍ରତିପାଦନ କରେ । କୁହାଯାଇପାରେ ଆଲିଙ୍ଗନ ହେଉଛି, ଭାବପ୍ରବଣର ସଂଯୋଗ ।

ଫେବୃଆରୀ ୧୩ , କିସ୍‌ ଡେ :
ପ୍ରେମ ବା ଭଲପାଇବାରେ ଗୋଟିଏ ଚୁମ୍ବନରେ ନିଜ ମନର ହଜାର କଥା କହି ହେଇଯାଏ । ନିଜ ପାର୍ଟନରକୁ ସ୍ପେଶାଲ ଫିଲ୍ କରାଇବା ପାଇଁ ଗୋଟେ ଚୁମ୍ବନ ହିଁ ଯଥେଷ୍ଟ । ଯେଉଁଥିରେ ମିଠାପଣ ଭରିଯାଏ ସମ୍ପର୍କରେ ।

ଫେବୃଆରୀ ୧୪, ଭାଲେଣ୍ଟାଇନ ଡେ :
ଭାଲେଣ୍ଟାଇନ ଡେ । ଯେଉଁଥିରେ ପ୍ରେମୀଯୁଗଳ ପରସ୍ପର ସହ ସମୟ ଅତିବାହିତ କରନ୍ତି । ନିଜ ପାର୍ଟନରକୁ ସ୍ପେଶାଲ ଫିଲ କରାଇବାକୁ ମନ ପସନ୍ଦର ଗିଫ୍ଟ, ମନ ପସନ୍ଦର ଜାଗାକୁ ବୁଲେଇ ନେଇଥାନ୍ତି । ଯେଉଁଥିରେ ପ୍ରେମ ଆହୁରି ବଢିଥାଏ ।
କିଛି ଏମିତି ଏହି ସମ୍ପୁର୍ଣ୍ଣ ପ୍ରେମ ସପ୍ତାହକୁ ପାଳନ କରାଯାଏ ।