୮୭ ବର୍ଷ ବୟସରେ ବଲିଉଡ୍ ଅଭିନେତା ମନୋଜ କୁମାରଙ୍କ ଦେହାନ୍ତ

ବି-ଟାଉନ୍‌ରୁ ଆଉ ଏକ ଦୁଃଖଦ ଖବର । ଚାଲିଗଲେ ବରିଷ୍ଠ ଅଭିନେତା ମନୋଜ କୁମାର । ୮୭ ବର୍ଷ ବୟସରେ ମୁମ୍ବାଇର କୋକିଳାବେନ ଧିରୁଭାଇ ଅମ୍ବାନୀ ହସ୍ପିଟାଲ୍‌ରେ ମନୋଜ କୁମାରଙ୍କ ଦେହାନ୍ତ ହୋଇଛି । ତାଙ୍କ ଫିଲ୍ମ କ୍ୟାରିୟରରେ ମନୋଜ ଏକାଧିକ ଦେଶଭକ୍ତି ଚଳଚ୍ଚିତ୍ରରେ ଅଭିନୟ କରିଥିଲେ । ଯେଉଁଥି ପାଇଁ ତାଙ୍କୁ ଫ୍ୟାନ୍ସ ଶ୍ରଦ୍ଧାରେ 'ଭାରତ କୁମାର' ଡାକନ୍ତି । କ୍ରାନ୍ତି, ଉପକାର ଭଳି ଦେଶଭକ୍ତି ଫିଲ୍ମ ପାଇଁ ଚର୍ଚ୍ଚିତ ଥିଲେ ମନୋଜ ।

ଅଭିନେତା ମନୋଜ କୁମାରଙ୍କ ପରଲୋକ ଖବର ତାଙ୍କ ପ୍ରଶଂସକଙ୍କୁ ସ୍ତବ୍ଧ କରି ଦେଇଛି । ସୋସିଆଲ୍ ମିଡିଆରେ ସମସ୍ତେ ମନୋଜଙ୍କୁ ଅଶ୍ରୁଳ ବିଦାୟ ଜଣାଉଛନ୍ତି । ସହାରା, ଚାନ୍ଦ, ହନିମୁନ, ପୂରବ ଔର ପଶ୍ଚିମ, ନସିବ, ମେରି ଆୱାଜ ସୁନୋ, ନୀଳ କମଲ, ଉପକାର, ପନ୍ତର କେ ସନମ, ପିୟା ମିଳନ ଭଳି ଚଳଚ୍ଚିତ୍ରରେ କାମ କରିଥିଲେ । ଜାତୀୟ ପୁରସ୍କାର ସହ ପଦ୍ମଶ୍ରୀ ଓ ଦାଦା ସାହେବ ଫାଲ୍‌କେ ଆୱାର୍ଡ ସମ୍ମାନରେ ସମ୍ମାନିତ ହୋଇଥିଲେ ।

୧୯୫୭ରେ ଫିଲ୍ମ ଫ୍ୟାସନ ଜରିଆରେ ଚଳଚ୍ଚିତ୍ର ଜଗତରେ ପାଦ ଥାପିଥିଲେ ମନୋଜ କୁମାର । ୧୯୬୫ ମସିହା ଥିଲା ତାଙ୍କ କ୍ୟାରିୟର ପାଇଁ ଗେମ୍ ଚେଞ୍ଜର୍ । ସେହି ବର୍ଷ ଆସିଥିବା ସହିଦ ଫିଲ୍ମ ତାଙ୍କ କ୍ୟାରିୟରକୁ ମାଇଲେଜ୍ ଦେଇଥିଲା । ଆଉ ଏହା ପରେ ସେ ପଛକୁ ଫେରି ଚାହିଁ ନଥିଲେ । ସେ କୌଣସି ବି ରୋ ହେଉ, ନିଖୁଣ ଅଭିନୟ କରି ଦର୍ଶକଙ୍କ ମନ ଜିଣି ନେଉଥିଲେ ମନୋଜ କୁମାର ।

କେବଳ ମନୋଜଙ୍କ ଫିଲ୍ମ ହିଟ୍ ହେଉ ନଥିଲା, ତାଙ୍କ ଗୀତରେ ଝୁମୁଥିଲେ ଲୋକ । ସେ ଅଭିନୟ କରିଥିବା ଉପକାର ଫିଲ୍ମର ଗୀତ 'ମେରେ ଦେଶ କି ଧରତୀ' ଆଜି ବି ଗୁଞ୍ଜରିତ ହେଉଛି ଦେଶର ପିଲାଠୁ ବୁଢ଼ାଙ୍କ ତୁଣ୍ଡରେ । ୧୯୩୭ ଜୁଲାଇ ୨୪ରେ ମନୋଜ କୁମାର ପରାଧୀନ ଭାରତ ଆଜିର ପାକିସ୍ତାନରେ ଜନ୍ମ ହୋଇଥିଲେ । ତାଙ୍କ ନାଁ ଥିଲା ହରିକୃଷ୍ଣ ଗିରି ଗୋସ୍ଵାମୀ । ଦେଶ ବିଭାଜନ ବେଳେ ତାଙ୍କ ପରିବାର ଦିଲ୍ଲୀ ପଳାଇ ଆସିଥିଲେ ।